قازاقستان رەسپۋبليكاسى تۇڭعىش پرەزيدەنتى كۇنىن باتىسقازاقستاندىقتار بىرنەشە قۋانىشتى وقيعامەن اتاپ ءوتتى. «جاستار» ستاديونىندا قالا تۇرعىندارى ءۇشىن سىرعاناۋ ماۋسىمى اشىلسا, كينوتەاترلار «ەلباسى جولى» ءفيلمىن كورەرمەندەرگە ۇسىندى. ەڭ ۇلكەن قۋانىش ورال قالاسىندا سوڭعى جىلدارى پايدا بولعان «كوكتەم» شاعىناۋدانىندا بولدى. مۇندا 120 پاتەرلىك جاڭا ءۇي پايدالانۋعا بەرىلدى.
اسەل جاعىپاروۆا – جۇبايى دا, ءوزى دە مەملەكەتتىك قىزمەتشى. «بۇگىن 3 بولمەلى پاتەر الدىق! كورىپ شىقتىق, ۇنادى, جىپ-جىلى, ادەمى. 3 بالامىز بار. تۇرعىن ءۇي كەزەگىندە التى جىل تۇردىق. سوڭعى ءۇش جىل بويى سالىم جينادىق. مىنە, ەندى ءوز باسپانامىزعا قولىمىز جەتىپ, قۋانىشىمىزدا شەك جوق!» دەيدى ول.
بۇگىن ەكى بولمەلى پاتەر كىلتىن العان زەينەتكەر راحيليا كارىموۆا بۇل ءۇيدىڭ قۇرىلىسىن سالىنىپ جاتقان كەزىنەن باقىلاپ, قاداعالاپ ءجۇرىپتى. ساپاسىنا كوڭىلى تولادى ەكەن.
- ءبىز دە ءۇش جىل بويى «تۇرعىنۇيقۇرىلىسجيناقبانكىنە» قارجى جينادىق. بۇگىن ەكى بولمەلى پاتەرگە قولىمىز جەتتى. پاتەرىمىز جىلى ءارى كەڭ, - دەيدى ءلاززات مولداشەۆا.
- اتا-بابامىز اڭساعان تاۋەلسىزدىككە قول جەتكىزىپ, ءوزىمىز ەل بولىپ, ءوز پرەزيدەنتىمىزدى سايلاعان كۇنىمىز قۇتتى بولسىن. تۇڭعىش پرەزيدەنتىمىز كۇنىنە وراي ەلباسىمىز قابىلداعان «نۇرلى جەر» ينفراقۇرىلىمدى دامىتۋ مەملەكەتتىك باعدارلاماسى بويىنشا بۇگىن 120 پاتەردى جاڭا يەلەرىنە - «تۇرعىنۇيقۇرىلىسجيناق» بانكىنىڭ سالىمشىلارىنا تاپسىرعالى وتىرمىز. بۇل جەردە 6-7 جىل بۇرىن ءبىر دە ءبىر ءۇي بولعان جوق ەدى, بوس جاتقان دالا بولاتىن. قازىر قاراڭىز, قانشاما ۇيلەر, مەكتەپ, ەمحانا, سپورتتىق كەشەن سالىندى, جولدار توسەلىپ, اينالا اباتتاندىرىلدى. وسىنىڭ ءبارى – تاۋەلسىزدىكتىڭ جەمىسى. ەلىمىزدىڭ دامۋىنا جاسالىپ جاتقان ەلباسىنىڭ ەڭبەگى. بۇگىنگى جەتىستىككە كوپۇلتتى حالقىمىزدىڭ بىرلىگىنىڭ ارقاسىندا جەتىپ وتىرمىز. ارقايسىمىز «وسى مەنىڭ قالام, وسى مەنىڭ ەلىم» دەپ ەڭبەك ەتسەك, بيىككە كوتەرىلە بەرەمىز. دامىعان 30 ەل ەمەس, ودان دا جوعارى ناتيجەگە جەتەمىز, - دەدى باتىس قازاقستان وبلىسىنىڭ اكىمى التاي كولگىنوۆ جاڭا تۇرعىن ءۇيدىڭ سالتاناتتى تاپسىرىلۋ راسىمىندە.
