− مەملەكەت باسشىسىنىڭ 2018 جىلعى 10 قاڭتارداعى قازاقستان حالقىنا جولداۋىندا كاسىپورىندارعا ەنەرگيا تيىمدىلىگى تالاپتارىن جەتىلدىرۋ تاپسىرىلعان بولاتىن. وسى تاپسىرمانى ورىنداۋ ءۇشىن «ەنەرگيا ۇنەمدەۋ جانە ەنەرگيا تيىمدىلىگىن ارتتىرۋ تۋرالى» زاڭعا تاجىريبەلىك تالداۋ جۇرگىزىلدى. بۇل رەتتە مۇددەلى تاراپتارمەن بىرلەسىپ, ءتيىستى زاڭ جوباسىنىڭ تۇجىرىمداماسى ازىرلەندى («قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەنەرگيا ۇنەمدەۋ جانە ەنەرگيا تيىمدىلىگىن ارتتىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى»), - دەدى. ونىڭ ايتۋىنشا, تۇجىرىمداما ەنەرگيا ۇنەمدەۋدىڭ قولدانىستاعى تەتىكتەرىن جەتىلدىرۋدى (مەملەكەتتىك ەنەرگەتيكالىق ءتىزىلىم, ەنەرگيا اۋديتورلىق قىزمەت, مەملەكەتتىك باقىلاۋ), جەكە جانە مەملەكەتتىك سەكتورلاردى رەتتەۋ تاسىلدەرىن وزگەرتۋدى, سونداي-اق ەنەرگيا ۇنەمدەۋدى ىنتالاندىرۋ شارالارىن ازىرلەۋدى كوزدەيدى.
مينيستر ءوز بايانداماسىندا ەلىمىزدەگى ەنەرگيا ۇنەمدەۋ بويىنشا اتقارىلىپ جاتقان جۇمىستارمەن تانىستىردى.
− 2017 جىلدىڭ قورىتىندىسى بويىنشا ەلىمىزدىڭ جالپى ىشكى ءونىمىنىڭ ەنەرگيا سىيىمدىلىعى 2008 جىلعى دەڭگەيگە قاراعاندا 18% تومەندەدى. 2016 جىلى دۇنيەجۇزىلىك بانك الەمنىڭ 111 ەلىنىڭ ەنەرگيا تيىمدىلىگى سالاسىنداعى مەملەكەتتىك رەتتەۋ باعالاۋىن جۇرگىزدى. قازاقستان ول رەيتينگتە رەيتينگتە 32-ءشى ورىندى يەلەندى. قازىرگى ۋاقىتتا, كارتانىڭ 15 ملرد. تەڭگە بولاتىن 68 جوباسى ىسكە اسىرىلۋدا. ولاردىڭ ىشىندە 12 جوبا ەنەرگيا سەرۆيستىك شارتتار مەن مەملەكەتتىك-جەكەمەنشىك ارىپتەستىك تەتىگى ارقىلى قولعا الىندى. جىل سايىنعى ۇنەمدەۋ 3,5 ملرد. تەڭگەنى قۇرايدى, سونىڭ ىشىندە 12 جوبا بويىنشا 660 ملن. تەڭگە ۇنەمدەلەدى. كارتانىڭ 72 ملرد. تەڭگە بولاتىن 76 جوباسى ازىرلەنۋ ۇستىندە, قازىرگى ۋاقىتتا ولارعا ينۆەستورلار ىزدەستىرىلىپ جاتىر. ەنەرگيا سەرۆيستىك جوبالاردى ىسكە اسىرۋدى قولداۋ ءۇشىن بىرىككەن ۇلتتار ۇيىمىنىڭ دامۋ باعدارلاماسىمەن جانە دامۋ قورىمەن بىرلەسىپ, جوبالارعا سۋبسيديالاۋ جانە كەپىلدەندىرۋ تۇرىندە قارجىلىق قولداۋ كورسەتۋدى باستادىق بۇگىنگى تاڭدا 28 جوبا وسى قولداۋعا يە بولدى. سونىمەن قاتار, حالىقارالىق ىنتىماقتاستىق اياسىندا دۇنيەجۇزىلىك بانكپەن بىرلەسىپ, 21,7 ملن. اقش دوللارىن قۇرايتىن جوبانى ىسكە اسىرىپ جاتىرمىز,- دەدى ج. قاسىمبەك.
