اياگوز قالاسىنداعى كەزدەسۋگە اقساقالدار, مەكتەپ ديرەكتورلارى, ۇستازدار مەن سپورتشىلار, دارىگەرلەر قاتىستى. كەزدەسۋدى اياگوز اۋدانى اكىمىنىڭ ورىنباسارى بولات سۇلەيمەنوۆ اشىپ, اۋدان تۇرعىندارى گازەت-جۋرنالدارعا جازىلۋدا بەلسەندى ەكەندىگىن اتاپ ءوتتى. «قازاق باسىلىمدارىن ءبولىپ-جارماي مۇمكىندىگىنشە بارىنە جازىلۋعا تىرىسامىز. ويتكەنى, گازەت ءوزىمىز ءۇشىن كەرەك. اۋدانىمىزدا ەل گازەتى - «ەگەمەن قازاقستاننىڭ» وقىرماندارى كوپ. ەل قىزىعا وقيدى. گازەت كوكتەمگى سۋ تاسقىنى كەزىندە جۇرتتى دەر كەزىندە اقپاراتتاندىرىپ وتىردى. ول ءۇشىن ارينە العىسىمىزدى بىلدىرەمىز», - دەدى ول.
مۇعالىمدى قيناماي-اق مارتەبەسىن كوتەرۋگە بولماي ما؟
كەزدەسۋدە ءسوز العان مۇقان بالابەكوۆ اقساقال 48 جىل مەكتەپتە جۇمىس ىستەگەنىن, ءبىلىم سالاسىنا قاتىستى جاڭالىقتارعا ءاردايىم ەلەڭدەپ وتىراتىنىن, گازەتتە كەلەسى جىلى قابىلداناتىن «پەداگوگ مارتەبەسى تۋرالى» زاڭعا بايلانىستى ماقالالاردى وقىپ جۇرەتىنىن ايتىپ, باسىلىم بەتىندە مۇعالىمدەر جايىندا ۇنەمى, دۇركىن-دۇركىن جازساڭىزدار دەگەن تىلەگىن جەتكىزدى. بۇرىنعى پەداگوگ سونىمەن قاتار 6 قاراشادا «ەگەمەندە» جارىق كورگەن «شاھيد كەشتى شوقانىڭ» اتتى ماقالاداعى داڭقتى تۇلعانىڭ ولىمىنە قاتىستى دەرەكتەر ءوزىن ءبىر جاعى قىزىقتىرعانىن, ەكىنشى جاعىنان ءارتۇرلى ويعا قالدىرعانىنا توقتالىپ, «الداعى ۋاقىتتا وسى تاقىرىپتا جۋرناليستىك زەرتتەۋلەر بولا ما؟» دەپ وزىمىزگە سۇراق قويدى. ءسوز اراسىندا اياگوزدە قىسقى سپورتتىڭ كەشەۋىلدەپ جاتقانىن دا تىلگە تيەك ەتتى. اۋدان اكىمىنىڭ ورىنباسارى اقساقالعا سول جەردە بىردەن جاۋاپ بەرىپ, قازىر اۋداندا قىسقى سپورتتى دامىتۋ قولعا الىنىپ جاتقانىن, مەكتەپتەرگە شاڭعىلار ساتىپ الىنعانىن, قالادا حوككەي ءمودۋلىن سالۋ ءۇشىن جوبالىق-سمەتالىق قۇجات ازىرلەنگەنىن, ەلباسى جولداۋى اياسىندا ءۇش مىڭعا جۋىق حالقى بار اقتوعايعا دا سپورت ءمودۋلىن سالۋ جونىندە مينيسترلىككە ۇسىنىس جىبەرىلگەنىن ايتتى.
قازاق باسىلىمدارىن جىبەرمەي وقيتىن كوكەناي اقساقال: «گازەتتە دۇنيەدەن وتكەن تۇلعالار جايىندا كوبىرەك جازىلسا. بيىل تارباعاتاي اتتى مەملەكەتتىك ساياباق قۇرىلدى. بۇعان اياگوز اۋدانىنىڭ دا كەيبىر جەرلەرى كىرەدى. مەكتەپتە بالالارعا وڭىرىمىزدە وسەتىن وسىمدىكتەر, مەكەندەيتىن جانۋارلار مەن اڭدار تۋرالى وقىتساق, بولماسا, سونى گەرباري ارقىلى كورسەتسەك» دەپ ءوز ۇسىنىسىن ءبىلدىردى.
اياگوز قالاسىنداعى №9 مەكتەپتىڭ ديرەكتورى قارلىعاش وزبەكوۆا ءسوزىن كوپ مۇعالىمدەردىڭ ويىندا جۇرگەن ءبىلىم سالاسىنداعى كەلەڭسىزدىكتەردەن باستادى.
