ءتورت توپتان تۇراتىن بالاباقشا 1 مەن 6 جاس ارالىعىنداعى بالعىنداردى قابىلدايدى. قۇرىلىسى 2017 جىلى تامىزدا باستالعان عيماراتقا 55 ميلليون تەڭگە كولەمىندە قارجى جۇمسالىپتى. گلۋبوكوە اۋدانىنىڭ اكىمى قاليقان بايعونىسوۆ بۇل تاربيە وشاعى وسى اۋىلدا 25 جىلدان بەرى سالىنىپ وتىرعان العاشقى بالاباقشا ەكەندىگىن ايتادى. «اۋىلدا بۇرىن بالاباقشا رەتىندە جۇمىس ىستەگەن عيمارات بوس تۇر. اۋداننىڭ اقساقالدارىن دا, بەدەلدى ادامدارىن دا يەسىنە بىرنەشە مارتە جىبەردىك. الايدا نىساندى ەل يگىلىگىنە بەرۋدەن باس تارتتى. ءسويتىپ نە ىستەرىمىزدى بىلمەي, داعدارىپ, تىعىرىققا تىرەلگەندە توقتاروۆتار وتباسى, ياعني ايدىن مەن جۇبايى مەرۋەرت قاسىمىزدان تابىلىپ, ساۋاپتى ءىستى قولعا الىپ, جاڭادان بالاباقشا تۇرعىزدى. اۋىل تۇرعىندارى اتىنان العىس ايتامىز», - دەگەن اۋدان اكىمى بالاباقشا ۇجىمىنا اۋداندى دامىتۋ قورى اتىنان ءتۇرلى-ءتۇستى تەلەديدار تارتۋ ەتتى.
يگى شاراعا قاتىسقان شىعىس قازاقستان اۋىل شارۋاشىلىعى عىلىمي-زەرتتەۋ ينستيتۋتى باس ديرەكتورىنىڭ ورىنباسارى نۇرلان توقتاروۆ: «بيزنەستىڭ ءتۇرى كوپ قوي. بالاباقشا اشۋ بيزنەسى – ساۋاپتى بيزنەس. قايتارىمى بۇگىن بولماسا دا, كوپ جىلدان كەيىن ەلدىڭ العىسىمەن, بالعىنداردىڭ لەبىزىمەن قايتادى», - دەي كەلە بۇلدىرشىندەرگە ءتۇرلى-ءتۇستى تەلەديدار سىيلادى.
اۋدان اكىمىنىڭ ورىنباسارى رادجان سەيىتقانوۆتىڭ ايتۋىنشا, اۋدانداعى 3 پەن 6 جاس ارالىعىنداعى بۇلدىرشىندەر بالاباقشامەن 100 پروتسەنت قامتىلعان. بۇگىندە اقتاستا 9 بالاباقشا جۇمىس ىستەيدى (تورتەۋى – مەملەكەتتىك, بەسەۋى – جەكە مەنشىك). سوڭعى ءۇش جىلدا اۋداندا 5 بالاباقشا اشىلسا, سونىڭ تورتەۋىن توقتاروۆتار وتباسى سالىپ بەرىپتى. «بۇل ىسپەن شۇعىلدانۋ ءۇش ۇيىقتاساق تۇسىمىزگە كىرمەگەن ەدى. مەن وبلىستىق سالىق دەپارتامەنتىندە جۇمىس ىستەدىم. جولداسىم ارماتۋرا زاۋىتىندا ەڭبەك ەتتى. ءبىز ەڭ اۋەلى وسكەمەندەگى جىبەك ماتالار ىقشام اۋدانىندا كوتتەدج سالدىق. ونى قالاي پايدالانارىمىزدى بىلمەي جۇرگەندە وبلىستىق ءبىلىم باسقارماسىنداعى اپايىم بالاباقشا اشۋ جونىندە يدەيا ايتتى. سودان نە كەرەك, نەسيە الىپ, 2014 جىلى وسى ىقشاماۋداندا العاشقى بالاباقشامىزدى اشتىق. جالپى, ءبىز وسكەمەندە كوتتەدجدە بالاباقشا اشۋ تاجىريبەسىن ەنگىزگەن العاشقى كاسىپكەر شىعارمىز. ءبىر جىلدان كەيىن قالا اكىمىنىڭ وتىنىشىمەن وسكەمەندە تاعى ءبىر بالاباقشا اشتىق. ودان سوڭ گلۋبوكوە اۋدانىندا تۇڭعىش بالاباقشامىز جۇمىسىن باستادى. جىل سايىن اشىپ جاتىرمىز. قازىر ءبىزدىڭ 8 بالاباقشامىز بار. ونىڭ 4-ءۋى قالادا, 4-ءۋى گلۋبوكوە اۋدانىندا», - دەيدى ايدىن توقتاروۆتىڭ جۇبايى مەرۋەرت.
تۇڭعىش پرەزيدەنت كۇنىنە ارنالعان مەرەكەلىك شارالار بۇدان ءارى ۋۆاروۆ اۋىلىنداعى مادەنيەت ۇيىندە جالعاسىپ, اۋدان اكىمى قاليحان بايعونىسوۆ گلۋبوكوەنىڭ دامۋىنا ەڭبەك ءسىڭىرىپ جۇرگەن بىرقاتار ازاماتتارعا العىس حاتتار مەن «استانانىڭ 20 جىلدىعى» مەدالىن تابىس ەتتى.
ازامات قاسىم,
شىعىس قازاقستان وبلىسى,
گلۋبوكوە اۋدانى
