سادۋاقاس ومار ۇلىنىڭ ايتۋىنا قاراعاندا, وسى جىلدارى شامالعان ورتا مەكتەبىندە اسا بىلىكتى مۇعالىمدەر جۇمىس ىستەپتى. ءتىپتى اعايىندى شامەنوۆتەر دەيتىن ءبىرى – ماتەماتيكا, ەكىنشىسى – مەديتسينا عىلىمدارىنىڭ دوكتورى اتاعى بار اعالى-ءىنىلى ادامدار بيولوگيا جانە ماتەماتيكا ءپانى بويىنشا ورتا مەكتەپتە ۇستازدىق ەتكەن ەكەن. «ورتا مەكتەپتە عىلىم دوكتورلارىنىڭ ساباق بەرۋى قالاي؟» دەگەن ءبىزدىڭ سۇراعىمىزعا سادۋاقاس اعامىز: – 1937-1938 جىلدارى قازاق زيالىلارىنىڭ دەنى حالىق جاۋى رەتىندە اتىلدى نەمەسە ءارتۇرلى جازا جۇكتەدى. ودان امان قالعاندارى الماتى قالاسىنان قۋىلىپ, استانادان 30-50 شاقىرىم الىس تۇرۋعا ۇكىم ەتىلدى. وسى ۇكىم بويىنشا شامەنوۆتەر ءبىزدىڭ اۋىلعا ورنالاسقان كورىنەدى. ال مىنا فوتوداعى جىلقىباي ۇستاز دا ءدال وسىلاي جەر اۋدارىلعان زيالى بولاتىن, – دەدى.
ودان كەيىن نۇرسۇلتان ءابىش ۇلىنىڭ ارتىندا تۇرعان سىنىپتاسى – قاسىم جۇرىنباەۆ. بۇل جىگىتتىڭ قاتارلاستارىنان ەكى جاس ۇلكەندىگى بار ەكەن. ەرتەرەك دۇنيەدەن ءوتىپتى. ورتاداعى قىز زەينەپ جاقاەۆا. بۇل دا نۇرەكەڭنەن ءۇش جاس ۇلكەن, 1937 جىلى تۋىپتى. كەيىن بۋحگالتەر ماماندىعىن وقىپ, ۇزاق جىل تابان اۋدارماي اۋىلدا قىزمەت اتقارعان. قازىر الماتى وبلىسى, قاراساي اۋدانى جاندوسوۆ اۋىلىندا تۇرىپ جاتىر.
سۋرەتتەگى شەتتە تۇرعان بوزبالا – سادۋاقاس اعامىزدىڭ ءوزى. ساكەڭ ەلباسىنىڭ ەستەلىكتەرىندە «ەڭ جاقىن دوسى» رەتىندە باياندالادى. ەكىنشى تاراپتان بۇل كىسى ءابىش اتا مەن ءالجان انانىڭ وكىل بالاسى رەتىندە ەلباسىمەن ءبىر شاڭىراقتا تەل وسكەن ەكەن. – 1953 جىلدىڭ ءبىر كۇنى, – دەيدى ساكەڭ. – ءبىزدىڭ ۇيگە ءابىش اتامىز بەن ءالجان انامىز كەلىپ, «سادۋاقاس قاراعىم, اكەڭ ومار 1942 جىلى سوعىسقا اتتاناردا بىزگە كەلىپ, مىنا ءفاشيستىڭ قارقىنى قاتتى, مەن وسى كەتكەننەن قايتا ورالمايمىن, سىزدەرگە ايتارىم «جالعىز ۇلىم سادۋاقاسقا قامقور بولىڭدار» دەپ سەنى اماناتتاعان-تىن», دەپ 13 جاستاعى مەنى وكىل بالا قىلىپ الدى. ءسويتىپ مەن وسى كىسىلەردىڭ قامقورلىعىندا بولىپ, سۇلتانمەن (نۇرسۇلتاندى ايتادى) تاي-ق ۇلىنداي تەبىسىپ بىرگە ءوستىم. كەيىن ءابىش اتا ءۇيىنىڭ ىرگەسىنەن ورىن بەرىپ, ول جەرگە قارىنداسىم ەكەۋمىز ساماننان ءۇي تۇرعىزىپ الدىق. ءۇيدى سالۋعا ۋكراينادا وقىپ جۇرگەن نۇرسۇلتان دوسىم كەلىپ كومەكتەستى. بەرتىندە وسى وقيعا جايلى گازەتتەرگە «سۇلتان سالىسقان سادۋاقاس ءۇيى» دەگەن ماقالا شىعىپ, ول جازبا كەيىن ءبىر كىتاپقا ەندى. بۇل فوتو 8-سىنىپ بىتىرگەن جىلى تۇسكەن سۋرەتىمىز. نۇرسۇلتان ەكەۋمىزدى ءالجان انا دۇكەنگە ەرتىپ بارىپ, بىردەي ەتىپ كويلەك الىپ بەردى. مىنا فوتوداعى نۇرەكەڭ ەكەۋمىز قاتار كيىپ تۇرعان قاراجولاقتى كويلەك وسى انامىز سىيلاعان بۇيىم.
بەكەن قايرات ۇلى,
«ەگەمەن قازاقستان»