«كەيدە وسىنداعى ارىپتەستەرىمىزبەن باس قوسىپ, وقۋلىقتاردا كەتىپ جاتقان قاتەلەردى تالقىلايمىز. سوسىن وتىرىپ, ءتيىستى ۇسىنىستارىمىزدى جازامىز. سول ۇسىنىستارىمىزدى بىرەر مارتە ءبىلىم جانە عىلىم مينيسترلىگىنە جىبەردىك. بىراق ۇسىنىستارىمىز ەسكەرىلمەدى. «پەداگوگ مارتەبەسى تۋرالى» زاڭعا بايلانىستى دا ۇسىنىس-پىكىرلەرىمىز بار. زاڭنىڭ جوباسىن كوردىك. قولدايتىن دۇنيەلەر وتە كوپ ەكەن. سونىڭ ءبىرى - ساناتتاردى الىپ تاستاۋ جونىندەگى ۇسىنىس. شىنىمەن دە, بۇل – وزەكتى ماسەلە. قازىر بىرنەشە جىلدان بەرى جۇمىس ىستەپ كەلە جاتقان مۇعالىمدەردى جاستار وراپ الىپ كەتىپ جاتىر. ويتكەنى, ولار جاڭا تەحنولوگيالاردى مەڭگەرگەن. بۇگىندە مەكتەپتەردەگى مىقتى-مىقتى دەگەن ماتەماتيكتەردىڭ تەستتەردەن وتە الماي جاتقانىن ەستىپ جاتىرمىز. بۇل جۇيكەگە سالماق تۇسىرەدى. مۇعالىمدەرگە وسىنداي تەستتەردىڭ قاجەتى قانشا؟ مۇعالىمدى قيناماي-اق مارتەبەسىن كوتەرۋگە بولماي ما؟ ءوزىم دە مەكتەپ ديرەكتورىمىن عوي. الاتىنىمىز – 93 مىڭ تەڭگە.
موينىمىزدا جاۋاپكەرشىلىك كوپ, ءزىل باتپان. ەندى ديرەكتورلار دا تەست تاپسىرادى دەپ جاتىر. ساناتقا قاتىستى ايتارىم, مۇعالىمدەر بەس جىل سايىن ساناتىن كوتەرمەي-اق دايىنداپ شىعارعان وقۋشىلارىنىڭ دەڭگەيىنە قاراي ولاردىڭ جالاقىلارىنا نەگە ۇستەماقى قوسىپ وتىرماسقا؟! ماسەلەن, وقۋشىسى اۋداندىق جارىستا توپ جارسا جالاقىسىنا 1 جىل بويى اي سايىن 10, ال ەگەر وبلىسقا شىعارسا 30 مىڭ تەڭگەدەن قوسىلىپ وتىرسا, مۇعالىم ىنتالانار ەدى. جۇمىسقا قۇلشىنىسى ارتار ەدى», دەپ ءسوزىن ۇسىنىسپەن اياقتاعان ۇستاز قازىر «ەگەمەن قازاقستان» گازەتىندە لاتىن قارپىندە جاريالانىپ جاتقان ماقالالاردىڭ جاڭا ءالىپبيدى ۇيرەنەم دەۋشىلەرگە سەپ بولىپ جۇرگەنىن ايتتى. «وقۋشىلار, قاراپايىم تۇرعىندار لاتىن قارپىن قالاي ۇيرەنەدى دەگەن ىشتەي قاۋپىم بولۋشى ەدى. قازىر ءبىز دە ۇيرەنىپ جاتىرمىز. سىزدەردىڭ باستاعان جۇمىستارىڭىز قۋانتارلىق جاعداي», - دەدى مەكتەپ ديرەكتورى.