مينيستر بايانداماسىندا ەنەرگيا ۇنەمدەۋ كورسەتكىشى بويىنشا كوش باسىنا پاۆلودار وبلىسى تۇرعاندىعى, ال تومەنگى كورسەتكىش الماتى قالاسىنا تيەسىلى ەكەندىگى ايتىلدى. «مينيسترلىك جىل سايىن ەنەرگيا ۇنەمدەۋ سالاسىنداعى جەرگىلىكتى اتقارۋشى ورگانداردىڭ قىزمەتىنە مىناداي ولشەمدەر بويىنشا باعالاۋ جۇرگىزەدى: ينديكاتورلار مەن مىندەتتەردى ورىنداۋ, مەملەكەتتىك مەكەمەلەر مونيتورينگى, بيۋدجەتتىك ۇيىمداردا ەنەرگيا ءاۋديتىن جۇرگىزۋ, ءتيىمدى جارىقتاندىرۋ كوزدەرىنە كوشۋ جانە تاعى باسقالار. وزدەرىڭىز كورىپ وتىرعانداي, استانا قالاسىن قوسقاندا 10 ءوڭىردىڭ كورسەتكىشى ورتاشا. ال, الماتى قالاسىن قوسقاندا 5 وڭىردە كورسەتكىش تومەن», - دەدى ينۆەستيتسيالار جانە دامۋ ءمينيسترى جەڭىس قاسىمبەك بۇگىنگى ۇكىمەت وتىرىسىندا.
ونىڭ ايتۋىنشا, پاۆلودار وبلىسى كاسىپورىندارىنىڭ ەنەرگيا ۇنەمدەۋ قىزمەتىنە جوعارى باعا بەرىلگەن. «وندا 2013 جىلدان بەرى ەنەرگيا ۇنەمدەۋ ءبولىمى جۇمىس ىستەيدى. ءتورت مەملەكەتتىك-جەكەمەنشىك ارىپتەستىك جوباسىنىڭ ەكەۋى پاۆلودار وبلىسىندا ىسكە اسىرىلىپ جاتىر. بۇل - پاۆلودار مەن ەكىباستۇز قالالارىنداعى كوشە جارىقتاندىرۋدى جاڭعىرتۋ جوبالارى. سونداي-اق, اتىراۋ مەن قىزىلوردا وبلىستارىندا مەملەكەتتىك-جەكەمەنشىك ارىپتەستىك اياسىندا ءبىر جوبادان ىسكە اسىرىلىپ جاتىر. بۇل - اتىراۋ قالاسىنىڭ كوشەسىن جارىقتاندىرۋ جانە قىزىلوردا وبلىسىنداعى ءبىر ورتا مەكتەپتىڭ قازاندىعىن جاڭعىرتۋ جوبالارى», - دەيدى ول.
مينيستر وسىعان بايلانىستى ۇكىمەت باسشىسىنان بۇل باعىتتاعى جۇمىستى كۇشەيتۋ جونىندە تاپسىرما بەرۋدى سۇرادى. «بارلىق وڭىرلەرگە ەنەرگيا ۇنەمدەۋ بويىنشا, سونىڭ ىشىندە مەملەكەتتىك-جەكەمەنشىك ارىپتەستىك جوبالارىن ىسكە اسىرۋ مەن ەنەرگيا ۇنەمدەۋدى ناسيحاتتاۋ جۇمىستارىن كۇشەيتۋدى تاپسىرۋىڭىزدى سۇرايمىز», - دەدى جەڭىس قاسىمبەك.
ەركەجان ايتقازى,
«ەگەمەن قازاقستان»
