ەلباسى فورۋم باستالار الدىندا نازارباەۆ زياتكەرلىك مەكتەپتەرى وقۋشىلارىنىڭ عىلىمي جوبالارى قويىلعان كورمەنى ارالاپ كورىپ, وسى ءبىلىم بەرۋ ۇيىمدارىن ودان ءارى دامىتۋ ستراتەگياسى جونىندەگى باياندامانى تىڭدادى.
نۇرسۇلتان نازارباەۆ سويلەگەن سوزىندە فورۋمعا قاتىسۋشىلاردىڭ ءبارىن زياتكەرلىك مەكتەپتەردىڭ 10 جىلدىق مەرەيتويىمەن قۇتتىقتاپ, بۇل مەكتەپتەر ەلىمىزدىڭ ءبىلىم بەرۋ جۇيەسىندە ەرەكشە ورىن الاتىنىن اتاپ ءوتتى.
– زياتكەرلىك مەكتەپتەر مەملەكەتىمىزدەگى ورتا ءبىلىم بەرۋ جۇيەسىنىڭ ەتالونىنا اينالدى. بۇگىندە قازاقستاننىڭ بارلىق مەكتەپتەرى سىزدەرگە قاراپ بوي تۇزەيدى. وسكەلەڭ ۇرپاقتىڭ قازىرگى زامانعى تالاپتارعا ساي بولۋى بازالىق بىلىممەن تىكەلەي بايلانىستى, – دەدى مەملەكەت باسشىسى.
قازاقستان پرەزيدەنتى وڭىرلەردە اشىلعان 20 زياتكەرلىك مەكتەپتى قازىرگى كەزدە 8 مىڭنان استام وقۋشى ءبىتىرىپ شىققانىن ايتتى.
– ەلىمىزدەگى ءاربىر دارىندى بالانىڭ الەمنىڭ ۇزدىك ستاندارتتارى بويىنشا ءبىلىم الۋىنا مۇمكىندىك تۋعىزۋ ءبىز ءۇشىن ماڭىزدى بولدى. ونىڭ باستى قاعيداتتارى – وقۋ ۇدەرىسىنىڭ جۇيەلىلىگى, ماقساتتاردىڭ ايقىندىعى جانە تاجىريبە جۇزىندە وقىتۋ, – دەدى ەلباسى.
مەملەكەت باسشىسى ءبىلىم بەرۋدىڭ وزىق ادىستەمەلەرىن جانە ىرىكتەۋدىڭ قاتاڭ جۇيەسىن ەنگىزۋ ناتيجەسىندە نازارباەۆ زياتكەرلىك مەكتەپتەرىنىڭ وقۋشىلارى ماتەماتيكالىق ساۋاتتىلىق بويىنشا الەمنىڭ ۇزدىك 10 ەلىنىڭ وقۋشىلارىنىڭ قاتارىنا قوسىلعانىن اتاپ ءوتتى.
– بۇگىندە مۇندا ەلىمىزدىڭ بارلىق وڭىرىنەن كەلگەن بالالار ءبىلىم الۋدا. سولاردىڭ 3 مىڭنان استامى – كوپ بالالى جانە تۇرمىسى تومەن وتباسىلاردىڭ بالالارى بولسا, 2,5 مىڭى – اۋىلدىق جەرلەر مەن شاعىن قالالاردان كەلگەن وقۋشىلار. بۇل – الەۋمەتتىك ادىلەتتىلىك پەن تالانتتى ءار بالانىڭ ءوزىن-ءوزى تانىتۋعا جاسالعان مۇمكىندىكتىڭ ناقتى كورسەتكىشى, – دەدى نۇرسۇلتان نازارباەۆ.
سونىمەن قاتار, قازاقستان پرەزيدەنتى زياتكەرلىك مەكتەپتەردى ىلگەرىلەتۋدىڭ وڭ قارقىنىن ساقتاپ, ولاردى ودان ءارى دامىتۋدىڭ جاڭا باعىتتارىن ايقىنداۋ قاجەتتىگىنە نازار اۋداردى.
– قازىردىڭ وزىندە تسيفرلىق تەحنولوگيالار, بيوينجەنەريا جانە روبوتتاندىرۋ سالالارىندا جۇمىس ىستەي الاتىن جاڭا ماماندار قاجەت. الداعى 10-15 جىل ىشىندە جاساندى ينتەللەكت پەن اۆتوماتتاندىرۋ تەحنولوگيالارى ءومىرىمىزدىڭ اجىراماس بولىگىنە اينالادى, – دەدى ەلباسى.
