سولتۇستىك قازاقستان وبلىسىنىڭ اكىمى كۇنگەيلىكتەردى تەرىسكەيگە شاقىردى

جيىنعا وبلىستىق, قالالىق ءماسليحات دەپۋتاتتارى, جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارما باسشىلارى قاتىستى.

قۇمار ىرگەباي ۇلى ءوز سوزىندە «وڭتۇستىكتەن– سولتۇستىككە» مەملەكەتتىك  باعدارلاماسى جۇيەلى تۇردە جۇزەگە اسىرىلىپ جاتقانىن, بۇگىنگە دەيىن ەلىمىزدىڭ ءار قيىرىنان  2700 ادام  قونىس اۋدارعانىن, ولاردىڭ جارتىسىنا جۋىعى تۇركىستان وبلىسىنان ات باسىن تىرەگەنىن اتاپ ءوتتى. سولتۇستىك وڭىرلەرگە ءوز ەركىمەن بارعىسى كەلەتىن وتباسىلارعا مەملەكەت ايتارلىقتاي قولداۋ كورسەتەدى. جەرگىلىكتى بيلىك تاراپىنان دا بارىنشا جاعداي جاسالادى.

«جۇمىسپەن قامتۋ - 2020» باعدارلاماسى شەڭبەرىندە وڭتۇستىكتەن سولتۇستىككە قونىس اۋدارعان تۇرعىنداردىڭ قاتارى از ەمەس. ماسەلەن, 2016 جىلى ماعجان ەلىنە 167, وتكەن  جىلى 745 وتباسى قونىس اۋدارعان. بيىل 10 ايدىڭ ىشىندە 1706 كۆوتا ءبولىنىپ 1440 ادام كوشىپ كەلسە, ۇشتەن ءبىرى ەڭبەككە جارامدى.  376 ادام جۇمىسپەن قامتىلعان. دەسەك تە, اۋىل شارۋاشىلىعى ماماندارى  مەن بيۋجەتتىك قىزمەتكەرلەر ءالى جەتىسپەيدى.

شىمكەنت قالاسىنىڭ اكىمى عابيدۋللا ءابدىراحىموۆ بىرگە جۇمىس ىستەۋگە ىقىلاستى ەكەنىن, الداعى ۋاقىتتا  سولتۇستىككە كوشكەن وتباسىلاردىڭ حال-جاعدايىن كورىپ كەلۋگە باراتىنىن جەتكىزدى.

ءسوز اراسىندا مەكتەپ ءبىتىرۋشى تۇلەكتەر «سەرپىن» باعدارلاماسى بويىنشا تەگىن وقىپ, جۇمىسقا ورنالاسا الاتىنىن, ءۇش جىل قىزمەت ەتكەن, بالالى بولعان جاس وتاۋ يەلەرىنە باسپانا بەرىلەتىنىن ايتا كەتكەن ءجون.

ءومىر ەسقالي,

«ەگەمەن قازاقستان»

سولتۇستىك قازاقستان وبلىسى