ەڭ الدىمەن «اقسايگازسەرۆيس» اكتسيونەرلىك قوعامى كاسىپورىنداعى جالاقىسى تومەن قىزمەتكەرلەرىنىڭ ەڭبەكاقىسىن 20%-عا كوتەرۋ تۋرالى شەشىم قابىلدادى.
قاراشىعاناق كەنىشىندە, سونداي-اق قاشاعان, شىنار (چينارەۆ) جانە تەڭىز كەن ورىندارىندا مۇناي مەن گازدى ءوندىرۋ, وڭدەۋ جانە تاسىمالداۋ نىساندارىن جايلاستىرىپ, جوعارى تەحنولوگيالىق سەرۆيستىك قىزمەت كورسەتەتىن «اقسايگازسەرۆيس» كومپانياسىندا 1800 ادام قىزمەت ەتەدى. بۇل – باتىس قازاقستان وبلىسىنداعى ەڭ ءىرى جەرگىلىكتى 100% قازاقستاندىق كومپانيا.
- اكتسيونەرلىك قوعام باسشىلىعى مەن اكتسيونەرلەرى مەملەكەت باسشىسىنىڭ باستاماسىن تولىعىمەن قولدايدى. كاسىپورىندا سالىستىرمالى تۇردە تومەن جالاقى الاتىن 327 قىزمەتكەردىڭ جالاقىسىن بيىل قاراشا ايىنان باستاپ-اق كوتەرۋگە شەشىم قابىلداندى. بۇل ءۇشىن كاسىپورىن بيۋدجەتىنەن قوسىمشا ايىنا 3,5 ملن تەڭگەدەن استام قاراجات ءبولىندى. ءسويتىپ «اقسايگازسەرۆيس» اق جىلىنا 41 ملن تەڭگەدەن استام قاراجاتتى جالاقى وسىرۋگە جۇمساعالى وتىر, – دەيدى كاسىپورىننىڭ كاسىپوداق ۇيىمىنىڭ توراعاسى وتەپبەرگەن قابيەۆ.
وڭىردەگى «گيدروپريبور» اق, «سترويكومبينات», «ورال مەحانيكا زاۋىتى», «جايىكاگرو-لتد» جشس, «ۋرالسكاگرورەمماش», «نۇرجانار» اكتسيونەرلىك قوعامدارى, «ستەكلو سەرۆيس», «كازارماپروم», «تمك-كازترۋبپروم», «اياز», «كۆانت» جاۋاپكەرشىلىگى شەكتەۋلى سەرىكتەستىكتەرى دە ءوز قىزمەتكەرلەرىنىڭ جالاقىسىن ءوسىرىپ, تابىس پەن تۇرمىس ساپارىن ارتتىرۋعا دەن قويعان. بۇل اتالعان كاسىپورىنداردا 2019 جىلدىڭ 1 قاڭتارىنان باستاپ جالاقى كوتەرىلىپ, ەڭ تومەنگى جالاقى مولشەرى 60 مىڭ تەڭگەدەن جوعارى بولماق.
– جاڭا جىلدان باستاپ «كۆانت» جشس-داعى ەڭ تومەنگى جالاقى مولشەرى 61 مىڭ تەڭگە بولادى. ءبىز مەملەكەتتىك قولداۋ ارقىلى كورپۋستى جيھاز جاسايتىن جاڭا فابريكا اشىپ وتىرمىز. تسەحتارىمىز ەڭ زاماناۋي جابدىق سانالاتىن گەرماندىق «Hوماg», يتاليالىق «Griggiو» قۇرالدارىمەن جاراقتانعان, – دەيدى كاسىپورىن باسشىسى دميتري پشەنيچنىي.
ورالدا ءجۇن وڭدەپ, پيما, كيىز سەكىلدى ءتۇرلى بۇيىم شىعاراتىن «اياز» كومپانياسى ەڭ كونە ءوندىرىس ورىندارىنىڭ قاتارىندا. قىس جاقىنداپ, كۇن سۋىتقاندا «ايازدىڭ» ونىمىنە سۇرانىس تا ارتادى. ايتا كەتەيىك, «اياز» كاسىپورنى بۇگىندە مەتالل «سۇيەكتى» كيىز ءۇي, جورىق لاشىقتارى, ساۋدا قاتارلارى, مۇناي-گاز, اگروسەكتور, توتەنشەلىكتەر, ت.ب. سالا قىزمەتكەرلەرى ءۇشىن ارنايى كيىمدەر شىعارىپ, كوپشىلىك كوڭىلىنەن شىعىپ ءجۇر.
– ءبىز حالىقتىڭ ءال-اۋقاتىن ارتتىرۋ تۋرالى ەلباسى باستاماسىن تولىعىمەن قولدايمىز. ءوز تاراپىمىزدان بۇگىندە 38 مىڭ تەڭگە جالاقى الىپ جۇرگەن 26 قىزمەتكەرىمىزدىڭ ايلىق تابىسىن 60 مىڭ تەڭگەگە كوتەرۋگە شەشىم قابىلداپ وتىرمىز. كورىپ وتىرعانداي, جالاقى ەكى ەسەگە جۋىق كوتەرىلمەك, – دەيدى كومپانيا ديرەكتورى امانگەلدى ەرمەكقاليەۆ.
قازبەك قۇتتىمۇرات ۇلى,
«ەگەمەن قازاقستان»
