ياعني, بۇعان دەيىنگى جاسالعان تالداۋلار مەن زەرتتەۋلەر جانە مونيتورينگتىك باقىلاۋلار ناتيجەلەرى وبلىستا جوعارىدا اتالعان كاتەگورياعا كىرەتىن جۇمىس ىستەۋشىلەر قاتارى تۇپ-تۋرا 70 مىڭ ەكەنىن كورسەتەدى. ونىڭ 32 مىڭى – بيۋدجەت سالاسىنىڭ قىزمەتكەرلەرى. بۇل رەتتە ءبىرىنشى كەزەكتە ءبىلىم بەرۋ سالاسىندا قىزمەت ىستەيتىن مامانداردىڭ جالاقى مولشەرىن كوبەيتۋگە باسىمدىق بەرىلدى. جۇمىس توبى وڭىردە اتالعان ساناتتا 25 مىڭنان استام قىزمەتكەر بار دەپ مالىمدەدى. ولاردىڭ ەڭبەكاقىلارى ورتاشا ەسەپپەن العاندا 48 600 تەڭگەگە دەيىن وسەدى دەپ كۇتىلۋدە.
وسى ورايدا وبلىستاعى جالاقى مولشەرىن ءوسىرۋ جونىندەگى ناقتى ءىس-قيمىلدار ەكونوميكالىق جانە الەۋمەتتىك سەكتوردىڭ بارلىق سالاسىنا قاتىستى ەكەنىن ايتقان ءجون. بۇل رەتتە بۇگىندە وڭىردە 15 872 جەكەمەنشىك يەلەرى مەن شاعىن كومپانيا بار ەكەنى دە ۇدايى نازاردا بولىپ كەلەدى. ارنايى جۇمىس توبى بۇل قۇرىلىمداردا جالاقىلارى 42 500 تەڭگەدەن تومەن 39 مىڭعا جۋىق ادام بار ەكەنىن دە شوتقا ءتۇسىردى.
ءبىر سوزبەن ايتقاندا, قازىرگى كۇنى وبلىستا ەڭ تومەن جالاقى الاتىن ازاماتتاردىڭ ناقتى سانىن انىقتاۋ جۇمىستارى ودان ءارى جالعاسۋدا. تاقىرىپقا وراي ءوز وي-پىكىرىن اقتوبە وبلىسىنىڭ اكىمى بەردىبەك ساپارباەۆ گازەت تىلشىسىنە بىلايشا جەتكىزدى:
– جالاقى – ادامداردىڭ الەۋمەتتىك كوڭىل-كۇيىنە اسەر ەتەتىن نازىك تە شەتىن ءارى كۇردەلى ماسەلە. ونى رەتتەۋ مەن ءوسىرۋ جونىندەگى ءىس-شارالار ۇستىرتتىك پەن فورمالدىلىكتى كوتەرمەيدى. ءبىز وڭىردەگى بارلىق ءىرى جانە ورتا كاسىپورىن جەتەكشىلەرى مەن ارنايى جۇمىس توبى مۇشەلەرىنىڭ وسى جايتتى نازاردان تىس قالدىرماۋىن ايتىپ كەلەمىز. بۇل رەتتە تەك ستاتيستيكالىق مالىمەتتەرگە عانا ارقا سۇيەۋ ازدىق ەتەرى انىق. ياعني, ءىستىڭ جاعدايىن ۋاقىت توزدىرماي تەز ارادا ءارى ءتيىستى جەردە شەشۋ ناقتى ناتيجەگە جاقىنداتا تۇسپەك. بۇگىندە ء بارىمىزدىڭ العا قويىپ وتىرعان ماقساتىمىز وسىنداي.
قازىرگى كۇنى وڭىردەگى بارلىق جۇمىس بەرۋشى پرەزيدەنتتىڭ تاپسىرماسىنا وراي 2019 جىلدىڭ 1 قاڭتارىنان باستاپ جالاقىنى كوتەرۋدى جۇزەگە اسىرۋعا ءبىر كىسىدەي جۇمىلعان.
تەمىر قۇسايىن,
«ەگەمەن قازاقستان»
اقتوبە
