ماڭگىلىك قاشاندا ءميفتىڭ قورشاۋىندا جۇرەدى. ءميفتىڭ ءوزى – قايشىلىقسىز, تۇراقتى, وزگەرمەيتىن فورما.
ۋاقىت – ماڭگىلىكتىڭ كەزەڭدىك ءومىر ءسۇرۋ قالىبى.
بۇكىلالەمدىك, دۇنيەجۇزىلىك, قالا بەردى, ۇلتتىق ماڭىزى بار ۋاقىت, كەزەڭنەن اسقاندا, ماڭگىلىك سيپاتقا يە بولادى.
1. كەشەگى, جىلىنا ءتورت مەزگىل سالقار كوش تۇسەتىن, ۇشان-تەڭىز شالقار دالا, كوشپەلى جۇرت مارشرۋتى, بۇگىندە كولىك قاپتاعان قارا جولعا اينالدى.
تەگى, اتاق-داڭقى اسقان, ساقارالىق ۇلى دالا ء(تاڭىرى مەن ۇماي انا) اڭىز-ءافساناسىنان (ۆەرتيكالدى لوگيكا) جارالعان, قازاق قونىسى جايلى, ازاتتىق تۋرالى, جاۋگەرشىلىك زاماندا, الاشتى كۇرەسكە شاقىرعان, اسان قايعىدان نىسانباي جىراۋعا دەيىنگى جەكە تولعاۋلار, جاڭا كەزەڭدە زاماناۋي تاريحي ۋاقيعالاردى (تاۋەلسىزدىك جىلدارى) قامتىعان ەپوستىق (قازىرگى قازاق پوەزياسى) داستاندار (گوريزونتالدى لوگيكا) كولەمىنە جەتتى.
تىكەلەي بايلانىستاعى ءاربىر وقشاۋ اڭىز پافوسى, جەكە ءافسانا قاھارمانى تۋرالى فيلوسوفيا كەيىن جۇرتپەن بىرگە, قاتار ءومىر سۇرەتىن حالىقتىق ەپوسقا اينالادى.
2. استانا – پوستمودەرنيستىك (مودەرندىك) ارحيتەكتۋرالىق سانا, ادامزات اقىل-ويى جەتكەن مەجە, وزىق ساۋلەت ونەرى, عىلىمي-تەحنيكالىق دامۋدىڭ, تەحنولوگيالىق تابىستىڭ كورىنىسى.
كۇردەلى كونسترۋكتسيالىق شەشىمدەردىڭ, الدىڭعى قاتارلى, ۇزدىك قۇرىلىستىق-ينجەنەرلىك ويدىڭ جەمىسى.
عىلىمنان جاراتىلعان قالا, فيلوسوفيالىق تولعانىستان تۋعان شاھار.
ءبىزدىڭ ميفولوگيالىق قۋانىشىمىز, اقىل-وي, سانا-سەزىم, تىلسىم-تۇيسىكتىڭ قوسىلعان تۇسى, بار قاھارماندارى باقىتىنا جەتىپ, كۇللى حالقىنىڭ ارمانى ورىندالعان ەرتەگىدەي ەلدى مەكەن.
3. استانادا ايتىلعان ءاربىر ءسوزدىڭ جالپىحالىقتىق سيپاتى, ەلدىك قاسيەتى, ابىز وقىعان دۇعاداي كيەسى بار, كۇشى اسەرىنەن بىلىنەدى, قۋاتى تاۋ قوپارادى, تاس تىلەدى, داۋىسى جەر جارادى.
وي-قيالدان ورنەك سالعان ەلوردا – جارقىن كەلەشەكتىڭ كەسكىن-كەلبەتى, اسىل مۇراتقا تالپىنعان قازاقستان وبرازى, ەسەيگەن ەلدىڭ كەيپى, تاۋەلسىز مەملەكەتتىڭ سيمۆولدىق بەينەسى.
ەلوردا ەلمەن بىرگە جايناپ, ەن دالامەن قاتار قۇلپىرىپ, دامىپ, ءوسىپ- ءونىپ كەلەدى.
باس قالا بويىنان كيىز تۋىرلىقتى قازاقتىڭ قاسيەت-قۇندىلىقتارىن, مىنەز-قۇلقىن كورۋگە بولادى: ءور, ەڭبەكتە بەينەتقور, تاپسىرمادا بەلسەندى, قيالىندا ۇشقىر, بىلىمدە وزات, جۇمىستا وزىق, تاربيەدە ونەگەلى.
ءار الاشقا تۋىس, بار قازاق جۇرتىنا ماقتانىش, ەلدىڭ ەڭسەسىن كوتەرىپ, حالىقتىڭ بويىن تىكتەگەن رۋح.
كورمەگەن كورۋگە اسىعاتىن, كورگەن كەتە المايتىن, كەتكەن ۇمىتا المايتىن قالا.
4.ەرتە تۇرعان قازاق ەلوردانىڭ ۋاقىتىمەن جۇرەدى, كەش ويانعان قازاق استاناعا قاراپ ساعاتىن تۇزەتەدى.
استانا ۋاقىتى – قازاقتىڭ ۋاقىتى. بار قازاقستان جۇرتشىلىعى قايدا جۇرسە دە, قايدا ءومىر سۇرسە دە, ءانۇراندى شىرقاپ, تەگىس قاتار جاتىپ, تۇگەل بىرگە ويانادى.
استانا ساعاتى ازات شاقتىڭ التىن مەزگىلىن كورسەتەدى.
ەلوردا ءتورت تاراپتىڭ باسىن قوسقان جول تورابى, جان-جاققا جول سىلتەيتىن جولايىرىق. شارتاراپتىڭ قيىلىسى. قازاق ساقاراسى, الاش ايماقتارى, ەلدى مەكەندەردەن شىققان كوشتىڭ ءبارى تەگىس استاناعا اپارادى.
5.قازاق دەپ سوققان الاش جۇرەگى الىپ-ۇشىپ استانانىڭ الىپ جۇرەگىمەن بىرگە, قاتەلەسپەي, جاڭىلماي, اداسپاي, قاتار سوعىپ تۇرادى.
باعى جانىپ, بايراق تاعىپ, بار قازاق ۇكىلەگەن ازات كۇننىڭ التىن تاڭى اتقالى باقىتتىڭ بار ەكەنى الاش ەسىنە ءتۇستى.
ازاپتىڭ قورلىق ءتۇنى ۇمىتىلدى.
جازيرالى گۇل-بايشەشەك جەرىندە, جاراسىپ گۇلدەستە كوشەت لەگىندە, ەرتەگى ەلىندەي جۇرەمىز شالقىپ, جۇرگەندە ەلوردا كوشەلەرىندە.
باس شاھار. ەلباسىنىڭ ءتول پەرزەنتى.
ديدار امانتاي,
جازۋشى
