ءبىز نۇرجان تۋرالى «ەگەمەندە» 2015 جىلى قاڭتار ايىندا «پاتەر العان كۇنى ەلباسىنا حات جازامىن...» دەگەن ماقالامىزدا جازعان ەدىك. وندا ن.ءمۋرساليموۆتىڭ اتا-اناسى رامازان مەن قاۋيانىڭ ءۇي كەزەگىندە 1992 جىلدان بەرى تۇرىپ كەلە جاتقاندارى ايتىلعان-تىن. وبلىس ورتالىعىندا پاتەر جالداپ تۇرعان وتباسى ۇزاق جىل بويى ءۇيىمىز بولسا دەگەن ۇمىتپەن ءومىر ءسۇردى. ءتىپتى تۇرعان ءۇي كەزەكتەرىنىڭ قۇجاتتارى دا وبلىس ورتالىعىنداعى يندۋستريالىق اۋدانى تاراعان كەزدە جوعالىپ كەتىپتى. بىراق وتباسى ۇمىتتەرىن ۇزبەيدى. نەسىبە اكەلەر جاقسى ءبىر كۇننىڭ بولارىنا سەنەدى. پاتەردەن پاتەرگە كوشىپ جۇرسە دە مەرۋەرت, قارلىعاش اتتى ەكى قىز بەن ناريمان, باۋىرجان, نۇرجان ەسىمدى ءۇش ۇلدى دۇنيەگە اكەلدى...
...2007 جىلى ەلباسى نۇرسۇلتان نازارباەۆ جۇمىس ساپارىمەن پاۆلودارعا كەلدى. جۇمىس ساپارىنىڭ سوڭىندا وبلىس ورتالىعىنداعى جاڭادان اشىلعان №10 بالاباقشانى ارالاپ كوردى. ەلباسى بالاباقشاعا كەلگەندە كىشكەنتاي نۇرجان رامازان ۇلى كومپيۋتەر ارقىلى قازاقى ۇعىمدار تىزبەلەرىن جاساپ كورسەتىپ بەردى. سول جولعى ماقالادا ءبىز: «كىشكەنتاي كومپيۋتەرشى بالا نۇرجان ەرجەتتى, وبلىس ورتالىعىنداعى №19 مەكتەپتىڭ 7 سىنىبىندا وقىپ ءجۇر. ەلباسى ريزالىعىن, باتاسىن العان بالا. تالاپتى, زەرەك وقۋشى. قازىر وسى نۇرجان ءوسىپ كەلە جاتقان وتباسى وبلىس ورتالىعىنداعى پاتەر كەزەگىندە 71-ءشى بولىپ تۇر ەكەن. انە-مىنە دەۋمەن, كۇتۋمەن, شەنەۋنىكتەردىڭ ۋادەسىنە سەنۋمەن كەلەدى. ىلعي كەيىن شەگەرىلە بەرگەن عوي. ءۇي كەزەگىنە 1992 جىلدان بەرى تۇرعاننان ساناساق, 20 جىلدان اسىپ كەتىپتى.
«اكە-شەشەمنىڭ تالاي جىل بويى سارىلىپ ازەر جەتكەن 71-ءشى كەزەگى تاعى دا كەيىن شەگەرىلىپ تاستالماسا ەكەن, بيىل پاتەر الساق, قۋانىشىمدى ايتىپ ەلباسىنا حات جازار ەدىم», دەگەن ەدى سوندا نۇرجان.
قازىر مۋساليموۆتەردىڭ كوپبالالى وتباسى وبلىس ورتالىعىنداعى جاڭا سالىنعان ۇيدەگى 3 بولمەلى پاتەردە تۇرىپ جاتىر. «ارينە پاتەر العان كۇنى ەلباسىنا حات جازدىق. «ەگەمەن» گازەتىنە راحمەت! مەنىڭ اتا-انام, مەن جايلى جازدىڭىزدار. بۇل مەنىڭ ومىرىمدەگى ۇمىتىلماس قۋانىشتار عوي! كىشكەنتاي كۇنىمدە كورگەن ەلباسىنىڭ باتاسى ءومىر جولىما جولداما بەرگەندەي. بۇل سۋرەت ارقاشاندا مەنىمەن بىرگە», دەيدى ن.مۋرساليموۆ.
مەكتەپ بىتىرگەن سوڭ ماسكەۋدەگى م.ۆ.لومونوسوۆ اتىنداعى مەملەكەتتىك ۋنيۆەرسيتەتكە وقۋعا تۇسسەم دەيدى ول. ساتتىلىك تىلەيمىز ساعان, نۇرجان!
فاريدا بىقاي,
«ەگەمەن قازاقستان»
پاۆلودار
سۋرەتتە: ەلباسى پاۆلودارعا كەلگەندە. 2007 جىل. كىشكەنتاي نۇرجان مۋرساليموۆ كومپيۋتەردە.
