«اسان» ءفيلمى فەستيۆالدىڭ قىسقامەتراجدى فيلمدەرگە ارنالعان كونكۋرستىق باعدارلاماسى شەڭبەرىندە كورسەتىلدى. كينوتۋىندى اكەسىن اقتىق ساپارعا شىعارىپ سالۋعا جولعا شىققان بوزبالا تۋرالى باياندايدى.
- مەن وتە قۋانىشتىمىن. ماعان سەنىپ, قولداۋ بىلدىرگەندەرى ءۇشىن «قازاقفيلم» كينوستۋدياسىنىڭ باسشىلىعىنا العىسىمدى ايتامىن. بۇل جۇلدە, مەن ءۇشىن, ۇلكەن موتيۆاتسيا, - دەدى ماراپاتتاۋ سالتاناتىندا جاس رەجيسسەر بەرىك جاحانوۆ.
جالپى فەستيۆالدىڭ حالىقارالىق بايقاۋلارىنا قاتىسۋعا 60 ەلدەن 280-نەن استام وتىنىمدەر كەلىپ تۇسكەن ەكەن. ناتيجەسىندە, كونكۋرستىق باعدارلاماعا 13 ەلدەن كەلگەن (اقش, پولشا, فرانتسيا, تۇركيا, قازاقستان, قىرعىزستان جانە ت.ب.) 31 كينوتۋىندى ىرىكتەلىنىپ الىندى.
حالىقارالىق قىسقامەتراجدى فيلمدەر كونكۋرسىنىڭ قازىلار القاسىن تانىمال وزبەك رەجيسسەرى ايۋب شاحوبيددينوۆ باسقاردى. بۇل قازىلار القاسىنىڭ قۇرامىنا پروديۋسەر فابيو كانەپا (يتاليا), اكتەر فيليپپ رەينحاردت (شۆەيتساريا), قويۋشى وپەراتور ماكس تتسۋي (گەرمانيا), كينوسىنشى گۋلبارا تولومۋشوۆا (كىرگىزستان) كىردى.
ايتا كەتسەك, حالىقارالىق تولىقمەتراجدى فيلمدەر بايكاۋىندا قازىلار القاسىنىڭ قۇرامىنا وتاندىق تانىمال رەجيسسەر رۇستەم ابدىراشەۆ تە كىردى.
حالىقارالىق PROlogue كينوفەستيۆالى وزبەكستاننىڭ جاستار وداعى جانە «وزبەككينو» ۇلتتىق اگەنتتىگى, تاشكەنت قالاسى اكىمدىگى, كينەماتورگرافيا دامۋ ورتالىعى, وزبەكستاننىڭ ۇلتتىق كينوكوميسسياسىنىڭ ۇيىمداستىرۋىمەن ءوتتى.
ەستەرىڭىزگە سالا كەتسەك, «اسان» ءفيلمى 2017 جىلى «قازاقفيلم» ۇيىمداستىرعان ستسەناريلەر كونكۋرسىندا جەڭىمپاز اتانىپ, وندىرىسكە جىبەرىلگەن بولاتىن. لەنتا 71-ءشى حالىقارالىق كانن كينوفەستيۆالىنىڭ Short Film Corner اياسىندا كورسەتىلگەن بولاتىن.
ۇستىمىزدەگى جىلدىڭ قاراشا ايىنىڭ باسىندا «اسان» ءفيلمى باكۋدە وتكەن 9-شى حالىقارالىق Start film festival كينوفەستيۆالىندە قازىلار القاسىنىڭ ارنايى جۇلدەسىن يەمدەندى. سونداي-اق كينوتۋىندى قازاقستان رەسپۋبليكاسى كينەماتوگرافيستەر وداعى تاراپىنان ۇزدىك دەپ تانىلىپ, ۇلتتىق «قۇلاگەر» كينوجۇلدەسىمەن ماراپاتتالعان بولاتىن.
سونىمەن قاتار, اتالعان كارتينا مۇسىلمان كينوسى حكف قاتىسقان. III Baikonyr Short Film Festival ءفيلمنىڭ باس كەيىپكەرى (اكتەر ازات ءجۇمادىل) ۇزدىك ەر ادام ءرولى نوميناتسياسىن جەڭىپ الدى جانە VI ء«ۇمىت» تمد ەلدەرى جاستار كينوسى فورۋمىندا ارنايى جۇلدەگە يە بولدى.
