بيىل 1299 ادام يتتەردەن, 335 ادام مىسىقتاردان زارداپ شەككەن. ۆەتەريناريا قىزمەتى تاراپىنان جۇقپالى اۋرۋلاردىڭ الدىن الۋ ماقساتىندا قۇتىرما اۋرۋىنا قارسى 7000 يت پەن 500 مىسىق ەگىلگەن.
بىراق, وڭىردەگى ۆەتەريناريا ستانساسى ماماندارىنىڭ ايتۋىنشا, يت پەن مىسىقتى اۋلاۋ جانە جويۋ ماقساتىنداعى كەيبىر قابىلداناتىن شارالار ەلىمىزدە قابىلدانعان زاڭدىلىقتارعا ساي كەلمەيتىن ءتۇستارى دا بار كورىنەدى.
بۇل ءۇشىن اۋىل-قالالارداعى قاڭعىباس يتتەر مەن مىسىقتاردى اۋلاۋ جانە جويۋ تۋرالى ەرەجەلەر بەكىتۋ قاجەت.
سودىقتان, جەرگىلىكتى ۆەتەريناريا باسقارماسى ەرەجەلەر جايلى بۇل جوبانى حالىقارالىق ۇيىمداردىڭ تالاپتارى مەن ۆەتەريناريا بولىمدەرىنىڭ, جانۋارلاردى قورعاۋشىلاردىڭ ۇسىنىستارىن ەسەپكە الا وتىرىپ ازىرلەدى.
بىرىنشىدەن, يت پەن مىسىقتى اۋلاۋعا, جويۋعا شىققان كولىكتى رەسمي بەلگىمەن جابدىقتاپ, ۇيىمنىڭ ءنومىرىن كورسەتۋ قاجەت.
بۇلاي بولماسا, تۇرعىنداردىڭ اراسىندا تۇسىنىسپەۋشىلىك تۋىنداپ, الەۋمەتتىك جەلىلەردە تەرىس پىكىرلەر جازا باستايدى. ەگەر دە جوعارىدا ايتىلعان جوبا جۇزەگە اسسا, جوعالعان ءۇي جانۋارىن ەكى اي ۋاقىت ىشىندە يەلەرى كەلىپ الىپ كەتە الادى.
بيىل وبلىس اۋماعىنداعى قاڭعىباس يتتەر مەن مىسىقتاردى جويۋعا وبلىستىق بيۋدجەتتەن 1 ميلليون تەڭگە بولىنگەن.
الداعى جىلدارى قارجى كولەمىن ارتتىرۋ جوسپارلانىپ وتىر. وبلىستىق ۆەتەريناريا باسقارماسىنىڭ مالىمەتىنشە, قاراۋسىز, كۇتىمسىز قالعان يت پەن مىسىقتىڭ سانى از ەمەس كورىنەدى.
دامىعان ەلدەردە ادام دەنساۋلىعى ءۇشىن, قوعام قاۋىپسىزدىگى ءۇشىن دالادا قالعان يت پەن سياقتى ءۇي جانۋارلارىنىڭ يەلەرىن ىزدەۋ, ەكپە سالۋ, ارنايى ورتالىققا ورنالاستىرۋ جۇمىستارى جۇرگىزىلەدى.
ال, ءبىزدىڭ ەلىمىزدە يت پەن مىسىقتى ۋاقىتشا ۇستاۋ, اۋلاۋ جانە جويۋ جۇمىستارىن وڭىرلەردەگى ۆەتەريناريا بولىمىنە قاراستى مەكەمەلەر اتقارادى. قاڭعىباس يتتەر مەن مىسىقتاردى اۋلاۋ جانە جويۋ ءتۇرلى جۇقپالى اۋرۋلاردىڭ تارالۋىنىڭ الدىن الۋ ماقساتىندا قولعا الىنۋدا.
فاريدا بىقاي,
«ەگەمەن قازاقستان»
پاۆلودار
