جالپى, اتالعان ساپار ەكى مەملەكەت اراسىنداعى قارىم-قاتىناستار تاريحىندا سىرتقى ىستەر مينيسترلەرى دەڭگەيىندەگى العاشقى ساپار بولۋىمەن ەرەكشەلەنىپ وتىر.
سىرتقى ىستەر ءمينيسترى قايرات ابدىراحمانوۆپەن وتكەن كەلىسسوزدەر بارىسىندا تاراپتار ساياسي, ساۋدا-ەكونوميكالىق جانە مادەني ىنتىماقتاستىقتىڭ قازىرگى جاعدايى مەن كەلەشەگىن تالقىلادى. قۇرىلىس, ەنەرگەتيكا, اۋىل شارۋاشىلىعى, كولىك-لوگيستيكا, ينفراقۇرىلىم جانە تۋريزم سالالارى ىنتىماقتاستىقتىڭ پەرسپەكتيۆالىق باعىتتارى بولىپ انىقتالدى.
البانيا دەلەگاتسياسى قازاقستانداعى شەتەلدىك ينۆەستورلار ءۇشىن قولايلى جاعدايلار مەن ارتىقشىلىقتار تۋرالى, سونداي-اق «استانا» حالىقارالىق قارجى ورتالىعى شەڭبەرىندەگى ىنتىماقتاستىق مۇمكىندىكتەرى تۋرالى حاباردار بولدى.
ەكى ەل اراسىنداعى تاۋار اينالىمىنىڭ كولەمى تومەن, وسىعان بايلانىستى ساۋدا-ەكونوميكالىق ىنتىماقتاستىق قارقىنىن قامتاماسىز ەتۋ ماقساتىندا تاراپتار ساۋدا-ەكونوميكالىق ىنتىماقتاستىق, ينۆەستيتسيالاردى كوتەرمەلەۋ مەن ءوزارا قورعاۋ جانە قوسارلانعان سالىق سالۋدى بولدىرماۋ تۋرالى ءۇش نەگىزگى كەلىسىمگە قول قويۋ پروتسەسىن جەدەلدەتۋ تۋرالى ۋاعدالاستى. سونىمەن قاتار كەلىسسوزدەردىڭ كۇن تارتىبىندە ءوزارا قۇقىقتىق كومەك كورسەتۋ تۋرالى قۇجاتتار بار.
حالىقارالىق جانە ايماقتىق كۇن تارتىبىندەگى وزەكتى ماسەلەلەر, سونىڭ ىشىندە ورتالىق ازيا مەن بالقان ايماعىنداعى جاعداي تۋرالى پىكىر الماسىلدى. قازاقستان مەن البانيانىڭ نەگىزگى حالىقارالىق ماسەلەلەر بويىنشا ۇستانىمدارىنىڭ ۇقساستىعى بۇۇ, ەۋروپاداعى قاۋىپسىزدىك جانە ىنتىماقتاستىق ۇيىمى, يسلام ىنتىماقتاستىعى ۇيىمى سياقتى پلاتفورمالار اياسىندا ارىپتەستىككە مۇمكىندىك بەرەتىندىگى اتاپ ءوتىلدى.
بۇل تۇرعىدا ەلباسى نۇرسۇلتان نازارباەۆتىڭ حالىقارالىق جانجالداردى رەتتەۋدەگى جەكە ۇلەسى اتاپ ءوتىلىپ, سونداي-اق مەملەكەت باسشىسى استانا كلۋبىنىڭ شەڭبەرىندە جاساعان باستامالار – 1975 جىلعى حەلسينكي پروتسەسىن جاڭارتۋ, وعان قوسا 2020 جىلى استانادا قاۋىپسىزدىك جانە ىنتىماقتاستىق جونىندەگى كونفەرەنتسيانى وتكىزۋ جانە ەقىۇ, ازياداعى ءوزارا ءىس-قيمىل جانە سەنىم شارالارى جونىندەگى كەڭەسى مەن اسەان ايماقتىق فورۋمىنىڭ ءبىرىنشى بىرلەسكەن كونسۋلتاتيۆتىك كەزدەسۋىن ۇيىمداستىرۋ تۋرالى ايتىلدى.
كەلىسسوزدەر بارىسىندا قازاقستاندىق تاراپ البانيانىڭ 2020 جىلى ەقىۇ-عا توراعالىق ەتۋ كانديداتۋراسىن قولداۋعا جانە وسى ۇيىمعا توراعالىق ەتۋ تاجىريبەسىمەن بولىسۋگە دايىن ەكەندىگىن ءبىلدىردى. ال البانيا تاراپى قازاقستاننىڭ اتالعان ۇيىمعا تابىستى توراعالىعىنىڭ تاجىريبەلەرىن پايدالانۋعا ق ۇلىقتى ەكەندىكتەرىن ءبىلدىردى.
رەسمي كەزدەسۋدەن كەيىن جۋرناليستەر الدىنا شىققان مينيسترلەر ەكى ەلدىڭ قارىم-قاتىناستارىنىڭ ماڭىزدى باعىتتارى تۋرالى ايتىپ بەردى.
– ديتمير بۋشاتي مىرزانىڭ ساپارى ەكىجاقتى قارىم-قاتىناستاردى ودان ءارى دامىتۋعا جانە ەكى ەل اراسىنداعى ىنتىماقتاستىقتىڭ بولاشاعىن ايقىنداۋعا جانە دامىتىلۋى ءتيىس باعىتتاردى نىعايتۋعا ىقپال ەتەرىنە سەنىمدىمىن, – دەدى ق.ءابدىراحمانوۆ.
كەزدەسۋ اياسىندا بىرقاتار ەكىجاقتى قۇجاتتارعا – قازاقستاننىڭ سىرتقى ىستەر مينيسترلىگى مەن البانيانىڭ ەۋروپالىق جانە سىرتقى ىستەر مينيسترلىگىنىڭ اراسىنداعى ىنتىماقتاستىق تۋرالى حاتتاماعا, قازاقستاننىڭ سىرتقى ساۋدا پالاتاسى جانە تيرانانىڭ ساۋدا-ونەركاسىپتىك پالاتاسى اراسىندا ءوزارا تۇسىنىستىك مەموراندۋمىنا اتالعان قۇرىلىمداردىڭ باسشىلارى قول قويدى.
سەرىك ابدىبەك,
«ەگەمەن قازاقستان»
