ەكسترەميزمگە قارسى كۇرەس جانە زاڭسىز كوشى-قون بويىنشا شەكارالىق ىنتىماقتاستىق ماسەلەلەرى تالقىلانعان كەزدەسۋگە قازاقستان ءىىم شتاب باستىعى پوليتسيا پولكوۆنيگى سەرىك سۇيىنباەۆ, وزبەكستان ءىىم ۇيىمداستىرۋ دەپارتامەنتىنىڭ باستىعى شۋحرات نورگيتوۆ, سونداي-اق تۇركىستان وبلىسى پوليتسيا دەپارتامەنتىنىڭ باستىعى قايرات دالبەكوۆ باستاعان شەكارالاس اۋدانداردىڭ, گەنەرال-مايور گايرات كاديروۆ باستاعان جيزاق, تاشكەنت, سىرداريا وبلىستارىنىڭ پوليتسيا قىزمەتكەرلەرى قاتىستى. بۇگىنگى تاڭدا ەكى ەل اراسىنداعى شەكارالىق ايماق جونىندەگى ءوزارا كەلىسىم مەن بايلانىسقا قاتىستى بىرقاتار قۇرىلىمدار شەڭبەرىندە حالىقارالىق كەلىسىمشارتتار بار. دەگەنمەن ترانسۇلتتىق جانە ەسىرتكى تاسىمالداۋدىڭ ءوسۋ قاۋپى, كوشى-قون پروتسەستەرى مەن قىلمىستىق احۋال بىرلەسە جۇمىس ىستەۋدى تالاپ ەتەدى.
ەكىجاقتى كەزدەسۋدە تاراپتار ەكسترەميزمگە قارسى ءىس-قيمىل, جەدەل-پروفيلاكتيكالىق ءىس-شارالاردى وتكىزۋ, كوشى-قون جونىندە اقپاراتتار الماسۋ سەكىلدى باسقا دا بىرقاتار ماسەلەلەر بويىنشا ناقتى ۇسىنىستاردى ورتاعا سالدى. سونداي-اق قازاقستان مەن وزبەكستان ءىىم وكىلدەرى قىلمىسپەن كۇرەس جانە شەكارالىق ىنتىماقتاستىق سالاسى بويىنشا بىرلەسە ۇيىمداستىراتىن جانە جۇزەگە اسىراتىن بىرقاتار قۇجاتتارعا قول قويدى.
عالىمجان ەلشىباي,
«ەگەمەن قازاقستان»
تۇركىستان وبلىسى
