سالتاناتتى شاراعا وبلىس اكىمى بەردىبەك ساپارباەۆ, وليمپيادا چەمپيونى جاقسىلىق ۇشكەمپىروۆ, قازاقستاننىڭ قوعام قايراتكەرلەرى مەن جۋرناليستەر, ءماسليحات دەپۋتاتتارى, ارداگەرلەر, قوعام, پارتيا, كاسىپورىندار, مەكەمە وكىلدەرى جانە ت.ب. قاتىستى.
وبلىس اكىمى قۇتتىقتاۋ سوزىندە قازاقستاننىڭ بارلىق جەتىستىگى ەلباسى نۇرسۇلتان ءابىش ۇلى نازارباەۆتىڭ ەسىمىمەن تىكەلەي بايلانىستى ەكەنىن اتاپ ءوتتى.
«قۇرمەتتى قوناقتار, قۇرمەتتى جەرلەستەر! 27 جىل بۇرىن قازاقستاندىقتار العاش رەت تۇڭعىش پرەزيدەنتتەرىن سايلادى. وسى 27 جىلدىڭ ىشىندە ءبىز كوپتەگەن قيىندىقتاردى, داعدارىستى باستان وتكەرىپ, بەيبىتشىلىك پەن كەلىسىمدى ساقتاپ قالدىق, ەكونوميكالىق دامۋدا تەڭدەسسىز ۇمتىلىس جاساپ, الەمدەگى باسەكەگە قابىلەتتى ەلۋ ەلدىڭ قاتارىنا ەندىك, ازاماتتاردىڭ الەۋمەتتىك جاعدايىن قامتاماسىز ەتتىك. بۇگىندە ءبىزدىڭ ەل دۇنيە جۇزىنە تانىمال, حالىقارالىق ارەنادا بەدەلدى, ەڭ باستىسى – كوپۇلتتى قازاقستاندا بەيبىتشىلىك, بىرلىك پەن كەلىسىم بار. وسىنىڭ ءبارى مەملەكەت باسشىسى نۇرسۇلتان ءابىش ۇلى نازارباەۆتىڭ كورەگەن ىشكى جانە سىرتقى ساياساتىنىڭ, ۇزدىكسىز ەڭبەگىنىڭ, بەدەلىنىڭ ارقاسى»,-دەدى بەردىبەك ساپارباەۆ قۇتتىقتاۋ سوزىندە.
ء«بىز, اقتوبەلىكتەر پرەزيدەنت ساياساتىن ارقاشان قولدايمىز, ونىڭ تاپسىرمالارىن ورىندايمىز. وعان مەملەكەت باسشىسىنىڭ ءبىزدىڭ وبلىسقا جۋىردا جاساعان جۇمىس ساپارىندا اقتوبەلىكتەرگە بەرگەن جوعارى باعاسى دالەل. ءبىز ارقاشان ءبىر بولۋىمىز كەرەك, ەگەر ارقايسىسىمىز ەل بولاشاعىنا ءوز ۇلەسىمىزدى قوساتىن بولساق, نۇرسۇلتان ءابىش ۇلى نازارباەۆتىڭ باسشىلىعىمەن ودان دا زور تابىسقا جەتەتىن بولامىز. بارلىعىڭىزدى وسى ۇلكەن مەرەكەمەن قۇتتىقتايمىن. ارقايسىسىڭىزعا مىقتى دەنساۋلىق, ۇيلەرىڭىزگە اماندىق تىلەيمىن, ەلىمىزدە بەيبىتشىلىك پەن كەلىسىم بولسىن, پرەزيدەنتىمىز باسقارىپ وتىرعان گۇلدەنگەن قازاقستانىمىزدىڭ مەملەكەتتىك تۋى ماقتانىشپەن جەلبىرەسىن»,-دەپ جالعاستىردى وبلىس اكىمى.
شارا كەزىندە قازاقستاننىڭ تۇڭعىش پرەزيدەنتىنىڭ اتىنا جىلى لەبىزدەر مەن ءسۇيىۋتى اندەر ايتىلدى.
بۇدان باسقا, «جومارت جۇرەك» سىيلىعىنىڭ وبلىستىق كەزەڭىنىڭ جەڭىمپازدارى اتانعان وبلىس مەتسەناتتارى ماراپاتتالدى. ولاردىڭ بارلىعى دا ءوڭىر حالقىنا كومەك كورسەتىپ, وسىندا ءىرى قايىرىمدىلىق جوبالارىن جۇزەگە اسىرعان. وسىلايشا, ءبىلىم, مادەنيەت جانە الەۋمەتتىك سالالاردى دامىتۋعا ۇلەس قوسىپ, ومىردە قيىندىققا تاپ بولعان وتباسىلارعا قايىرىمدىلىق كومەك كورسەتكەنى ءۇشىن تالعات سالفيكوۆ «جىل مەتسەناتى» اتاندى. «جىل ادامى» اتالىمىنا ايتەكە بي اۋدانىنىڭ قارابۇلاق اۋىلىندا بىرقاتار سپورتتىق جانە الەۋمەتتىك نىساندار سالعان جانە جوندەۋ جۇرگىزگەن قايرات قويلىباەۆ يە بولدى. جەتىم بالالارعا جانە تۇرمىسى تومەن وتباسىلاردىڭ بالالارىنا كومەك كورسەتىپ, ينكليۋزيۆتى ورتانى قۇرۋعا ۇلەس قوسقانى ءۇشىن «قازاقستاننىڭ حالىق بانكى» اق وبلىستىق فيليالى «ۇزدىك جىل مەكەمەسى» اتاندى. بۇدان وزگە, ەرىكتىلەر قوزعالىسىن, ءبىلىم سالاسىن, تۋعان جەرىن, قايىرىمدىلىق مادەنيەتى مەن مەتسەناتتىقتى دامىتۋعا قوسقان ۇلەسى ءۇشىن ەدىل ايماعامبەتوۆ, جانسەن كەرەەۆ, باۋىرجان قوندىباەۆ, تيمۋر ءامينوۆ, قارجاۋباي اليقۇلوۆ جانە اسحات قابيەۆ «جومارت جۇرەك» جوباسىنىڭ ءتۇرلى اتالىمدارىنىڭ لاۋرەاتتارى اتاندى.
وبلىستىڭ بارلىق ەلدى مەكەندەرىندە تۇڭعىش پرەزيدەنت كۇنىنە ارنالعان 700 مادەني-بۇقارالىق, سپورتتىق مەرەكەلىك شارالار ءوتىپ جاتىر, سونىڭ جەتپىسى اۋقىمدى دەڭگەيدە.