اياگوزدە جارىق كورەتىن ء«مولدىر سانا» گازەتىنىڭ باس رەداكتورى, بەلگىلى جۋرناليست باقىتومىر شالعىنباي ءوز سوزىندە جاقىندا «ەگەمەن قازاقستاندا» جاريالانعان ەلباسىنىڭ « ۇلى دالانىڭ جەتى قىرى» ماقالاسىن تۇششىنا وقىپ شىققانىن ايتتى. «حالىقتىڭ ساناسىن كوتەرمەي ەشتەڭە بولمايدى. ويتپەسەڭ, التىننىڭ ۇستىندە وتىرساڭ دا اش بولاسىڭ. ماسەلە – قازاقتىڭ رۋحىن كوتەرۋدە. «ەگەمەندە» شىعاتىن ماقالالاردى ۇنەمى وقىپ جۇرەمىز. ۇلگى العانبىز, ءالى دە ۇلگى الا بەرەتىنىمىز انىق. مۇعالىمدەردىڭ ماسەلەسىن كوتەرىپ جاتىرسىزدار. ءالى دە كوتەرە بەرسەڭىزدەر دەگەن تىلەگىمىز بار. اسىرەسە اۋىلداعى, شاعىن قالالارداعى مۇعالىمدەر تۋرالى كوبىرەك جازساڭىزدار, ماقالاسىن باسساڭىزدار جاقسى بولار ەدى», - دەدى. اۋداندىق «اياگوز جاڭالىقتارى» گازەتىنىڭ باس رەداكتورى, اقىن ەرمەك دايىرباەۆ «ەگەمەندە» ەلىمىزگە, وبلىسقا قاتىستى جاعىمدى جاڭالىقتارمەن قاتار ۇلكەن پروبلەمالىق ماقالالارعا دا ورىن بەرىلەتىنىن اتاپ ءوتىپ: «گازەتكە جازىلۋ ءوزىمىز ءۇشىن كەرەك, قازاق گازەتى قازاققا عانا كەرەك. رۋحانياتىمىزدى كوتەرۋ ءۇشىن قاجەت» دەپ جۇرتشىلىقتى قازاق باسىلىمدارىنا جازىلۋعا شاقىردى.
ۇرجارعا ۇلكەن سپورت كەشەنى كەرەك
«ەگەمەن قازاقستان» گازەتىنە ەڭ كوپ جازىلاتىن اۋدان – ءۇرجاردا وتكەن كەزدەسۋگە مۇعالىمدەر مەن اقساقالدار, جاستار, سپورتشىلار قاتىستى. وقىرماندارمەن جۇزدەسۋ شاراسىن اشقان ءۇرجار اۋدانى اكىمىنىڭ ورىنباسارى سەرىك سادۋاقاسوۆ اۋدان قازاق گازەتتەرىنىڭ بارىنە جازىلاتىنىنا توقتالىپ, مەملەكەت باسشىسىنىڭ « ۇلى دالانىڭ جەتى قىرى» ماقالاسىنىڭ ءمان-ماڭىزىن تىلگە تيەك ەتتى. «ەلباسىنىڭ ماقالاسى ءبىزدىڭ اۋدانعا دا قاتىستى دەپ ويلايمىز. بىرنەشە جىل بۇرىن اۋدان اۋماعىنان ء«ۇرجار حانشايىمى» تابىلدى. المانىڭ اتاسى – سيۆەرس الماسى دا ءبىزدىڭ تارباعاتاي تاۋىندا وسەدى. ۇلتتىق ونەرىمىز – بۇركىتشىلىكتى ناسيحاتتاپ, وبلىسىمىزدا قىران ۇستاپ وتىرعان جالعىز اۋدان – ءۇرجار. ات قۇلاعىندا ويناعان جىگىتتەرىمىز دە جەتەرلىك», - دەدى اۋدان اكىمىنىڭ ورىنباسارى.
كەزدەسۋدە ءسوز العان ابىلاي حان اتىنداعى مەكتەپتىڭ دەنە شىنىقتىرۋ ءپانىنىڭ مۇعالىمى سەرىك جەكسەنباەۆ ءۇرجار اۋدانىنىڭ سپورتشىلارىنىڭ جەتىستىكتەرىن ءسوز ەتسە, وسىنداعى سپورت مەكتەبىنىڭ مۇعالىمى ارمان جۇمابەكوۆ اۋداندا سپورت زالدارى جەتىسپەيتىنىن جەتكىزدى. جاتتىقتىرۋشىنىڭ بۇل ءسوزىن اۋداندىق سپورت ءبولىمىنىڭ باسشىسى سارسەنحان قابدولدانوۆ تا قۇپتايدى. «سپورت زالدارى جەتپەگەننەن كەيىن جاتتىقتىرۋشىلار امالسىزدان وزدەرى جاتتىقتىراتىن بالالاردى مەكتەپتەرگە اپارۋعا ءماجبۇر. سوندىقتان شالقار جولامانوۆ, المات كەبىسباەۆ, ەرلان سەرىكجانوۆ سىندى بالۋانداردى تۇلەتكەن, وكسانا ياتسكايا, ەردوس احماديەۆ, دياس كەنەشوۆ سەكىلدى شاڭعى شەبەرلەرىن شىعارعان اۋدانعا ۇلكەن سپورت كەشەنى سالىنسا دەگەن تىلەگىمىز بار. مۇنى سپورت جانە مادەنيەت مينيسترلىگىنە ايتساق: ءبىر وليمپيادا جۇلدەگەرى شىعۋ كەرەك دەيدى. وليمپيادا جۇلدەگەرىن قاشانعى كۇتىپ وتىرامىز؟» دەيدى سپورت ءبولىمىنىڭ باسشىسى.
«ازامات قاسىم,
«ەگەمەن قازاقستان»
شىعىس قازاقستان وبلىسى
