مالىمدەمەنى قارسى الۋشى جاق رەتىندە قازاقستان رەسپۋبليكاسىنىڭ سىرتقى ىستەر ءمينيسترى قايرات ءابدىراحمانوۆ ءباسپاسوز ءماسليحاتىندا جاريا ەتتى. وندا تاراپتار سيريا جونىندەگى ءحى حالىقارالىق كەزدەسۋدى استانادا ۇيىمداستىرعانى ءۇشىن قازاقستان پرەزيدەنتى نۇرسۇلتان نازارباەۆتىڭ جانە قازاقستان بيلىگىنىڭ اتىنا وزدەرىنىڭ العىستارىن بىلدىرگەن.
سونىمەن قاتار بىرلەسكەن مالىمدەمەدە تاراپتار سيريا اراب رەسپۋبليكاسىنىڭ بۇۇ جارعىسى مەن قاعيداتتارىنا سايكەس ەگەمەندىگىن, تاۋەلسىزدىگىن جانە اۋماقتىق تۇتاستىعىنىڭ بۇزىلماۋىن قولدايدى دەلىنگەن. وسى قاعيداتتار جاپپاي ساقتالىپ, استانا فورماتىندا قول جەتكىزىلگەن كەلىسىمدەردى بۇزاتىن بارلىق ارەكەتتەرگە جول بەرىلمەۋى كەرەك. سونىمەن قاتار كەپىل بەرۋشى تاراپتار تەرروريزمگە قارسى كۇرەس دەگەندى سىلتاۋراتىپ سيريانىڭ ەگەمەندىگى مەن تەرريتوريالىق تۇتاستىعىنا قول سۇعاتىن سەپاراتيستىك ارەكەتتەرگە قارسىلىق بىلدىرۋگە كەلىسكەنى جاريالاندى.
مالىمدەمەدە تاراپتاردىڭ 2018 جىلدىڭ 30-31 شىلدەسىندە سوڭعى رەت كەزدەسكەننەن بەرگى سيرياداعى جاعدايدىڭ قالاي دامىعانى تالقىلانعانى ايتىلىپ, قول قويىلعان شارتقا سايكەس ۇشجاقتى ۇيلەسىمدىلىكتى نىعايتا بەرۋگە كەلىسىلگەنى دە ءسوز بولعان. سونىمەن بىرگە يدليب دەەسكالاتسيا ايماعىنداعى جاعداي تالقىلانىپ, ونداعى جاعدايدى تۇراقتاندىرۋ جونىندەگى مەموراندۋمنىڭ ورىندالۋىنا تاراپتار دايىن ەكەندىگى اتاپ كورسەتىلگەن. اتىستى توقتاتۋدىڭ ماڭىزدىلىعى دا اتالىپ, الايدا دەەسكالاتسيا ايماعىن قۇرۋ سيريانىڭ تاۋەلسىزدىگى, ەگەمەندىگى جانە اۋماقتىق تۇتاستىعىنا قول سۇقپاۋى كەرەكتىگى ايتىلعان.
تاراپتار بۇۇ قاۋىپسىزدىك كەڭەسى تەرروريستىك ۇيىمدار دەپ تانىعان يليم, «دجابحات ان-نۋسرا» جانە باسقا دا ء«ال-كايدامەن» بايلانىسى بار ادامدار مەن ۇيىمداردىڭ جويىلعانىن قالايدى. ال سيريانىڭ بارلىق قارۋلى وپپوزيتسياسىنىڭ قۇرىلىمدارىن بۇل ۇيىمداردان ىرگەسىن اۋلاق سالۋعا شاقىرادى. سيريادا حيميالىق قارۋ قولدانىلعانى ايىپتالىپ, تاراپتار وسى وقيعاعا بايلانىستى كاسىبي تەكسەرىستى حالىقارالىق حيميالىق قارۋدى قولدانۋعا تىيىم سالۋ جونىندەگى ۇيىمنىڭ جۇرگىزگەنىن قالايدى.
سونىمەن بىرگە تاراپتار جۇمىس توبى شەڭبەرىندەگى قاناتقاقتى جوبانىڭ نەگىزىندە تۇتقىندار الماسىلعانىن, ولگەندەردىڭ ءمايىتىن بەرۋ جۇمىستارىنىڭ جۇرگىزىلگەنىن قولدايدى. ال بوسقىنداردىڭ وتانىنا ورالۋىنا بارلىق قاۋىپسىزدىك جاعدايلاردىڭ جاسالۋىن قولدايتىندىعى دا ايتىلعان. سونداي-اق مالىمدەمەدە تاراپتار بۇۇ باس حاتشىسىنىڭ سيريا بويىنشا ارناۋلى وكىلى س.دە ميستۋرەگە كيكىلجىڭدى رەتتەۋ باعىتىندا جاساعان جۇمىستارى ءۇشىن العىس بىلدىرگەن.
ءسويتىپ كەزەكتى كەزدەسۋ اياقتالدى. ال كەلىسسوزدەردىڭ كەلەسى راۋندى 2019 جىلدىڭ اقپان ايىندا استانا قالاسىندا وتكىزىلسىن دەگەن شەشىم قابىلداندى.
جاقسىباي سامرات,
«ەگەمەن قازاقستان»
