بيىل وڭىردە 3,4 ميلليون گەكتار القاپتىڭ ءار گەكتارىنان 13 تسەنتنەردەن ءدان جينالىپ, 5,6 ميلليون توننادان استام التىن استىق قامباعا قۇيىلدى. جينالعان استىقتىڭ كولەمى جاعىنان وبلىس رەسپۋبليكا بويىنشا الدىڭعى ورىنعا شىقتى. كارتوپ پەن كوكونىستىڭ دە مول قورى جيناقتالدى.
مۇنداي تابىسقا ەگىنشىلىك مادەنيەتىن جاقسارتۋ جانە تراكتور-كومباين پاركىن قايتا جاراقتاندىرۋ ناتيجەسىندە قول جەتكىزىلدى. وبلىستا بيىل 225 تراكتور, 229 استىق كومباينى, 63 ەگىن سەبۋ كەشەنى ساتىپ الىندى. بۇلاردىڭ ءبارى شەتەلدىك ونىمدىلىگى جوعارى تەحنيكالار. تيىمدىلىگى كوكتەمگى ەگىس پەن ەگىن وراعىندا ايقىن اڭعارىلدى.
وبلىستا وڭ وزگەرىستەر بار. بيىل 15,1 ميلليارد تەڭگەنىڭ 13 ينۆەستيتسيالىق جوباسىنىڭ ىسكە اسىرىلىپ جاتىر. ءوڭىر ءوزىنىڭ ەكسپورتتىق الەۋەتىن دە ەسەلەپ, قامباعا قۇيىلعان 6 ميلليون تونناعا جۋىق استىقتىڭ 2 ميلليون تونناسىن ەكسپورتقا شىعارۋ مۇمكىندىگىنە يە بولىپ وتىر. وڭدەۋشى كاسىپورىندار دا تولىق قۋاتىندا جۇمىس ىستەۋدە. ەلەۆاتورلارعا استىقتىڭ قۇيىلىپ الىنۋى 88 پروتسەنتتى قۇراسا, ەت وڭدەۋ قۋاتى 55, ءسۇت وڭدەۋ قۋاتى 80 پروتسەنتكە جەتكىزىلدى.
مال شارۋاشىلىعىندا دا ىلگەرىلەۋ اڭعارىلادى. ءتورت ت ۇلىك مال باسىندا ءوسىم بار. بۇگىنگى تاڭدا ون مىڭ باسقا دەيىن ءىرى قارا مال سەمىرتىلۋدە.
مەملەكەت اۋىل شارۋاشىلىعىنا سۋبسيديا مولشەرىن كوبەيتۋدە. ماسەلەن, بيىل اۋىل شارۋاشىلىعى ەڭبەككەرلەرى ۇكىمەتتەن 25 ميلليارد تەڭگەنىڭ تەگىن سۋبسيدياسىن الدى. كومەكتىڭ دە قايتارىمى بولۋى كەرەك. مەملەكەت باسشىسى نۇرسۇلتان نازارباەۆتىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىندا العا قويىپ وتىرعان تسيفرلاندىرۋ ماسەلەسىنە دە كوپ كوڭىل ءبولىنۋى قاجەت. ءبىر قۋانىشتىسى, وبلىس «تسيفرلىق قازاقستان» پيلوتتىق جوباسىنا كىرىپ, سالادا تسيفرلاندىرۋ جۇمىستارى كەڭ قانات جايعالى وتىر. قازىردىڭ وزىندە كوپتەگەن ەگىستىك القاپتارى, سونىمەن بىرگە, مال شارۋاشىلىعىندا ءۇش تاۋارلى-ءسۇت فەرماسى تولىق تسيفرلاندىرىلىپ ۇلگەرىلدى. ەلباسى جوعارىداعى جولداۋىندا ەلىمىز بويىنشا اۋىل شارۋاشىلىعى سالاسىندا ەڭبەك ونىمدىلىگىن 2,5 ەسە ارتتىرۋ مىندەتىن قويىپ وتىر. بۇل مىندەتتى وبلىستىق اۋىل شارۋاشىلىعى قىزمەتكەرلەرى جاقسى تۇسىنۋدە.
سالاداعى ءبىر ەرەكشەلىك, بيىلعى جىلى اۋداندارى كليماتتىق جاعدايلارىنا جانە توپىراق قۇنارلىلىعىنا بايلانىستى ءۇش ايماققا ءبولىنىپ, سونىڭ ارقايسىسىندا جارىس جەڭىمپازدارى قاراستىرىلعان ەكەن. وسى ءۇش توپتىڭ اربىرەۋىندە استىق ءوندىرىسى بويىنشا جاقسى, ساندىقتاۋ جانە تسەلينوگراد اۋداندارى جارىس كوشىن باستاپ تۇر.
