پرەزيدەنتتىك وركەستردىڭ ۇرمەلى اسپاپتار وركەسترىنىڭ سۇيەمەلدەۋىمەن مەملەكەتتىك كۇزەت قىزمەتىنىڭ «ايبىن» پولكىنىڭ قۇرمەت قاراۋىل روتاسى سالتاناتتى شەرۋمەن شارا شىمىلدىعىن ءتۇردى. «شىعارماشىلىق. جاسامپازدىق. يننوۆاتسيالار» كوشپەلى كورمەسىنىڭ اشىلۋىنا ەلباسى كىتاپحاناسى ديرەكتورىنىڭ ءبىرىنشى ورىنباسارى ءامىرحان راحىمجانوۆ پەن ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ جانە قالا تۇرعىندارى مەن جوعارى وقۋ ورىندارىنىڭ وقىتۋشىلارى, ستۋدەنتتەرى قاتىستى.
سالتاناتتى شارادا ءامىرحان راحىمجانوۆ جينالعان قاۋىمدى الدا كەلە جاتقان تۇڭعىش پرەزيدەنت كۇنىمەن قۇتتىقتادى. «بۇگىن العاش رەت ەلباسى كىتاپحاناسىنىڭ كوشپەلى كورمەسى مەن «تاريحي تاڭداۋ» عىلىمي-ەكسپوزيتسيالىق جوباسىنىڭ اياسىنداعى قوعامدىق-ساياسي تاقىرىپتاعى كوشپەلى ەكسكۋرسيالارىمىزدى, ەلىمىزدىڭ ۇلكەن ءبىلىم ورداسى سانالاتىن ەۋرازيالىق ۇلتتىق ۋنيۆەرسيتەتىندە اشقالى وتىرمىز. قۇندى ماتەريالدار ۇستازدار مەن ستۋدەنتتەر قاۋىمىنا رۋحاني تۇرعىدان بەرەرى از بولماس دەپ سەنەمىن», دەدى ءامىرحان راحىمجانوۆ. سونداي-اق ول حالقىمىزدىڭ جورالعىسى بويىنشا مەملەكەت باسشىسىنىڭ ەڭبەكتەرى مەن ول تۋرالى جازىلعان شىعارمالاردان تۇراتىن كىتاپتار كوللەكتسياسىن سىي رەتىندە الا كەلگەنىن ايتتى. 100-دەن استام كىتاپتان تۇراتىن كوللەكتسيانىڭ قۇرامىندا ەلباسىمىزدىڭ الەم تىلدەرىندە جارىق كورگەن ەڭبەكتەرى مەن پرەزيدەنتتىڭ ءومىرى مەن قىزمەتىن قامتيتىن, «نۇرسۇلتان نازارباەۆ. ءومىربايان», «قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆ. قىزمەت حرونيكاسى», «تاڭدامالى سوزدەر» جانە ەلباسىمىزدىڭ پاراساتتى پايىمداۋلارى مەن وي-تولعانىستارىنان تۇراتىن « ۇلى دالا ۇلاعاتتارى» اتتى كىتاپتار بار.
«تۇڭعىش» – قازاقستان رەسپۋبليكاسى پرەزيدەنتىنىڭ جاسامپاز كوشباسشىلىعىنىڭ دالەلى. «تۇڭعىش» – ءبىزدىڭ جاڭا زامان تاريحىمىز. «تۇڭعىش» – ءداستۇر ساباقتاستىعىنىڭ جالعاسى. ەلىمىز رۋحاني جاڭعىرىپ, ءورىسىمىز كەڭەيتىپ جاتقان تۇستا, ەلباسىنىڭ « ۇلى دالانىڭ جەتى قىرى» اتتى تۇجىرىمدامالىق ەڭبەگى ءبىزدى تاعى دا وتكەن مەن بۇگىننىڭ تىزگىنىن تەڭ ۇستاۋعا جۇمىلدىرىپ وتىر», دەدى كورمەنىڭ اشىلۋ راسىمىندە ءسوز العان ل.ن.گۋميلەۆ اتىنداعى ەۇۋ رەكتورى ەرلان سىدىقوۆ. ەۇۋ رەكتورىنىڭ ايتۋىنشا, «تۇڭعىش» كورمەسىنىڭ كۇلتەگىن اتريۋمىنان باستالۋىنىڭ رامىزدىك ءمانى بار. ويتكەنى, بۇل جادىگەر ەلباسى ىجداعاتىنىڭ ارقاسىندا ەلوردانىڭ باس ۋنيۆەرسيتەتىنە دەر كەزىندە جەتكىزىلدى.
كوشپەلى ەكسكۋرسيالىق كورمە وسى جىلدىڭ 20 جەلتوقسانىنا دەيىن «تاريحي تاڭداۋ. باستاۋ», «تاريحي تاڭداۋ. ورلەۋ», «ەلباسى مارتەبەسى – ەل مارتەبەسى», «اتامەكەن» دەگەن تاقىرىپتارمەن وتكىزىلەدى. كورمەدە مەملەكەت باسشىسىنا ەرەن ەڭبەگى مەن جاھاندىق باستامالارى ءۇشىن بەرىلگەن قوعامدىق ناگرادالار كەشەنى ۇسىنىلادى. سونداي اق ەلباسىنىڭ 90-جىلداردان باستاپ ءبىلىم سالاسىنداعى ەڭبەكتەرى, شەتەل ۋنيۆەرسيتەتتەرىندە وقىعان دارىستەرى مەن ەۋروپا, امەريكا جانە ازيا ەلدەرىنىڭ بەدەلدى جوعارى وقۋ ورىندارى مەن عىلىمي مەكەمەلەرىنەن تارتۋ ەتىلگەن 25 مانتيا قويىلعان.
ايتا كەتۋ كەرەك, كوشپەلى ەكسكۋرسيالاردىڭ فورماتى قاتىسۋشىلارعا بىرەگەي ماتەريالدار جيىنتىعىمەن تانىسۋعا, ونىڭ ىشىندە ەلباسىنىڭ تاريحي جولىن اشاتىن بەينە حرونيكانىڭ سيرەك كادرلارىن, فوتوسۋرەتتەر مەن مۇراعاتتىق قۇجاتتارىن جانە مۇراجاي ەكسپوناتتارىن قولمەن ۇستاپ كورۋگە مۇمكىندىك بەرەدى.
اقمارال اعزامقىزى,
«ەگەمەن قازاقستان»
