جيىندى اشقان ۋنيۆەرسيتەتتىڭ عىلىمي جۇمىستار جونىندەگى پرورەكتورى قاجىمۇرات احمەدەنوۆ تۇڭعىش پرەزيدەنت كۇنى – مەملەكەتتىك بيلىك ينستيتۋتىنىڭ سيمۆولى, تاۋەلسىزدىك ىرگەتاسىن بەكىتە تۇسكەن مارتەبەلى مەيرام ەكەنىن ايتىپ, ۇجىمدى قۇتتىقتاپ ءوتتى.
- قازاقستانداعى ەڭ كونە جوعارى وقۋ ورىندارىنىڭ بىرىنەن سانالاتىن ماحامبەت وتەمىس ۇلى ۋنيۆەرسيتەتى مەملەكەت باسشىسى جۇرگىزىپ كەلە جاتقان بارلىق باستامانى قىزۋ قولدايدى. ويتكەنى بۇل رەفورمالار – ءار ادامنىڭ كوكەيىندەگى ارمان-ماقساتقا جاقىنداتا تۇسەدى, - دەدى قاجىمۇرات ماقسۇت ۇلى.
جيىندا قازاقستان رەسپۋبليكاسى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ بقو بويىنشا دەپارتامەنتىنىڭ سىبايلاس جەمقورلىق پروفيلاكتيكاسى باسقارماسىنىڭ باسشىسى ءبىرجان حايرۋللين ءسوز الىپ, اق جايىق وڭىرىندەگى مەملەكەتتىك قىزمەتشىلەردىڭ بۇگىنگى كۇن تالابىنا ساي جۇمىسىنا ساراپتاما جاسادى.
تاريح عىلىمدارىنىڭ ماگيسترى دانيال تانزەنوۆ بولسا ەلباسى ن.ءا.نازارباەۆتىڭ قازاق حالقىنىڭ رۋحاني جاڭعىرۋىنا قوسقان ۇلەسى تۋرالى تاريحي تۇرعىدان ءسوز قوزعادى. ەلباسىنىڭ قازاق قوعامىنىڭ تۇراقتىلىعىن ساقتاۋداعى ەڭبەگى گۋمانيتارلىق ءبىلىم ماگيسترى گۇلبارام جالەكەنوۆانىڭ بايانداماسىنا دا وزەك بولدى.
ال باتىس قازاقستان وبلىستىق كاسىپكەرلىك جانە يندۋستريالدى-يننوۆاتسيالىق جەتىلدىرۋ باسقارماسىنىڭ باس مامانى, ەكونوميست نۇرلان تاشكەنوۆ ەلىمىزدە كاسىپكەرلىكتى قولداۋ باعىتىنداعى مەملەكەتتىك باعدارلامالار تۋرالى ايتىپ بەردى. جينالعاندار زاڭ عىلىمدارىنىڭ ماگيسترى داۋرەن ساعىنعاليەۆتىڭ «جاڭا كەلبەتتەگى قازاقستاننىڭ جاھانعا تانىلۋى» اتتى بايانداماسىن دا ىقىلاسپەن تىڭدادى.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان وبلىسى
سۋرەتتى تۇسىرگەن رافحات حالەلوۆ
