«الداۋ قوسپاي ادال ەڭبەگىن ساتقان قولونەرلى – قازاقتىڭ اۋليەسى» دەپ اباي اتامىز ايتقانداي, سامعاۋ ناعاشىسىنان ەتىك تىگۋدىڭ قىر-سىرىن جاستاي ۇيرەنگەن. قىسقاسى, قازاقتىڭ كوكقاسقا ەتىگىن كوكتەي جورمەپ, كونتەرىدەن سىروكشە سالىپ, بىلعارىدان ويمىشتى قالىڭ قونىش قوندىرىپ, ەتىك تىگۋدى مەڭگەرگەن جىگىت 2005 جىلى التاي اسىپ, اتاجۇرتىنا ورالعان. كەلە سالا اتاكاسىبىن قولعا العان. بىراق شالعاي اۋىلدىڭ شارقى بەلگىلى, ءونىمى وتە قويماعان سوڭ, 2010 جىلى ەلورداعا كەلىپ, ەتىك تىگۋدى باستاپ كەتكەن.
– 2015 جىلى ەدى, – دەيدى سامعاۋ ءىنىمىز. – قولىما قىمبات قولتىراۋىننىڭ تەرىسى ءتۇستى. ونى باسقاعا قيماي بار قازاقتىڭ باسىن قوسىپ, باعىن اشقان نۇرسۇلتان اعاما ارناپ ەتىك تىگۋگە بەل بايلادىم. ەتىك تىگىلىپ بىتكەن سوڭ ونى نۇرسۇلتان ءابىش ۇلىنا جولداپ, ونىمەن قويماي 2012 جىلدان بەرى ۇزبەي تويلانىپ كەلە جاتقان 1 جەلتوقسان – قازاقستان رەسپۋبليكاسىنىڭ تۇڭعىش پرەزيدەنتى كۇنىمەن قۇتتىقتادىم. ارادا كوپ ۋاقىت وتكەن جوق, مەملەكەت باسشىسى نۇرسۇلتان نازارباەۆتىڭ قاراپايىم ەتىكشى-ورالمان مەنىڭ اتىما جولداعان ءىلتيپات حاتى كەلىپ جەتتى.
وزدەرىڭىز كورىپ وتىرعانداي, ەلباسى ءوزىنىڭ ءىلتيپات حاتىندا: سامعاۋ باۋىرىمىز جىبەرگەن سىيلىقتى قابىل العانىن ايتىپ, سىرتتا جۇرگەن اعايىندار اتاجۇرتقا ورالىپ, ورىن تاپقاندارىنا قۋانىشتى ەكەنىن جەتكىزە كەلە, مۇنىڭ ءبارى تاۋەلسىزدىكتىڭ ارقاسى ەكەنىن ەرەكشە ەسكەرتىپ, سىيلىق يەسىنە باق-بەرەكە تىلەپ, حاتتىڭ سوڭىنا «2 جەلتوقسان, 2015 ج.» دەگەن داتامەن قاتار ءوزىنىڭ قولىن قويىپتى.
اتام قازاق «جاقسىنىڭ شاراپاتى – ءتاڭىردىڭ راحاتى» دەگەنىندەي, وسى وقيعادان كەيىن ورالمان باۋىرىمىزدىڭ كاسىبىنە كەڭ جول اشىلعان. قازىرگى تاڭدا سامعاۋ ءناسىپحان ۇلىنا ەلىمىزدەگى «وڭىرلەردى دامىتۋ» باعدارلاماسى بويىنشا ەلوردا ىرگەسىندەگى قاراوتكەل اۋىلىنان 20 سوتىق جەر تەلىمى بەرىلىپ, وعان كاسىپكەر ازامات جەڭىل اياق كيىم وندىرەتىن شاعىن كاسىپورىن سالىپ جاتىر. «بۇيىرسا, الداعى جىلدىڭ اياعىنا تامان ءوندىرىستى ىسكە قوسامىز» دەيدى سامعاۋ ءىنىمىز.
بەكەن قايرات ۇلى,
«ەگەمەن قازاقستان»
