جوبانىڭ جالپى قۇنى – رەسپۋبليكالىق بيۋدجەتپەن قارجىلاندىرىلاتىن سالىقتى قوسا ەسەپتەگەندە 75 ملن اقش دوللارى. جوسپارعا سايكەس بۇل قاراجاتقا اۋىلدىق مەكتەپتەرگە وقۋ ماتەريالدارى مەن مۋلتيمەديالىق قۇرال-جابدىقتار ساتىپ الىنىپ, ءبىلىم بەرۋ باعدارلامالارى جاقسارتىلاتىن بولادى. سونداي-اق اۋىلدىق مەكتەپتەردەگى مۇعالىمدەردىڭ الەۋەتىن ارتتىرۋ بويىنشا شارالار قولدانىلىپ, ەرەكشە قاجەتتىلىكتەرى بار بالالارعا قولداۋ كورسەتىلەدى. جوبا شەڭبەرىندە ءبىلىم بەرۋدىڭ جاڭارتىلعان مازمۇنىن قولداۋعا باعىتتالعان باستامالار كەشەنى جۇزەگە اسىرىلادى دەپ كۇتىلۋدە.
«بۇگىن ورتا ءبىلىم جۇيەسىنىڭ ساپاسىن ارتتىرۋ, ءبىلىم بەرۋدەگى قولجەتىمدىلىك پەن تەڭدىكتى جەتىلدىرۋ ماقساتىندا قازاقستان رەسپۋبليكاسى مەن دۇنيەجۇزىلىك بانك اراسىنداعى كەلىسىم شەڭبەرىندە جۇزەگە اسىرىلاتىن «ورتا ءبىلىم بەرۋدى جاڭعىرتۋ» جوباسىنىڭ رەسمي اشىلۋىن جاريالايمىز. بۇل جوبا ەلباسىنىڭ «100 ناقتى قادام» ۇلت جوسپارىنىڭ 76-قادامىندا, ءبىلىم جانە عىلىمدى دامىتۋدىڭ 2016-2019 جىلدارعا ارنالعان باعدارلاماسىندا بەلگىلەنگەن باسىمدىقتارعا سايكەس كەلەدى. جوبانىڭ ماقساتى ورتا ءبىلىم جۇيەسىنىڭ ساپاسىن كوتەرۋ, جاڭعىرتۋدى قولداۋ, ءبىلىم بەرۋدەگى قولجەتىمدىلىك پەن تەڭدىكتى ارتتىرۋ, قالا جانە اۋىل وقۋشىلارى اراسىنداعى وقۋ ۇلگەرىمىنىڭ الشاقتىعىن تومەندەتۋ. كەلىسىم جاڭارتىلعان ءبىلىم بەرۋ مازمۇنىن قولداۋداعى قوزعالعان باستامالار كەشەنىن قامتيدى. جوبانىڭ نەگىزگى باعىتتارىنىڭ ءبىرى – ءبىلىم بەرۋ ماتەريالدارىنا قولجەتىمدىلىكتى ارتتىرۋ, مۋلتيمەديالىق جابدىقتارمەن جاراقتاۋ جانە اۋىل مەكتەپتەرى مۇعالىمدەرىنىڭ الەۋەتىن كوتەرۋ ارقىلى اۋىلدىق جالپى ورتا ءبىلىم بەرەتىن مەكتەپتەر مەن شاعىن جيناقتالعان مەكتەپتەردىڭ وقۋشىلارىنىڭ ۇلگەرىمىن جاقسارتۋ. وسىلايشا, جوبانىڭ جالپى قاراجاتىنىڭ 60 پايىزى 5 مىڭنان استام اۋىلداعى, اسىرەسە شالعايداعى اۋىلدارداعى مەكتەپتەردى مۋلتيمەديالىق جابدىقتارمەن جاراقتاندىرۋعا باعىتتالعان. بۇل جاڭا تسيفرلى ءبىلىم بەرۋ رەسۋرستارىنا قولجەتىمدىلىكتى جاقسارتىپ, حالىقارالىق تەستىلەۋدى ونلاين فورماتىندا وتكىزۋ ءۇشىن ماتەريالدىق-تەحنيكالىق قولداۋ كورسەتەدى. وعان قوسا وسى شارالار قالا جانە اۋىل مەكتەپتەرى وقۋشىلارى اراسىنداعى وقۋ ۇلگەرىمىنىڭ الشاقتىعىن تومەندەتۋگە ىقپال ەتەدى. پەداگوگيكالىق ءبىلىمدى جاڭعىرتۋعا جەكە كوڭىل بولىنۋدە. پەداگوگيكالىق ماماندىقتارعا ارنالعان جاڭا 30 ءبىلىم بەرۋ باعدارلامالارى مەن بولاشاق مۇعالىمدى دايىنداۋدىڭ جاڭا مودەلى جاسالادى. سونىمەن قاتار, 16 پەداگوگيكالىق جوعارى وقۋ ورىندارىنىڭ ماتەريالدىق تەحنيكالىق بازاسىن كۇشەيتۋگە قوماقتى قارجى بولىنەدى», دەدى ە.سۋحانبەرديەۆا.
كەلىسىمنىڭ تاعى ءبىر ماڭىزدى باعىتتارىنىڭ ءبىرى – ينكليۋزيۆتى ءبىلىم بەرۋدى قولداۋ. ەرەكشە ءبىلىم الۋ قاجەتتىلىكتەرى بار بالالارعا ساپالى ءبىلىم بەرۋ دە اتالعان جوبانىڭ اجىراماس بولىگى دەۋگە بولادى.
«جوبانىڭ باستى بەنەفيتسيارلارى 3 ملن-نان استام مەكتەپ وقۋشىلارى, ونىڭ ىشىندە ەرەكشە ءبىلىم قاجەتتىلىكتەرى بار بالالار, اۋىل مەكتەپتەرىنىڭ 170 مىڭ مۇعالىمى مەن ديرەكتورى, پەداگوگيكالىق جوعارى وقۋ ورىندارىنىڭ ستۋدەنتتەرى بولماق. جوبا ينستيتۋتسيونالدىق دەڭگەيدە ەلىمىزدىڭ ءار مەكتەبىنىڭ, اسىرەسە قيىن جاعدايداعى مەكتەپتەردىڭ الەۋەتىن كوتەرۋگە مۇمكىندىك بەرەدى, ورتا ءبىلىم ساپاسىن ارتتىرادى», دەدى ۆيتسە-مينيستر.
جيىن سوڭىندا ۇيىمداستىرۋشىلار ۇلتتىق دەڭگەيدەگى جوبا ەلىمىزدىڭ تۇراقتى دامۋى ءۇشىن ادام كاپيتالىن نىعايتۋعا مۇمكىندىك بەرەتىنىن, سونىمەن قاتار قوعامعا وڭتايلى الەۋمەتتىك-ەكونوميكالىق اسەر قالدىراتىنىن تىلگە تيەك ەتتى.
راۋان قايدار,
«ەگەمەن قازاقستان»
