وسى مەرزىم ارالىعىندا ەلباسىنىڭ كىندىك قانى تامعان اۋىلداعى رۋحانيات ورداسىنان ادام اياعى ارىلعان ەمەس. ويتكەنى بۇل ورتالىق نۇرسۇلتان نازارباەۆتىڭ مەملەكەت باسشىسى رەتىندەگى ورنەكتى ءومىر جولىنان سىر شەرتىپ قانا قويماي, تۇتاس ەلىمىزدىڭ تاۋەلسىزدىك تاريحىنان مول ماعلۇمات بەرەتىن مەكەنگە اينالدى.
ورتالىقتىڭ اشىلۋ ساتىندە تۇڭعىش پرەزيدەنت – ەلباسى قورىنىڭ اتقارۋشى ديرەكتورى قانات جۇماباەۆ ەرەكشە سىي رەتىندە مەملەكەت باسشىسىنىڭ 2001 جىلى مىنگەن قىزمەتتىك اۆتوكولىگىن تارتۋ ەتكەن ەدى. پرەزيدەنتكە قىزمەت كورسەتكەن سول «مەرسەدەس» ماشيناسى قازىر رۋحاني ورتالىققا كەلۋشىلەردىڭ قىزىعا تاماشالايتىن ەكسپوناتىنا اينالىپتى.
– ورتالىق ءبىر جىلدىڭ ىشىندە ەل كوڭىلىنەن ورىن تاۋىپ, كەلۋشىلەردىڭ قىزىعۋشىلىعىن وياتقان رۋحاني ورىنعا اينالدى. بۇعان دەيىن نۇرسۇلتان نازارباەۆتىڭ ءومىر جولىنان سىر شەرتەتىن تانىمدىق ورتالىقتىڭ مىندەتىن شامالعانداعى ورتا مەكتەپ جانىنداعى مۋزەي اتقارىپ كەلگەن ەدى. ال «اتامەكەن» تاريحي-مادەني ورتالىعى شامالعاندىقتار عانا ەمەس, تۇتاس ەلىمىزدىڭ ماقتانىشى بولاتىنداي رۋحاني كەشەنگە اينالدى, – دەيدى ورتالىق ديرەكتورى ءجاميلا ەلعونديەۆا.
ايتپاقشى, مۇندا كەلۋشىلەردى قىزىقتىراتىن ەكسپوناتتىڭ ءبىرى – مەملەكەت باسشىسى پايدالانعان ۇكىمەتتىك اۆتوكولىك دەدىك. اسىرەسە ورتالىققا ءجيى كەلەتىن مەكتەپ وقۋشىلارى ەلباسى مىنگەن كولىكتى اينالشىقتاپ جۇرەدى ەكەن.
جالپى, بۇل ورتالىقتىڭ التىن قورىنا جينالعان بارلىق ەكسپوناتتار ەلباسىنىڭ بالالىق شاعىنان باستاپ ەگەمەن ەلدىڭ كوشباسشىسىنا اينالعانعا دەيىنگى كەزەڭدى قامتيدى. قۇندى جادىگەرلەردى جيناقتاۋعا شامالعانداعى تاريحي ولكەتانۋ مۇراجايى, ورتا مەكتەپتىڭ ۇجىمى جۇمىلسا, مەملەكەت باسشىسىنىڭ جازبا ەڭبەكتەرى مەن تانىمدىق فوتوسۋرەتتەرى, ءار جىلداردا جارىق كورگەن كىتاپتارى ەلباسى كىتاپحاناسى مەن ۇلتتىق كىتاپحانا مۇراعاتىنان الىنىپ, ەل نازارىنا ۇسىنىلۋدا.
قالماحانبەت مۇقامەتقالي,
«ەگەمەن قازاقستان»
الماتى وبلىسى
