بۇگىنگى كۇننەن سوناۋ ۇلى جىبەك جولىنا دەيىنگى, التىن عاسىردان عۇن مادەنيەتىنە دەيىنگى, قىزعالداقتاردان تۇركى مادەنيەتىنە دەيىنگى ەلەمەنتتەردى ۇلى دالادان, ءوز باستاۋىن الاتىن گەوگرافيالىق نۇكتەسىنەن ءبولىپ قاراۋعا بولمايدى. اۆتور ايتىپ وتكەندەي, مۇنىڭ بارلىعىنىڭ قازاق حالقىنىڭ تاريحىنا ىقپالىن جەتە زەرتتەپ, وسىناۋ بىرەگەي مۇرانى كەلەر ۇرپاققا اماناتتاۋ قاجەت. بۇل – مادەني بايلىقتىڭ ماڭىزدى بولىگى.
جالپى, كەز كەلگەن ىستە حالىقتىڭ ءتول مادەنيەتى مەن وزىندىك تاريحى ەسكەرىلۋى قۇبا-قۇپ. وسىعان وراي, «مادەني مۇرا» باعدارلاماسى وسى تاريحي تاجىريبەنى ساقتاۋعا جانە ونى جان-جاقتى زەردەلەۋگە باعىتتالدى.
ءوز تاۋەلسىزدىگىن العاننان بەرى قازاقستان ۇلكەن بەلەستەردەن استى, الدا ءالى تالاي باعىندىرار اسۋلار بار.
وسى ورايدا يسپان ءتىلدى نەمەسە لاتىن امەريكاسى حالىقتارىنا الداعى ۋاقىتتا ۇلى دالانىڭ, تۇركى حالىقتارىنىڭ مادەنيەتىن جانە ولاردىڭ الەمدىك مادەني دامۋعا قوسقان ۇلەسىن كەڭىرەك تانىتۋ قاجەت دەپ ويلايمىن.
ەكسپەديتسيا مەن فولكلورلىق پوەتيكا تۇركى مادەنيەتى ءۇشىن قانشالىقتى ماڭىزدى بولسا, ءبىزدىڭ مادەنيەتىمىز ءۇشىن دە سونشالىقتى قۇندى. وسى ماسەلە ءبىزدىڭ ارامىزدا مادەني كوپىر بولۋى مۇمكىن.
شامامەن 600 ميلليون ادام يسپان ءتىلىن انا تىلىمەن بىردەي قولدانادى, ال تاعى 60 ميلليونى زەردەلەۋ ۇستىندە. مۇنىڭ تۇركى مادەنيەتى مەن تاريحىن تانۋعا قىزىعۋشىلىعى زور اۋقىمدى اۋديتوريا ەكەنى ايتپاسا دا تۇسىنىكتى.
جاقىن بولاشاقتا ءبىز بۇل ماسەلەلەر تۋرالى يسپان تىلىندە دە ەگجەي-تەگجەيلى مالىمەتتەر الا الامىز دەپ ويلايمىن. اكادەميالىق جانە ۋنيۆەرسيتەتتىك مەكەمەلەر قازاق جانە تۇركى مادەنيەتىن شەتەلدەرگە كەڭىنەن تانىتۋدا, ىلگەرىلەتۋدە ماڭىزدى ءرول اتقارادى دەپ ۇمىتتەنەمىن. بۇل رەتتە سىزدەر ءۇشىن كورسەتۋگە تۇراتىن, ال ءبىز ءۇشىن ۇيرەنۋگە تۇراتىن مۇرالار جەتكىلىكتى ەكەنى انىق.
پاۋلو بوتتا,
حالىقارالىق قاتىناستار سالاسىنداعى PhD دوكتور, پروفەسسور (ارگەنتينا)
