انالار كەڭەسىنىڭ ءتورايىمى ك ۇلىمكوز سمايلوۆا ءوز سوزىندە «ەر ەلدى قورعايدى, ەل جەردى قوعايدى» دەگەن قازاقتىڭ قاناتتى ءسوزىن كەلتىرە وتىرىپ, وتباسىداعى اتا-انا تاربيەسىنە, جاۋاپكەرشىلىگىنە توقتالدى. بالانىڭ ءبىر ءسوزدى, ەر مىنەزدى, ەڭبەكققور دا كوپشىل بولىپ وسۋىندەگى وتباسى, وشاق قاسى قامقورشىسى, جىلىتۋشىسى انانىڭرولىنە, ءتالىم-تاربيەسىنە كوپ بايلانىستى ەكەنىن, ونى تاۋەلسىز قازاقستاننىڭ تۇڭعىش پرەزيدەنتى نۇرسۇلتان ءابىش ۇلى نازارباەۆتىڭ ومىرىنەن كورۋگە بولاتىنىن اتاپ كورسەتتى.
تۇرىك ەتنومادەني بىرلەستىگى توراعاسىنىڭ ورىنباسارى ديليارا حاسانوۆا , پوليتسيا قىزمەتكەرى ماقپال سارسەنقىزى وتباسىنىڭ ۇيتقىسى, بەرەكەسى, مەيىرىم-شاپاعات كوزى بولا بىلگەن ءالجان انامىزدىڭ بەرەكەلى شاڭىراقتىڭ تۇڭعىشىن ماقسات-مۇراتىنا جەتكىزۋ, اتا-بابا جولىمەن تەكتىلىككە تاربيەلەۋ جولىنداعى جانقيارلىق ەڭبەگى, مەيىرىم-شاپاعاتى, سۇيىسپەنشىلىگى مەن قامقورى, ۇلىنىڭ جانىن قاس-قاباعىنان, جانارىنان تانىعان بايقاعىش قاسيەتتەرى جايلى تەبىرەنە اڭگىمەلەدى. ساپۋرا قاجى تاشەنوۆانىڭ ىزەتتىلىككە شاقىرعان ويلارى ءبىر شاڭىراق استىندا تاتۋ-ءتاتتى وتباسى ىنتىماعىن, ءبارىنىڭ بابىن تاۋىپ, قاناتىمەن سۋ سەبەلەگەن قارلىعاش قۇساپ تاتۋ-ءتاتتى, ىنتىماق ورتانى قالىپتاستىرا بىلگەن, ۇل-قىزدارىن يماندىلىققا, مەيىرىمدىلىككە باۋلۋدا ۇلتتىق قۇندىلىقتاردى ۇستانعان انا دەگەن ۇلى ۇعىمنىڭ ءتۇپ-ءتۇپ تامىرىنان تەرەڭ وي ساباقتاپ, قىز-كەلىنشەكتەرگە ءالجان انا تاعىلىمى ۇلكەن ۇلگى-ونەگە ەكەنىن, ءداستۇردى سىيلاپ, تەرەڭ سەزىنىپ وسكەن بالا ەلباسى سياقتى ەل, جەر, وتان قورعانى بولىپ وسەتىنىن جەتكىزدى.
انالار كەڭەسىنىڭ مۇشەسى, پسيحولوگ يرينا ياكيموۆا اتاقتى تۇلعانىڭ تۋعان جەرىن, ءوسىپ-ونگەن ورتاسىن, وتباسىن, بىلايشا ايتقاندا, گەنەولوگيالىق دىڭگەگىن ءبىلۋ جاستار ءۇشىن ۇمىتىلماس ساباق ەكەنىن ايتا كەلىپ, بالالارىنىڭ ومىردەن ءوز ورنىن تابۋدى قالاعان, سول ماقسات-مۇرات جولىنداعى ءالجانداي ءاز انالاردىڭ ءرولىن «جۇماق ايەلدىڭ اياعىنىڭ استىندا» دەگەن قاناتتى سوزبەن سالىستىردى. ەر ازامات-ءتۇزدىڭ ادامى بولسا, نەگىزگى تاربيەگە ايەلگە جۇكتەلگەنىن ناقتى مىسالدارمەن ساباقتادى.
ەستە قالار كەشتە تۇڭعىش پرەزيدەنت كۇنى تۋعان 14 بالاقايعا زور قۇرمەت كورسەتىلىپ, ەلدى, جەردى قورعاي بىلەتىن قايسار ازامات بولىپ وسىڭدەر دەگەن تىلەكپەن ىرىمداپ ارقايسىسىنىڭ قولىنا قامشى ۇستاتتى. كوپ بالا ءوسىرىپ, وتباسىنىڭ ىرىسىن, شۋاعىن كەلتىرىپ وتىرعان ءبىر توپ اق جاۋلىقتى انالارعا ارنايى سىي-سياپاتتار جاسالدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