سونداي-اق, مەملەكەت باسشىسى يننوۆاتسيالىق تەحنولوگيالار ەنگىزۋ تۇرعىسىنان وقۋشىلاردىڭ جاڭا كاسىپتەرگە بەيىمدەلۋىنىڭ ماڭىزدىلىعىنا توقتالدى.
– الەم كۇن سايىن دامىپ كەلەدى, ۇنەمى يننوۆاتسيالىق جانە جاڭا دۇنيەلەر پايدا بولىپ, اشىلۋدا. سوندىقتان ءومىردىڭ جىلدام وزگەرىپ جاتقان تالاپتارىنا ساي بولۋ ءۇشىن سىزدەرگە زاماناۋي تەحنولوگيالاردى مەڭگەرۋ قاجەت, – دەدى نۇرسۇلتان نازارباەۆ.
بۇدان بولەك, قازاقستان پرەزيدەنتى وقۋشىلاردىڭ STEاM-دايىندىعىن كۇشەيتىپ, العان بىلىمدەرىن جوبالىق جانە زەرتتەۋ جۇمىستارىن ورىنداۋ ارقىلى تاجىريبەدە جۇزىندە قولدانۋدى قامتامىز ەتۋدىڭ ماڭىزدىلىعىن ايتتى.
– اعىلشىن تىلىنەن اۋدارعاندا, STEاM دەگەنىمىز – بۇل جاراتىلىستانۋ عىلىمدارى, تەحنولوگيالار, ينجەنەريا, ونەر جانە ماتەماتيكا. ءبىر سوزبەن ايتقاندا, قازىرگى زاماندا سۇرانىسقا يە بولىپ كەلە جاتقان پاندەر. مۇنداي پانارالىق جانە قولدانبالى ءادىستى قولدانۋ بالالاردى سىني ويلاۋعا ۇيرەتەدى. سونىڭ ارقاسىندا جاڭاشىلدار مەن ونەرتاپقىشتاردىڭ جاڭا بۋىنى قالىپتاسادى, – دەدى ەلباسى.
مەملەكەت باسشىسى ءتورتىنشى باعىت رەتىندە شەت تىلدەردى مەڭگەرۋدىڭ ماڭىزدىلىعىن اتاپ ءوتتى.
– بيىلعى وقۋ جىلىندا زياتكەرلىك مەكتەپتەردە وقۋشىلاردىڭ تاڭداۋى بويىنشا ەكىنشى شەت ءتىلىن مەڭگەرۋ ءىسى قولعا الىندى. جاھاندانۋ جاعدايىندا شەت تىلدەرىن ءبىلۋدىڭ ماڭىزى اسا زور. تىلدەردى ءبىلۋ باسقا ەلدەردەگى ادامداردىڭ مەنتاليتەتى مەن مادەنيەتىن تۇسىنۋگە جول اشىپ, جوعارى ءبىلىم الۋ جانە جۇمىسقا ورنالاسۋ بارىسىندا تاڭداۋ جاساۋ اياسىن كەڭەيتۋگە مۇمكىندىك بەرەدى, – نۇرسۇلتان نازارباەۆ.
قازاقستان پرەزيدەنتى وقۋشىلاردىڭ ەموتسيالىق ينتەللەكتىسىن دامىتۋ ماسەلەلەرىنە توقتالدى.
– ەموتسيالىق ينتەللەكت قازىرگى زاماندا باسەكەگە قابىلەتتى تۇلعانىڭ ماڭىزدى قاسيەتى سانالادى. اياسى تار تەحنيكالىق قۇزىرەتتىلىكتەرگە قاراعاندا, ادامداردى سەندىرە الۋ, ولارعا جاناشىرلىقپەن قاراپ, تىڭداي ءبىلۋ, تىزىمدىلىك تانىتۋ قابىلەتتەرى سۇرانىسقا كوبىرەك يە بولادى, – دەدى ەلباسى.
سوڭىندا مەملەكەت باسشىسى زياتكەرلىك مەكتەپتەردىڭ 10 جىلدىق مەرەيتويى ەلىمىزدىڭ وركەندەۋى جولىندا دامۋدىڭ جانە الداعى زور جەتىستىكتەردىڭ جاڭا كەزەڭىنىڭ باستاۋى بولاتىنىنا سەنىم ءبىلدىردى.
– قازىرگى كەزدە تەرەڭ ءبىلىم الۋ, شەت تىلدەرىن جانە زاماناۋي تەحنولوگيالاردى مەڭگەرۋ ءبارىمىزدىڭ باستى مىندەتىمىز بولۋعا ءتيىس. سىزدەر سوندا عانا العا قويعان ماقساتتارعا قول جەتكىزىپ, بيىك بەلەستەردى باعىندىرا الاسىزدار, – دەدى نۇرسۇلتان نازارباەۆ.
