بۇرىن ءتۇرلى ءوندىرىس ورىندارىنا جازعى-قىسقى ۋاقىتتا ءىس-تاجىريبەدەن وتۋگە سابىلاتىن جاستار ەندى ارنايى اگرارلى ايماقتان الىستامايدى. زاماناۋي تەحنيكالار مەن جىلدىڭ ءتورت مەزگىلىنە ءونىم بەرەتىن جىلىجاي, وسىمدىك قورى باي تۇقىمباق, ءتورت ت ۇلىككە ارنالعان ارنايى زەرتحانا, ۆەتەرينارلىق ەمحانا, جەمىس ساقتايتىن قويما, بيوگۋمۋس ءبارى 5,5 گەكتار اۋماقتى قۇرايتىن وقۋ-وندىرىستىك بازاسىندا شوعىرلانعان. مۇنداعى تىرلىكتىڭ كوبى دەرلىك ارنايى تەحنيكا كومەگىمەن اتقارىلادى. جاس ىزدەنۋشىگە قالعانى جاتپاي-تۇرماي ءبىلىم الۋ, ءوزىن-ءوزى جەتىلدىرۋ عانا.
زامان تالابىنا ساي جابدىقتالىپ, جاس ۇرپاققا كاسىپتىك ءبىلىم بەرىپ كەلە جاتقان وقۋ ورداسىنا تۇركىستان وبلىسىنا ىسساپارمەن كەلگەن ءبىلىم جانە عىلىم مينيسترلىگىنىڭ وكىلدەرى ارنايى ات باسىن بۇرىپ, كوللەدج ۇجىمىنىڭ جەتىستىكتەرىمەن تانىستى.
ساپار بارىسىندا ءبىلىم جانە عىلىم ءمينيسترىنىڭ كەڭەسشىسى مايراش تايكەنوۆا, بعم تەحنيكالىق جانە كاسىپتىك ءبىلىم بەرۋ دەپارتامەنتى ديرەكتورىنىڭ ورىنباسارى عاليا داۋلەتوۆا, بعم «اقپاراتتىق-تالداۋ ورتالىعى» اق-نىڭ باق جانە حالىقپەن جۇمىس جۇرگىزۋ بويىنشا دەپارتامەنت ديرەكتورى ەلدار تۇلەكوۆ ءبىلىم الۋشىلاردىڭ بويىندا ۇلتتىق قۇندىلىقتاردى قالىپتاستىرۋ ماقساتىندا جابدىقتالعان «رۋحاني جاڭعىرۋ» كورمەسىمەن, «Start-APP» بيزنەس-ينكۋباتورىمەن تانىسىپ, كوللەدجدىڭ كوۆوركينگ ورتالىعىندا بەلسەندى جاستارمەن كەزدەستى.
«IT قۇزىرەتتىلىك مىندەتتى تۇردە بارلىق ماماندىققا ەنۋ كەرەك. بۇل – ەڭ ءبىرىنشى وقۋ باعدارلامالارىنىڭ مازمۇنىنا كىرەتىن دۇنيە. بىلتىر ماماندىقتاردىڭ قاتارىنا «اقپاراتتىق قاۋىپسىزدىك» دەگەن ماماندىقتى ەنگىزدىك. ءبىز وسى جۇيەمەن كاسىپتىك جانە تەحنيكالىق باعىتتا كادر دايىندايمىز. سوندىقتان مۇعالىمدەردىڭ بىلىكتىلىگىن ارتتىراتىن وقۋلىق باعدارلامالارىنىڭ مازمۇنىنا IT قۇزىرەتتىلىكتى ەنگىزىپ وتىرمىز», دەيدى بعم تەحنيكالىق جانە كاسىپتىك ءبىلىم بەرۋ دەپارتامەنتى ديرەكتورىنىڭ ورىنباسارى ع.داۋلەتوۆا.
جۋىردا تۇركىستان جوعارى اگرارلىق كوللەدجىندە «ستۋدەنتتەرگە قىزمەت كورسەتۋ ورتالىعى» اشىلعان بولاتىن. ءىس-ساپار بارىسىندا مينيسترلىك وكىلدەرى 40-تان اسا مەملەكەتتىك قىزمەت ءتۇرىن ۇسىنا الاتىن ورتالىقتىڭ جۇمىسىمەن تانىستى.
