جيىندا «قازتەلەراديو» اق باسقارما توراعاسى ە.تاجىبەكوۆ جامبىل وبلىسىندا انالوگتىق حابار تاراتۋدى توقتاتۋ ءىسى «تسيفرلى قازاقستان» باعدارلاماسىن جۇزەگە اسىرۋدىڭ كەزەكتى شاراسى ەكەنىن, سونداي-اق جامبىل وبلىسىنداعى تسەتت-قا تابىستى كوشۋدى قامتاماسىز ەتۋ ءۇشىن اتقارىلعان جۇمىستار تۋرالى ايتتى.
«وبلىستا تسيفرلى ەفيرلىك تەلەحابار تاراتۋ جوباسىن ىسكە اسىرۋ تولىق اياقتالدى. بۇگىنگى تاڭدا 44 تسيفرلى تاراتقىشتاردى قوسۋمەن, 43 راديوتەلەۆيزيالىق ستانسالار سالىندى جانە جاڭعىرتىلدى. بۇل وبلىس حالقىنىڭ 99,8%-ى تۇراتىن 377 ەلدى مەكەندى قامتۋعا مۇمكىندىك بەرەدى. وڭىردە التى ەلدى مەكەن تسيفرلى ەفيرلىك حابار تاراتۋمەن قامتىلماعان, بىراق ساپالى تەلەحابار تاراتۋ ولار ءۇشىن قولجەتىمدى. قازىرگى تاڭدا اتالعان ەلدى مەكەندەردە 466 ءۇي شارۋاشىلىعى تىركەلگەن, ولاردىڭ ارقايسىسى «OTAU TV» ۇلتتىق سپۋتنيكتىك تەلەحابار تاراتۋ جۇيەسىنە قوسىلعان», دەدى ە.تاجىبەكوۆ.
وبلىس اكىمدىگىنىڭ قولداۋىمەن حالىقتى اقپاراتتاندىرۋ بويىنشا بەلسەندى جۇمىس جۇرگىزىلۋدە. جامبىل وبلىسى ىشكى ساياسات باسقارماسىنىڭ باسشىسى بەرىك قۇرمانعاليدىڭ ايتۋىنشا, ايماق تۇرعىندارىن حاباردار ەتۋ ماقساتىندا تسيفرلى ەفيرلىك تەلەحابار تاراتۋ بويىنشا جارنامالىق بەينەروليكتەر تاراز قالاسىنىڭ بارلىق LED-ديسپلەيلەرى بويىنشا كورسەتىلەدى. وبلىس اۋداندارى بويىنشا 57 اقپاراتتىق بيلبورد ورنالاستىرىلدى جانە وڭىرلىك باق ارقىلى حالىقتى اقپاراتتاندىرۋ بويىنشا بەلسەندى جۇمىس جۇرگىزىلۋدە. سونداي-اق ول اتاۋلى الەۋمەتتىك كومەك الاتىن وتباسىلارىمەن جۇمىس تۋرالى ايتتى.
«وبلىستا اتاۋلى الەۋمەتتىك كومەك كورسەتۋگە جاتاتىن 8975 وتباسى تىركەلگەن, ونىڭ 6631-ءى تسەتت قىزمەتىنە قوسىلعان. قالعان 2344 وتباسى تسيفرلى قابىلداعىشتارعا يە بولدى جانە تسيفرلى ەفيرلىك تەلەديدارعا قوسىلۋ مۇمكىندىگىنە يە», دەدى بەرىك قۇرمانعالي.
ەستەرىڭىزگە سالا كەتەيىك, «تسيفرلى قازاقستان» باعدارلاماسى اياسىندا ەلىمىزدىڭ بارلىق وڭىرلەرىن انالوگتىق تەلەحابارلار تاراتۋدان كەزەڭ-كەزەڭمەن اجىراتۋ جوسپارلانىپ وتىر. وسى باعدارلاماعا سايكەس 2021 جىلعا قاراي قازاقستان انالوگتىق حابار تاراتۋدان تولىق باس تارتادى.
حاميت ەسامان,
«ەگەمەن قازاقستان»
جامبىل وبلىسى