استىقتىڭ شىعىمدىلىعى بويىنشا جوعارى كورسەتكىشكە قول جەتكىزگەن ەسىل اۋدانىنداعى «زارەچنىي» سەرىكتەستىگى, ساندىقتاۋ اۋدانىنداعى «ايدوس» شارۋا قوجالىعى. استىق قابىلدايتىن كاسىپورىندار وزىق تەحنولوگيالاردى پايدالانۋدا. ۇزدىك استىق قابىلداۋ كاسىپورنى جارقايىڭ اۋدانىنداعى «اقبيداي» سەرىكتەستىگى. ء بىر قۇپتارلىعى, جيىندا قاراپايىم ادامداردىڭ ەڭبەگى ەگجەي-تەگجەيلى اتالىپ ءوتىلدى. قورعالجىن اۋدانىنداعى «Sara Grain» اگروفيرماسى» سەرىكتەستىگىنىڭ كومباينشىسى سەرىك ىبىراەۆ, بۋراباي اۋدانىنداعى «بۋراباي 2007 اف» سەرىكتەستىگىنىڭ مەحانيزاتورى الەكساندر ۆلاسوۆ, جاقسى اۋدانىنداعى «ايبات» سەرىكتەستىگىنىڭ جۇرگىزۋشىسى ماقسۇت نۇرجانوۆ, بۇلاندى اۋدانىنداعى «جۋراۆلەۆكا-1» سەرىكتەستىگىنىڭ باس ينجەنەرى گريگوري چەرنەنكوۆ, شورتاندى اۋدانىنداعى «جاكەن-1» سەرىكتەستىگىنىڭ باس اگرونومى ۆولفگان زاگەرت ءوز ماماندىعىنىڭ ۇزدىگى اتاندى.
وبلىستا مال بورداقىلايتىن مامانداندىرىلعان كاسىپورىندار جۇيەسى جاپ-جاقسى جۇمىس ىستەپ تۇر. وسى سالادا جوعارى كورسەتكىشتەرگە قول جەتكىزگەن زەرەندى اۋدانى وبلىس اكىمىنىڭ العىس حاتىمەن ماراپاتتالدى. سونداي-اق, ەگىندىكول اۋدانىنداعى «روست اگرو لتد» سەرىكتەستىگىنىڭ مالشىسى سەرىك ابىلدينگە, ەرەيمەنتاۋ اۋداندىق ۆەتەريناريا ءبولىمىنىڭ مال دارىگەرى تولەگەن سەرەنوۆقا, استراحان اۋدانىنداعى «كولۋتون-04 اشك» سەرىكتەستىگىنىڭ باس زووتەحنيگى سەيىلحان قاسەنوۆكە, ارشالى اۋدانىنداعى «پويس اگرو فيرماسى» سەرىكتەستىگىنىڭ بۇزاۋ كۇتۋشىسى مارينا پەتريگە قۇرمەت كورسەتىلدى.
وبلىستا استانانىڭ ازىق-ت ۇلىك بەلدەۋىن قامتاماسىز ەتۋگە نازار اۋدارىلۋدا. مول ءونىمنىڭ ءبىرازى شەتەلدەرگە شىعارىلۋدا. ءسۇت وندىرۋدە تسەلينوگراد اۋدانىنداعى «رودينا» اگروفيرماسى», زەرەندى اۋدانىنداعى «Milk Project» سەرىكتەستىكتەرى كوش باستاپ كەلەدى.
اقىق ءدان ايالاپ, اقتىلى مال وسىرگەن اۋىل ەڭبەككەرلەرىنىڭ قانشالىقتى قارەكەت ەتىپ جاتقاندىعىن جالپاق جۇرتقا ايگىلەگەن جيىن بارىسىندا بۇگىنگىنىڭ ەڭبەك باھادۇرلەرى عانا ەمەس, بۇرىنعى بايراقتى باسەكەدە الدىنا جان سالماعان جامپوزدار – ەڭبەك ەرلەرى دە قۇرمەتكە يە بولدى. رەسپۋبليكا استىعىنىڭ شيرەگىن ءوسىرىپ وتىرعان ولكەنىڭ جۇيرىكتەرى, داڭعايىر ديقاندار دارالانعان كۇن بولدى بۇل.
بايقال ءبايادىل,
«ەگەمەن قازاقستان»
اقمولا وبلىسى
