« ۇلى دالا رۋحى» كورمەسى كوشپەندىلەر مادەنيەتىنىڭ, قازاقتىڭ تۇرمىس ءداستۇرى, ۇلتتىق ات-سپورتتىق ويىندارى, باي ادەپ-عۇرىپتارىنىڭ بىرەگەي ەرەكشەلىگىن كورسەتەدى. ول قازىرگى زامانعى تۇركىتىلدەس ەلدەردىڭ بەينەلەۋ ونەرى, وتكەنگە, تاريحقا, ونىڭ اۋماعىندا بولعان ەجەلگى وركەنيەتتەرگە, قازىرگى زامانعى ادامزات پروبلەمالارىن رۋحاني ىزدەنىستەر ارقىلى تانىپ بىلۋگە جەتەلەيدى.
تۇرىك كورەرمەندەرى وتاندىق ەۆگەني سيدوركين, ءابدىراشيت سىدىحانوۆ, دۋلات اليەۆ, عاني بايانوۆ, باحىت باپيشەۆ سىندى ونەر شەبەرلەرىنىڭ, سونداي-اق مارات بەكەەۆ, شاميل گۋليەۆ, نەللي بۋبە, اسقار ەسداۋلەت, الماگۇل مەڭلىباەۆا, اندرەي نودا, گۇلجامال تاگەنوۆا, الپىسباي قازىعۇلوۆ جانە ۆياچەسلاۆ ليۋي-كو سياقتى زاماناۋي سۋرەتشىلەردىڭ شىعارماشىلىعىمەن تانىسا الادى. كورمە كوللەكتسياسى 32 كەسكىندەمەلىك جانە گرافيكالىق تۋىندىنى قامتىعان.
مۋزەي ديرەكتورى, پروفەسسور گۇلميرا شالاباەۆا اتاپ وتكەندەي: «كورمە قازاقستاننىڭ زاماناۋي ونەرىنىڭ كەڭ ستيليستيكالىق ارتۇرلىلىگىن ۇلتتىق بوياۋى مەن وزىندىك ەرەكشەلىگىن ايقىن كورسەتە وتىرىپ, كورنەكى تۇردە ۇسىنادى. ءا. قاستەەۆ اتىنداعى ونەر مۋزەيى شەتەلدىك كورمەلەردى ءار ءتۇرلى ەلدەردە ۇيىمداستىرۋ ارقىلى, قازاق ونەرىن حالىقارالىق دەڭگەيگە كوتەرىپ, الەم حالىقتارىن ءتول مادەنيەتىمىز, تاريحىمىز بەن بەينەلەۋ ونەرىمىزدىڭ تەرەڭىنە ۇڭىلۋگە شاقىرادى».
ەلباسى نۇرسۇلتان نازارباەۆ « ۇلى دالانىڭ جەتى قىرى» ماقالاسىندا: «قازاقستان – كۇللى تۇركى حالىقتارىنىڭ قاسيەتتى «قارا شاڭىراعى». بۇگىنگى قازاقتىڭ سايىن دالاسىنان الەمنىڭ ءار تۇكپىرىنە تاراعان تۇركى تەكتەس تايپالار مەن حالىقتار باسقا ەلدەر مەن وڭىرلەردىڭ تاريحي ۇدەرىستەرىنە ەلەۋلى ۇلەس قوستى» دەگەن بولاتىن. بۇل جولدار ءتۇبى ءبىر تۇركى حالىقتارىنا ورتاق مادەني قۇندىلىقتاردىڭ قاينار بۇلاعى تىم ارىدە جاتقانىن اڭعارتسا كەرەك. ايگىلى وسمان يمپەرياسىنىڭ العاشقى استاناسى سانالاتىن بۋرسا تورىندەگى ايتۋلى كورمە باۋىرلاس ەلدەردىڭ ونەرى مەن مادەنيەتىن ودان ءارى جاقىنداستىرا تۇسەتىن يگى باستاما دەپ ايتۋىمىزعا بولادى.
ارمان وكتيابر,
«ەگەمەن قازاقستان»
