مانساپ ورتالىقتارىن ۇيىمداستىرۋ جوباسى قر پرەزيدەنتى جانىنداعى شەتەلدىك ينۆەستورلار كەڭەسىنىڭ eڭبەك زاڭناماسى, ادام كاپيتالىن دامىتۋ جانە شەتەلدىك جۇمىس كۇشىن جۇمىلدىرۋ جونىندەگى بىرلەسكەن جۇمىس توبى جوسپارى اياسىندا جۇزەگە اسۋدا. قازىرگى كەزدە ايماقتىق جوعارى وقۋ ورىندارىنداعى مانساپ ورتالىقتارىن ۇيىمداستىرۋعا باعىتتالعان ەڭ ۇزدىك تاجىريبەلەردى قولدانىسقا ەنگىزۋ بويىنشا جۇمىستار جۇرگىزىلۋدە. جوبانىڭ ماقساتى ايماقتىق جوعارى وقۋ ورىندارى تۇلەكتەرىنىڭ ەڭبەك نارىعىنداعى باسەكەلەستىگىن ارتتىرۋ بولىپ تابىلادى.
جوبا اياسىندا جەتەكشى جوعارى وقۋ ورنى – KIMEP نەگىزىندە وتكەن ترەنينگ-سەميناردا مانساپ ورتالىقتارىنىڭ جۇمىس ىستەۋىن قامتاماسىز ەتۋدەگى ماسەلەلەر تالقىلاندى. سەمينارعا س. امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتى, م. اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتى, ش. ءۋاليحانوۆ اتىنداعى قاراعاندى مەملەكەتتىك تەحنيكالىق ۋنيۆەرسيتەتى, ە. بوكەتوۆ اتىنداعى اقتوبە ايماقتىق مەملەكەتتىك ۋنيۆەرسيتەتى, س. تورايعىروۆ اتىنداعى پاۆلودار مەملەكەتتىك ۋنيۆەرسيتەتىنىڭ وكىلدەرى قاتىستى.
KIMEP وقۋ ءىسى جونىندەگى پرورەكتورى دوكتور گيلبەرت ليننە ستۋدەنتتەردى نارىق جاعدايىندا جۇمىسقا ورنالاستىرۋدا مانساپ ورتالىقتارىنىڭ جاۋاپكەرشىلىگى جوعارى ەكەندىگىنە توقتالدى. ال جاھاندىق دەڭگەيدە ويلاي بىلەتىن, زامانۋي الەمدىك سۇرانىستارعا دايىن مامان بولىپ شىعۋ ستۋدەنتتىڭ وزىندىك ىزدەنىسى مەن تالابىنا بايلانىستى.
KIMEP ۋنيۆەرسيتەتىنىڭ مانساپ جانە جۇمىسپەن قامتۋ قىزمەتىنىڭ جەتەكشىسى مەرۋەرت ادايبەكوۆانىڭ ايتۋىنشا, جوعارى وقۋ ورىندارى ءوز ستۋدەنتتەرىنە ەڭبەك نارىعىندا قاجەتتى ماماندىقتاردى يگەرۋگە مۇمكىندىك بەرەتىن بولسا, مانساپ ورتالىقتارى وقۋ ورنى مەن جۇمىس بەرۋشى اراسىنداعى باستى دانەكەر بولىپ تابىلادى. وسى ورايدا جيىرما جىلدان استام تاجىريبەسى بار KIMEP مانساپ ورتالىعى ستۋدەنتتەرمەن تىعىز بايلانىستا جۇمىس ىستەپ كەلەدى. ستاتيستيكالىق مالىمەتتەر بويىنشا, ستۋدەنتتەردىڭ 45 پايىزدان استامى وقي ءجۇرىپ جۇمىسقا ورنالاسسا, 40 پايىزعا جۋىعى وقۋ بىتىرگەننەن كەيىن, ال وزگەلەرى 3-6 اي ارالىعىندا جۇمىسقا ورنالاسقان.
«فيليپ مورريس قازاقستان» جشس ۇيىمدىق دامۋ جونىندەگى مەنەدجەرى تاتيانا كوۆزالوۆا اتالعان كومپانيادا ستۋدەنتتەرگە اقى تولەنەتىن تاعىلىمداما باعدارلامالارى قاراستىرىلعاندىعىن جەتكىزدى. مۇنداي شارالار ستۋدەنتتەرگە وزدەرىن ناقتى جوبالاردا سىناپ, الەۋەتىن تانىتۋعا مۇمكىندىك بەرەدى. جۇمىس بەرۋشىلەر مەن جوعارى وقۋ ورىندارىنىڭ مانساپ ورتالىقتارى ارقىلى تىعىز بايلانىستا بولۋى ەلىمىزدىڭ بارلىق ايماقتارىندا قولدانىسقا ەنۋى ءتيىس.
سەمينار بارىسىندا مانساپ قىزمەتىنە جالپى شولۋ جاسالىپ, ستۋدەنتتەر جانە تۇلەكتەرمەن جۇرگىزىلەتىن جۇمىس, سەرىكتەس كومپانيالارمەن ىنتىماقتاستىق ورناتۋ, ستۋدەنتتەردىڭ قابىلەتتەرىن دامىتۋدى كوزدەيتىن ترەنينگتەر, سەمينارلار, بيزنەس-ويىنداردى ۇيىمداستىرۋ, بوس ورىندار جارمەڭكەسى سياقتى ماڭىزدى ماسەلەلەر تالقىلاندى.
ەلۆيرا سەرىكقىزى,
«ەگەمەن قازاقستان»
الماتى
