2018 جىلعى قىركۇيەكتە نيۋ-يورك قالاسىندا بۇۇ باس اسسامبلەياسىنىڭ 73-ءشى سەسسياسى الاڭدارىندا وتكەن اوسشك-نە مۇشە مەملەكەتتەرى سىرتقى ىستەر مينيسترلەرىنىڭ كەزدەسۋى بارىسىندا 2018-2020 جج. مەرزىمىنە فورۋم توراعالىعى قىتايدان تاجىكستانعا تابىستالدى.
كەزدەسۋ بارىسىندا مينيستر ق. ءابدىراحمانوۆ باۋىرلاس تاجىكستاندى كۇردەلى حالىقارالىق جاعدايدا جاڭا جاۋاپتى ميسسيانىڭ باستالۋىمەن قۇتتىقتاي وتىرىپ, قازاقستان فورۋمنىڭ نەگىزىن قالاۋشى مەملەكەت بولعاندىقتان جۇمىسىنا بەلسەنە قاتىسۋعا جانە جاڭا توراعاعا جان-جاقتى قولداۋ كورسەتۋگە ۋادە بەردى.
كەزدەسۋ بارىسىندا سىرتقى ساياسي ۆەدومستۆوسىنىڭ باسشىسى قازاقستان پرەزيدەنتى نۇرسۇلتان نازارباەۆتىڭ حالىقارالىق جانە ايماقتىق قاۋىپسىزدىكتى قامتاماسىز ەتۋگە باعىتتالعان باستامالارىنا ەرەكشە نازار اۋداردى. استانادا ازيا كەڭەسىنىڭ نەگىزىندە ەۋروپاداعى قاۋىپسىزدىك جانە ىنتىماقتاستىق ۇيىمىنىڭ, اوسشك-ءتىڭ جانە اسەان وڭىرلىك فورۋمى حالىقارالىق حاتشىلىقتار باسشىلارىنىڭ كەزدەسۋىن ۇيىمداستىرۋ تۋرالى ءوزارا پىكىر الماسۋ ءوتتى. ونىڭ تابىستى وتكىزىلۋى جاقىن ارادا ەۋرازيا جانە ەۆرواتلانتيكاداعى قاۋىپسىزدىك بويىنشا حالىقارالىق كونفەرەنتسيا قۇرۋ پروتسەسىن باستاۋعا مۇمكىندىك بەرەدى.
سۇحباتتاسۋشىلار فورۋم مۇشەلەرى كوپشىلىگىنىڭ قولداۋىنا يە بولعان ازياداعى قاۋىپسىزدىك پەن دامۋدىڭ جاڭا حالىقارالىق ۇيىمىن قۇرۋ جونىندەگى قازاقستاندىق باستامانى جۇزەگە اسىرۋداعى بىرلەسكەن جۇمىستى ساراپتامالىق دەڭگەيدە جالعاستىرۋ قاجەتتىگىن اتاپ ءوتتى.
تاراپتار اوسشك جۇمىسىندا ساباقتاستىقتى قامتاماسىز ەتۋ جانە فورۋمعا مۇشە ەلدەردىڭ, اسىرەسە كەڭەستىڭ بۇرىنعى توراعاسى قىتاي (2014-2018 جج.) تاراپىنان قۇرىلعان جاستار جانە ىسكەرلىك كەڭەستەرى, ۇكىمەتتىك ەمەس فورۋمى, كەڭەستىڭ جاڭا مۇشەلەرى رەتىندە كاتار, بانگلادەش جانە شري-لانكا مەملەكەتتەرى قابىلدانىپ, لاوس حالىقتىق دەموكراتيالىق رەسپۋبليكاسى مەن حالىقارالىق كوشى-قون ۇيىمى باقىلاۋشى مارتەبەسىنە يە بولعان ماڭىزدى باستامالارىن ودان ءارى دايەكتى تۇردە جۇزەگە اسىرۋ قاجەتتىگىن اتاپ ءوتتى.
اوسشك حاتشىلىعىنىڭ اتقارۋشى ديرەكتورى اتاپ وتكەندەي, تاجىكستان, قازاقستاننىڭ بەلسەندى قولداۋىمەن كەڭەسكە ءوز توراعالىعى كەزەڭىندە فورۋمنىڭ گەوگرافياسىن كەڭەيتۋ جانە ونىڭ بارلىق بەس ولشەمى (اسكەري-ساياسي, ەكونوميكالىق, ەكولوگيالىق جانە گۋمانيتارلىق, سونداي-اق جاڭا قاۋىپ-قاتەرلەرگە قارسى كۇرەس سالاسىنداعى پراكتيكالىق ىنتىماقتاستىعىن كۇشەيتۋ) بويىنشا جۇمىستى جالعاستىرۋعا دايىن.
ارنايى ۇيىمداستىرىلعان كەزدەسۋ بارىسىندا تاراپتار 2019 جىلى تاجىكستاندا وتەتىن اوسشك مەملەكەت باسشىلارىنىڭ كەزەكتى بەسىنشى ءسامميتىن دايىنداۋ مەن وتكىزۋ, سونداي-اق ازيا كەڭەسىن ودان ءارى دامىتۋ جانە ينستيتۋتسيونالدى نىعايتۋ مەن فورۋم حاتشىلىعىن ساپالى كادرلارمەن نىعايتۋ ماسەلەلەرىن تالقىلادى.
اوسشك - 1992 جىلى قازاقستان باستاماسىمەن قۇرىلىپ, ازياداعى قاۋىپسىزدىكتى قامتاماسىز ەتۋ سالاسىنداعى ءوزارا سۇحباتتىڭ نەگىزىن سالۋ, شەشىمدەردى قابىلداۋ مەن شارالاردى ىسكە اسىرۋ ءۇشىن جاعداي جاساۋعا باعىتتالعان حالىقارالىق فورۋم بولىپ تابىلادى.
بۇگىنگى تاڭدا ازيانىڭ 27 مەملەكەتى اوسشك-ءنىڭ مۇشەلەرى. باقىلاۋشىلار رەتىندە فورۋمعا 8 مەملەكەت جانە 5 حالىقارالىق ۇيىم قاتىسادى.
2014 جىلدان باستاپ اوسشك شتاب-پاتەرى استانا قالاسىندا ورنالاسقان.