قۇرىلىس قۇنى 1 ملرد تەڭگەگە باعالانعان جاڭا ءۇيدىڭ قۇرىلىسىن «جايىقسەلستروي» جشس ءبىر جىلدان اسا ۋاقىت ىشىندە اياقتاعان.
- الداعى ۋاقىتتا ءبىز تاعى دا جاڭا ۇيلەردى پايدالانۋعا بەرەمىز. ءدال قازىر باتىس قازاقستان وبلىسىندا «7-20-25», «نۇرلى جەر» ت.ب. مەملەكەتتىك باعدارلامالار بويىنشا كوپقاباتتى 24 ءۇي, اۋدانداردا 104 ءۇي سالىنىپ جاتىر. وسى ۇيلەر تاپسىرىلعان كەزدە 3500-دەن اسا وتباسى جاڭا باسپاناعا يە بولادى. مەملەكەت قاراپايىم قازاقستاندىقتاردىڭ ءومىر ساپاسىن ارتتىرۋ ءۇشىن بولاشاقتا دا ەڭبەك ەتە بەرەدى. تاۋەلسىزدىك كۇنىنە وراي ورالدا جاڭا مەكتەپ, تاعى دا كوپقاباتتى تۇرعىنۇيلەر پايدالانۋعا بەرىلەدى, - دەگەن ءوڭىر باسشىسى پاتەر يەلەرىنە جاڭا باسپانا تەك جاقسىلىقتىڭ, باق پەن بەرەكەنىڭ ۇياسى بولۋىن تىلەدى.
وسى كۇنى ايدا بەيىسوۆا, ءىلياس ماقسوت, ءلاززات مولداشەۆا, ەرجان زاينۋللين, پەلاگەيا بەلياەۆا, ەلامان امانعۇلوۆ جانە باسقالارى پاتەر كىلتىن التاي كولگىنوۆ پەن ورال قالاسىنىڭ اكىمى مۇرات مۇقاەۆتىڭ ءوز قولىنان الدى. كۇننىڭ ايازىنا قاراماستان قىزىققا جينالعان جاس بالالار شاشۋعا قارىق بولدى.
تۇڭعىش پرەزيدەنت كۇنى ورالدىق سپورتشىلار ءۇشىن دە قۋانىشتى بولدى. بۇل كۇنى قالا ىرگەسىندەگى دەركۇل اۋىلىندا 700 شارشى مەترلىك, وبلىس ورتالىعىنىڭ ەگىزباەۆ كوشەسىندە اۋماعى 453,7 شارشىمەترلىك سپورت كەشەندەرى پايدالانۋعا بەرىلدى. مۇندا حالىقتىڭ ءتۇرلى بۇقارالىق سپورت تۇرلەرىمەن اينالىسۋىنا بارلىق جاعداي جاسالعان. ماسەلەن, «NARYN» سپورتتىق-ساۋىقتىرۋ كەشەنىنىڭ ەكى دەڭگەيلى عيماراتىندا ۆولەيبول, باسكەتبول الاڭدارى, بي زالى, ۇستەل تەننيسى جابدىقتالعان. كەشەن العاشقى كۇننەن-اق باسەكەلى دۋعا تولىپ كەتتى: مۇندا تۇڭعىش پرەزيدەنت كۇنىنە وراي مۇندا ۇستەل تەننيسىنەن ەرلەر, مەملەكەتتىك قىزمەتكەرلەر جانە تىرەك-قيمىل جۇيەسى زاقىمدانعاندار اراسىندا ۇستەل تەننيسىنەن رەسپۋبليكالىق اشىق تۋرنير باستالدى.
ايتا كەتەيىك, ورال قالاسى اۋماعىندا بۇعان دەيىن 7 سپورتتىق-ساۋىقتىرۋ كەشەنى سپورتسۇيەر بۇقاراعا قىزمەت ەتەتىن. بۇگىن ولاردىڭ سانى 9-عا جەتتى. مۇنىڭ بەسەۋى – مەملەكەتتىك بولسا, تورتەۋى – جەكەمەنشىك.
قازبەك قۇتتىمۇرات ۇلى,
«ەگەمەن قازاقستان»
سۋرەتتى تۇسىرگەن تەمىربولات توقمامبەتوۆ
