«قازاقستان تاۋەلسىزدىك العالى بەرى بۇكىل سالالاردا كوپ جەتىستىكتەرگە قول جەتكىزدى. سولاردىڭ ىشىندەگى ماڭىزى وتە زور ءۇش ستراتەگيالىق باستاما تۋرالى ايتىپ بەرەيىن. تاۋەلسىزدىك جىلدارىندا قابىلدانعان ستراتەگيالىق ماڭىزى زور باستامالاردىڭ ءبىرى – ەلباسىنىڭ تىكەلەي تاپسىرماسىمەن قۇرىلعان «بولاشاق» باعدارلاماسى», دەدى م.اشىمباەۆ NurOtan Talks الاڭى بارىسىندا.
پارتيا توراعاسىنىڭ ءبىرىنشى ورىنباسارىنىڭ ايتۋىنشا, «بولاشاق» ستيپەندياسى – پرەزيدەنت ن.نازارباەۆتىڭ ەل كەلەشەگىنە سالعان ينۆەستيتسياسى.
«25 جىلدىڭ ىشىندە 13 مىڭنان استام قازاقستان ازاماتى شەتەلدىڭ ەڭ مىقتى ۋنيۆەرسيتەتتەرىندە ءبىلىم الىپ, ەلگە ورالىپ, قىزمەت ەتىپ ءجۇر. بۇل باستامانى ينۆەستيتسيا رەتىندە قارايمىز. ويتكەنى ونىڭ جاقسىلىعى مەن ناتيجەسى ۇزاق مەرزىم ىشىندە عانا كورىنەدى», دەدى «نۇر وتان» پارتياسى توراعاسىنىڭ ءبىرىنشى ورىنباسارى.
م.اشىمباەۆتىڭ سوزىنە قاراعاندا, «بولاشاق» باعدارلاماسى 25 جىلدان كەيىن عانا ءوز جەمىسىن بەرە باستادى. سونىڭ ناتيجەسىندە ستيپەنديا تۇلەكتەرىنىڭ الدى بۇگىندە مينيستر, اكىم لاۋازىمىن اتقارىپ, ەلگە قىزمەت اتقارىپ كەلەدى. سونداي-اق ول «بولاشاق» ستيپەندياسىنىڭ تۇلەكتەرى سانى كەلەشەكتە كوبەيەتىنىنە سەنىم ءبىلدىردى.
«قازىرگى تاڭدا الەم ءتورتىنشى رەۆوليۋتسيالىق داۋىردە ءومىر ءسۇرىپ جاتىر. بۇل كەزەڭنىڭ ەرەكشەلىگى – مەملەكەتتەردىڭ نەگىزگى بايلىعى شيكىزاتى مەن مينەرالدى رەسۋرستارى ەمەس, سول ەلدىڭ ازاماتتارى. سوندىقتان «بولاشاق» باعدارلاماسى ەلدىڭ كەلەشەگىنە جۇمىس ىستەيتىن ەلباسىنىڭ ەڭ ۇلكەن باعدارلامارىنىڭ ءبىرى دەپ ايتۋعا تولىق نەگىز بار», دەدى م.اشىمباەۆ.
ايتا كەتۋ كەرەك, استانادا «نۇر وتان» پارتياسىنىڭ ۇيىمداستىرۋىمەن NurOtan Talks الاڭى ءوتىپ جاتىر. جيىنعا پارتيا توراعاسىنىڭ ءبىرىنشى ورىنباسارى ماۋلەن اشىمباەۆ, حالىقارالىق تۇركى اكادەمياسىنىڭ توراعاسى دارحان قىدىرالى, «مەيىرىم» قايىرىمدىلىق قورىنىڭ ديرەكتورى ارۋجان ساين, «ۇلتتىق عىلىمي كارديوحيرۋرگيا ورتالىعى» اق باسقارما توراعاسى يۋري پيا قاتىسۋدا.
اباي اسانكەلدى ۇلى,
«ەگەمەن قازاقستان»
