سالتاناتتى ءىس-شارانىڭ قۇرمەتتى قوناعى رەتىندە اسكەري قىزمەتشىلەردىڭ اتا-انالارى, تۋىسقاندارى, قارۋلى كۇشتەردىڭ ارداگەرلەرى, جەرگىلىكتى باسقارۋ ورگاندارى مەن قوعامدىق ۇيىم وكىلدەرى قاتىستى. قوناقتاردىڭ نازارىنا اسكەريلەردىڭ جاۋىنگەرلىك دايارلىق ەلەمەنتتەرى بويىنشا كورسەتىلىمدەر ۇسىنىلدى.
اقتاۋداعى 25744 اسكەري بولىمىنە مىڭعا جۋىق قوناق كەلگەن بولاتىن. شالعايدان كەلگەن اتا-انالارمەن كەزدەسۋدى «باتىس» وڭىرلىك قولباسشىلىعىنىڭ اسكەرلەرى قولباسشىسى گەنەرال-مايور قانىش ابۋباكيروۆ وتكىزدى. وڭىرلىك قولباسشىلىق اسكەري بولىمدەرىنىڭ كومانديرلەرى اتا-انالارمەن اڭگىمەلەسىپ, بارلىق قىزىقتىرعان ساۋالدارىنا جاۋاپ بەردى, قوناقتاردى اسكەري قىزمەتشىلەردىڭ الەۋمەتتىك-تۇرمىستىق جاعدايىمەن تانىستىرىپ, كازارلامالاردى, اسحانالاردى, ترەناجەرلىق زالدار مەن وقۋ سىنىپتارىن كورسەتتى.
- ءدال وسى مەيرام كۇنى انت قابىلداۋ مەن ءۇشىن زور قۇرمەت. بارشا قازاقستاندىقتاردى قازاقستان رەسپۋبليكاسى تۇڭعىش پرەزيدەنتى كۇنىمەن قۇتتىقتاعىم كەلەدى! ءبىز وتانىمىزدىڭ يگىلىگى ءۇشىن ءوزىمىزدىڭ اسكەري بورىشىمىزدى ادال ورىندايتىنىمىزعا سەنىمدىمىن, دەيدى جاس سارباز, قاتارداعى جاۋىنگەر ەريك كاريموۆ.
اسكەري انت قابىلداعان جاس ساربازدار ەندىگى كەزەكتە جاس مامانداردى دايارلاۋ باعدارلاماسىنا سايكەس جاۋىنگەرلىك ۇردىسكە كىرىسەدى. جارتى جىلدان سوڭ ولار اسكەري ماماندىق يەسى اتانىپ, ارتيللەرياشى, تانكىشى, اتقىش, بايلانىسشى لاۋازىمدارىندا تولىققاندى وتان قورعاۋشىلار مارتەبەسىنە يە بولادى.
قازىرگى ۋاقىتتا اسكەرگە دەنە ءبىتىمى شىنىققان, ءبىلىمدى, مورالدىق تۇرعىدا تۇراقتى بوزبالالار كەلەدى. ارداگەرلەر مەن اسكەري بولىمدەردىڭ كومانديرلەرى ولار داڭقتى جاۋىنگەرلىك ءداستۇردىڭ لايىقتى ۇرپاعىنا اينالىپ, قازاقستان رەسپۋبليكاسىنا قالتقىسىز قىزمەت ەتۋدىڭ ۇلگىسى بولاتىندارىنا سەنەدى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