كوللەدج وقىتۋشىلارى مەن كامەلەت جاسىنا تولعان ءبىلىم الۋشىلار جەكە كۋالىككە ارنالعان كارترەيدەر ارقىلى ەتسك (ەلەكتروندى كىلت) پورتالىنا كىرىپ, وزدەرىنە قاجەتتى قۇجات تۇرلەرىن الاتىن بولادى. وسىلايشا ستۋدەنتتەر «ەلەكتروندى ۇكىمەت» پورتالى ارقىلى كورسەتىلەتىن مەملەكەتتىك قىزمەتتەردى الۋ مۇمكىندىگىنە قول جەتكىزىپ وتىر. ماسەلەن, بۇگىنگى تاڭدا ستۋدەنتتەر ءۇشىن «AGRAR-APP» ءموبيلدى قوسىمشاسى جۇمىس ىستەيدى. ياعني, ستۋدەنتتەر ءموبيلدى قوسىمشا ارقىلى ساباق كەستەسىمەن, وزدەرىنىڭ اعىمداعى جانە قوسىمشا باعالارىمەن تانىسا الادى. ىڭعايلى ءارى قولجەتىمدى ءموبيلدى قوسىمشا ءبىلىم الۋشىلاردىڭ انىقتامالار مەن باسقا قۇجاتتاردى الۋىنا مۇمكىندىك تۋدىرىپ وتىر.
ءبىلىم مەكەمەسى باسشىسىنىڭ ايتۋىنشا, ورتالىقتىڭ جۇمىسىن ءتيىمدى جۇرگىزۋ ءۇشىن كوللەدج ماماندارى حقكو تاعىلىمدامادان ءوتىپ, ارنايى سەرتيفيكاتتارعا يە بولعان. سونداي-اق ورتالىقتىڭ اشىلۋىمەن 2000-عا جۋىق ستۋدەنتتىڭ ۋاقىتىن ۇنەمدەۋگە جول اشىلدى. «تسيفرلى قازاقستان» باعدارلاماسى نەگىزىندە ستۋدەنتتەردىڭ الاڭسىز ءبىلىم الۋىنا مۇمكىندىك بەرەتىن «SMART-كوللەدج» باعدارلاماسى ەنگىزىلگەن.
بۇعان قوسا, «وركەنيەت» باستاۋىش ۇيىمىنىڭ قولداۋىمەن ستۋدەنتتەر بۇل ورتالىقتا تاسساي تۇرعىن الابىنىڭ تۇرعىندارىنا قىزمەت كورسەتەتىن بولادى. سوندىقتان بۇل باستامانى وبلىستىڭ بارلىق وقۋ ورىندارىندا ەنگىزسە دە ارتىق بولمايدى.
بۇگىندە اگرارلىق كوللەدج ەڭبەك نارىعىنا «يممۋنيتەتى» جوعارى ماماندار دايارلاۋ ءۇشىن شەتەلدىك بىرنەشە سەرىكتەس كومپانيالارمەن بىرلەسە وتىرىپ, جاڭا ءبىلىم بەرۋ باعدارلامالارىن ەنگىزۋدى قولعا العان. كوللەدج باسشىسى گاۋحار بەكبەرگەنوۆا شەتەلدىك ۇزدىك كوللەدجدەردىڭ وقۋ تاجىريبەسىن باستى باعدارعا العانىن ايتادى. بۇل ءۇشىن وقۋ ورداسىنىڭ ماتەريالدىق-تەحنيكالىق بازاسى زامان قاجەتتىلىگىنە ساي تولىق جابدىقتالعان. اتالعان ءبىلىم ورداسى 2016 جىلدان باستاپ ءۇش تىلدە وقىتۋ جۇيەسىنە كوشكەن.
كوللەدج مۇعالىمدەرى اعىلشىن ءتىلىن مەڭگەرۋ ءۇشىن ءار وقۋ جىلىنىڭ سوڭىنا قاراي ارنايى كۋرستان وتەدى ەكەن. ءبىلىمىن جەتىلدىرىپ بولعان سوڭ ولار الماتى جانە استانا قالالارىندا سىناق تاپسىرادى. 15 ءتۇرلى كاسىپ يەسىن وقىتىپ جاتقان تۇركىستان اگرارلىق كوللەدجى جانىنان اۋىسپالى ەگىستىك تانابى, ءجۇزىم القابى, ماشينا-تراكتور ستانساسىنىڭ بازاسى جاساقتالعان.
ءىسساپار بارىسىندا مينيسترلىك وكىلدەرى ماقتاۋلى كوللەدجدىڭ وقۋ وندىرىستىك بازاسىنىڭ جۇمىسىمەن تولىقتاي تانىسىپ, وتاندىق اگروسەكتورعا بىلىكتى كادر دايىندايتىن ۇجىمداعى اتقارىلىپ جاتقان جۇمىستارعا وڭ باعا بەردى.
نۇرشات توكەن,
«ەگەمەن قازاقستان»
تۇركىستان وبلىسى
