ءبىر قىزىعى بۇل شارانى قازاقستان رەسپۋبليكاسى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ باتىس قازاقستان وبلىسى بويىنشا دەپارتامەنتى ۇيىمداستىرىپ وتىر. «ويتكەنى م.بايدجيەۆتىڭ قالامىنان شىققان بۇل قويىلىم سيۋجەتى قوعامدا سىبايلاس جەمقورلىققا قارسى مادەنيەتتى قالىپتاستىرۋعا جانە زاڭ شەڭبەرىندە عانا ەمەس, ءمورالدى تۇرعىدا جەمقورلىقتىڭ شىنايى كەلبەتىن اشۋعا باعىتتالعان» دەيدى دەپارتامەنت باسشىسى, ادەپ جونىندەگى كەڭەس توراعاسى ب.يساقوۆ. سوندىقتان دا قويىلىم الدىندا بولات يساقوۆ ەلباسىنىڭ «رۋحاني جاڭعىرۋ» باعدارلاماسىن ىسكە اسىرۋ شەڭبەرىندە اگەنتتىك جۇزەگە اسىرىپ جاتقان «وزگەرىستەردى وزىڭنەن باستا» كىشى باعدارلاماسىنىڭ جانە « ۇلى دالانىڭ جەتى قىرى» اتتى ماقالاسىنىڭ ماڭىزدىلىعى جايلى ايتىپ, مەملەكەتتىك قىزمەتشىلەردى مادەني ءىس-شارالارعا بەلسەندى قاتىسۋعا شاقىردى.
كۇلكىسى مەن كۇيىنىشى قاتار ءتۇسىپ جاتاتىن قويىلىمدا ومىردەگى وقيعالار كورىنىس تاپقان. قاراپايىم مەكتەپ مۇعالىمى كۇرىشبەك ۇلگەرىمى ناشار وقۋشىعا كوتەرىڭكى باعا قويۋ ءۇشىن پارا الۋدان باس تارتسا, سپەكتاكلدىڭ فينالىندا ادال ۇستازعا ونىڭ ەڭ جاقىن جاندارى, وتباسى قارسى شىعىپ, قىلمىسقا تارتپاق بولادى. قازىرگى قازاق قوعامىندا سىبايلاس جەمقورلىققا قارسى شىعۋ, ونىمەن كۇرەسۋ قيىندىعى شىنايى كورسەتىلگەن. وسى قويىلىمعا ارنايى شاقىرىلعان مەملەكەتتىك ورگانداردىڭ, قۇقىق قورعاۋ جۇيەسىنىڭ قىزمەتكەرلەرى, مۇعالىمدەر مەن دارىگەرلەر تەاتردان تىڭ وي ءتۇيىپ كەتكەنى انىق.
ء«بىز مەملەكەتتىك قىزمەتكەرلەردى قوعام دەرتىن اشكەرەلەيتىن وسىنداي سپەكتاكلدەرگە شاقىرۋ ارقىلى قوعامدا سىبايلاس جەمقورلىققا قارسى مادەنيەتتى قالىپتاستىرۋعا ىقپال ەتەمىز. سىبايلاس جەمقورلىققا قوعام بولىپ قارسى تۇرۋ - بىرلىك پەن تۇراقتىلىقتىڭ كەپىلى بولماق» دەيدى شارانى ۇيىمداستىرۋشىلار.
قازبەك قۇتتىمۇرات ۇلى,
«ەگەمەن قازاقستان»
