بالۋاندار برازيلياعا بارادى
جاقىندا ءتول كۇرەسىمىزدەن وڭتۇستىك امەريكا قۇرلىعىندا تۇڭعىش رەت الەم چەمپيوناتى وتەدى
قىزىلوردا وبلىسىنىڭ شيەلى اۋدانىندا قازاق كۇرەسىنەن ءجاسوسپىرىمدەر اراسىندا ەل چەمپيوناتى ءوتتى. بۇل باسەكەگە ەلىمىزدىڭ ءتۇپكىر-تۇپكىرىنەن 200-دەن استام بالعىن بالۋاندار جينالىپ, 6 سالماق دارەجەسى بويىنشا كۇش سىناستى. ەكى كۇنگە سوزىلعان جارىستىڭ قورىتىندىسىندا بولاشاعىنان ءۇمىت كۇتتىرەتىن مىنا بالۋاندار قازاقستان چەمپيونى دەگەن مارتەبەلى اتاققا يە بولدى.
جاقىندا ءتول كۇرەسىمىزدەن وڭتۇستىك امەريكا قۇرلىعىندا تۇڭعىش رەت الەم چەمپيوناتى وتەدى
قىزىلوردا وبلىسىنىڭ شيەلى اۋدانىندا قازاق كۇرەسىنەن ءجاسوسپىرىمدەر اراسىندا ەل چەمپيوناتى ءوتتى. بۇل باسەكەگە ەلىمىزدىڭ ءتۇپكىر-تۇپكىرىنەن 200-دەن استام بالعىن بالۋاندار جينالىپ, 6 سالماق دارەجەسى بويىنشا كۇش سىناستى. ەكى كۇنگە سوزىلعان جارىستىڭ قورىتىندىسىندا بولاشاعىنان ءۇمىت كۇتتىرەتىن مىنا بالۋاندار قازاقستان چەمپيونى دەگەن مارتەبەلى اتاققا يە بولدى.
ەڭ جەڭىل سالماقتا رايىمبەك رانتاەۆ (قىزىلوردا وبلىسى), قاسىمحان تولەنباي (وقو, 51 كگ.), داۋلەت قاسىمبەك ۇلى (وقو, 57 كگ.), دانيار تەمىرحانوۆ (اقمولا وبلىسى, 64 كگ.), بەكبولات ابدىعازيەۆ (جامبىل وبلىسى, 72 كگ.) جانە 81 كيلو سالماقتا ەلامان قايشىباەۆ (اقتوبە وبلىسى).
قازاق كۇرەسىنەن مەملەكەتتىك جاتتىقتىرۋشى مارات جاقىتتىڭ ايتۋىنشا, وسى بەلدەسۋلەردە توپ جارعان بالۋاندارىمىز ناۋرىز ايىنىڭ سوڭى مەن ءساۋىر ايىنىڭ باسىندا برازيليانىڭ سان-پاۋلو قالاسىندا تۇڭعىش رەت ءتول كۇرەسىمىزدەن جاسوسپىرىمدەر اراسىندا وتەتىن الەم چەمپيوناتىنا قاتىساتىن بولادى. قازىر ولاردىڭ دايىندىقتارى باستالىپ كەتتى.
«بۇل چەمپيونات قازاق تاريحىندا تۇڭعىش رەت وڭتۇستىك امەريكا قۇرلىعىندا وتەتىن جارىس بولعالى وتىر. ەلىمىز تاۋەلسىزدىك العان كەزدەن بەرى مۇنداي باسەكەنى ەشقاشان وتكىزىپ كورگەن ەمەس. بۇل قازاق كۇرەسىنىڭ الەمدىك ارەنادا وزگە كۇرەستەرمەن يىق تەڭەستىرىپ قانا قويماي, جەر ءجۇزىن مويىنداتقانىن ايعاقتايدى دەۋگە بولادى. وسى كۇندەرى الەمنىڭ ءتورت بۇرىشىنان قازاق كۇرەسىنە قىزىققان ەلدەر چەمپيوناتقا قاتىسۋعا ءوتىنىش بەرىپ جاتىر. ونىڭ ىشىندە ازيا, ەۋروپا, افريكا مەن امەريكا قۇرلىقتارىنىڭ ەلدەرى بار. ياعني, ەشقانداي قۇرلىق ءتول كۇرەسىمىزدەن وتەتىن تارتىستى جارىسقا قاتىسۋدان سىرت قالماي وتىر. بۇل – دۇنيەجۇزىلىك قازاق كۇرەسى قاۋىمداستىعىنىڭ ۇلكەن جەتىستىگى. الداعى كەزدە مۇنداي باسەكەلەر الەمنىڭ تۇپكىر-تۇپكىرىندە وتكىزىلەتىنىنە سەنىمدىمىز», دەيدى بىلىكتى باپكەر, قازاق كۇرەسىنىڭ ۇلكەن مامانى مارات جاقىت.
مۇنىڭ الدىندا قازاق كۇرەسىنەن جاستار اراسىندا كەزەكتى ەل ءبىرىنشىلىگى وتەدى. بۇل بەلدەسۋلەر 24-26 اقپان كۇندەرى اقتوبە قالاسىندا وتكىزىلەدى.
داستان كەنجالين.
