فورۋمعا قاتىسقان «اتامەكەن» ۇكپ جانىنان قۇرىلعان رەسپۋبليكالىق ىسكەر ايەلدەر كەڭەسىنىڭ ءتورايىمى ءلاززات رامازانوۆا وڭىردە تاعى ءبىر جاڭا جوبا بۇۇ-نىڭ UNIDO جوباسىن ەلىمىزدە ءبىرىنشى بولىپ پاۆلودار وبلىسىندا جۇزەگە اسىرۋدى ۇسىندى. وڭىرلىك ىسكەر ايەلدەر كەڭەسىنە وندىرىستىك سالاداعى ايەلدەر كاسىپكەرلىگىن دامىتۋعا قاتىستى قولداۋ قاجەت.
وبلىس اكىمى بولات باقاۋوۆتىڭ ايتۋىنشا,وڭىردەگى 43 مىڭ شاعىن جانە ورتا بيزنەس سالاسىندا ەڭبەك ەتىپ جۇرگەندەردىڭ كوبى كاسىپكەر, ىسكەر ايەلدەر قولىندا. ونىمدەرىن نارىققا شىعارۋدا قولداۋ كورسەتۋگە ءازىر.
وڭىرلىك كاسىپكەرلەر پالاتاسى جانىنان قۇرىلعان ىسكەر ايەلدەر كەڭەسىنىڭ قۇرامىندا 25 ايەل بار. كەڭەستەر اۋدانداردا جۇمىس ىستەيدى. وبلىستىق ىسكەر ايەلدەر كەڭەسىنىڭ ءتورايىمى رايحانگۇل ساتاباەۆانىڭ ايتۋىنشا, جىل باسىنان بەرى اسكەر ايەلدەر قۇنى 322,9 ميلليون تەڭگە تۇراتىن 113 جوبا باستاعان.
مىسالى, اۋدان ورتالىعى اقتوعايدا تۇراتىن «سۆيستۋنوۆا» جەكە كاسىپكەرلىگىنىڭ باسشىسى ولگا سۆيستۋنوۆا 2005 جىلدان بەرى پلاستيكالىق تەرەزەلەر جاساۋمەن اينالىسادى. ولگا «بيزنەستىڭ جول كارتاسى-2020» باعدارلاماسى بويىنشا مەملەكەتتىك گرانتقا يە بولىپ, جۇك كولىگىن ساتىپ الادى.
- جولداۋدا ەلباسىنىڭ «بيزنەستىڭ جول كارتاسى-2020» باعدارلاماسىن 5 جىلعا ۇزارتۋ تۋرالى تاپسىرماسى ءبىز ءۇشىن ۇلكەن مۇمكىندىك. مەملەكەت قارجىلاي قولداۋىمەن قاجەتتى قۇرالدار ساتىپ الۋعا بولادى. جۇمىس, دامۋ بولسا, جۇمىسشىلاردىڭ ەڭبەكاقىلارىن دا كوبەيتە الامىز,- دەيدى.
اۋدان ورتالىعى ەرتىس اۋىلىنىڭ تۇرعىنى جانار سەيىتوۆا بولسا,فاست فۋد كافەسىن اشقان. جانار بۇرىن مەملەكەتتىك قىزمەتكەر بولدى. قازىر اۋدان ورتالىعىندا جىلدام تاماقتاندىرۋ سالاسىنداعى ءوزىنىڭ ويلاعان جوباسىن قولعا الدى.
- «باستاۋ» جوباسى بويىنشا وقىپ, بيزنەس-جوسپارىمدى قورعادىم. بيىل جازدا «اۋىل شارۋاشىلىعىن قارجىلاي قولداۋ قورى» ارقىلى جەڭىلدىكپەن 5 ميلليون تەڭگە نەسيە الدىم. قازىر كافەدە شاۋرما, دونەر, سامسا, كاۋاپ, حوت-دوگتار, فري كارتوبى, گامبۋرگەرلەر ازىرلەيمىز, دەيدى جانار.
وڭىردە «اتامەكەن» ۇلتتىق كاسىپكەرلەر پالاتاسىنىڭ باعدارلامالارى اياسىندا 3 مىڭنان استام ايەلگە ءتۇرلى كاسىبي كەڭەس پەن كومەك بەرىلدى.
فورۋم سوڭىندا ۇزدىك كاسىپكەر ىسكەر ايەلدەرگە «اتامەكەن» ۇلتتىق كاسىپكەرلەر پالاتاسىنىڭ, وبلىس اكىمىنىڭ ماراپاتتارى تابىستالدى.
فاريدا بىقاي,
«ەگەمەن قازاقستان»
پاۆلودار
سۋرەتتى تۇسىرگەن: ۆالەري بۋگاەۆ
