كۆارتەت قۇرامىندا تالانتتى مۋزىكانتتار, حالىقارالىق بايقاۋلاردىڭ لاۋرەاتتارى ايدار توقتاليەۆ (1-ءشى سكريپكا), الەكسەي لەبەدەۆ (2-ءشى سكريپكا), بەكزات سايلاۋباي ۇلى (الت), سونىمەن قاتار ۇجىمنىڭ كوركەمدىك جەتەكشىسى, قازاقستاننىڭ ەڭبەك سىڭىرگەن قايراتكەرى ەرنار مىڭتاەۆ (ۆيولونچەل) بار. ءبىر كونتسەرتتىڭ اياسىندا ارتىستەر تىڭدارمان نازارىنا كلاسسيتسيزم, رومانتيزم جانە XX عاسىر مۋزىكاسى سىندى ءتۇرلى جانرلار مەن داۋىرلەردى توعىستىرعان تاماشا تۋىندىلاردى ۇسىندى.
ءدال وسى كەشتە ۆ.موتسارتتىڭ ىشەكتى اسپاپتار كۆارتەتى №15 رە مينور شىعارماسى ورىندالدى. داڭقتى كومپوزيتوردىڭ كامەرالىق انسامبلدەرگە ارناپ جازعان تۋىندىلارىنىڭ ىشىندە وسى ىشەكتى اسپاپتار كۆارتەتى ەرەكشە ايگىلى. ايرىقشا دراماتيزمىمەن, بەينەلىلىگىمەن وزگەشەلەنەتىن بۇل تۋىندى – كورنەكتى كومپوزيتور ءارى اۆتوردىڭ دوسى ي.گايدنگە ارنالعان التى كۆارتەتتىڭ ىشىندەگى ەكىنشى (جانە ەڭ تانىمال) شىعارما.
ودان كەيىن ورىندالعان ح.ءۆولفتىڭ «يتاليا سەرەناداسى» W17/2 شىعارماسى كومپوزيتوردىڭ سان قىرلى دارىنى مەن وزىندىك ءستيلىن تاعى ءبىر مارتە ەسكە سالىپ وتكەندەي. اسپاپتىق مينياتيۋرا باعدارلامالىق دراما رەتىندە ءتۇسىندىرىلىپ, مۇندا قوس كەيىپكەر – ەر مەن ايەل اراسىنداعى ماحاببات سەزىمى باياندالادى.
كۆارتەت 1988 جىلى ا.جۇبانوۆ اتىنداعى دارىندى بالالارعا ارنالعان رەسپۋبليكالىق ارنايى ورتا مۋزىكالىق مەكتەپ وقۋشىلارىنان قۇرىلىپ, دارىندى ۇجىمعا كومپوزيتور عازيزا احمەتقىزى جۇبانوۆا قامقورلىق ەتكەن بولاتىن. كوپتەگەن حالىقارالىق بايقاۋلاردىڭ, سونىڭ ىشىندە ايگىلى د.شوستاكوۆيچ اتىنداعى حالىقارالىق بايقاۋدىڭ لاۋرەاتى اتانعان توپتى بۇگىندە امەريكا, ەۋروپا مەن ازيانىڭ الدىڭعى قاتارلى ساحنالارى اتتاي قالاپ شاقىرتادى. وزدەرىنىڭ ورىنداۋشىلىق شەبەرلىگىمەن, كەرەمەت ويناۋ تەحنيكاسىمەن دارالاناتىن مۋزىكانتتاردىڭ تالاي بەلەستەردى باعىندىراتىنى انىق.
ايا ءومىرتاي,
«ەگەمەن قازاقستان»
