كورمەگە كورەي حالقىنىڭ «حاحۆە بيولسينگۋت تالنوري», «بونسان تالچۋم», «سۋيون يارۋ» جانە باسقا دا تەاترلاندىرىلعان ءداستۇرلى بي قويىلىمدارىندا قولدانىلاتىن ماسكالار قويىلدى.
«بۇل كورمە – ەكى ەل اراسىنداعى مادەني-دوستىق تىعىز قارىم-قاتىناستىڭ ايقىن كورىنىسى. ماسكالار شەرۋى ارقىلى كورەي ەلىنىڭ مادەنيەتىمەن, وزىندىك ەرەكشەلىكتەرىمەن جاقىنىراق تانىسۋعا بولادى. بۇگىنگى كورمەنىڭ تاقىرىبى دا ەرەكشە. كورەي حالقىنىڭ تامىرى تەرەڭ تاريحىنان سىر شەرتەدى. ايتۋلى شارا كوپشىلىك كوڭىلىنەن شىعىپ, كەلۋشىلەر تاراپىنان وڭ باعاسىن الارىنا سەنەمىن. الداعى ۋاقىتتا دا تىڭ باستامالاردى بىرلەسە جۇزەگە اسىرىپ, جاڭا شىعارماشىلىق جوبالارعا جول اشامىز دەگەن نيەتتەمىز», دەدى كورمەنىڭ اشىلۋ سالتاناتىندا ءسوز العان ۇلتتىق مۋزەي ديرەكتورىنىڭ ورىنباسارى اباي ساتىبالدين.
ماسكا مادەنيەتى بارلىق حالىقتا بار. ونەر الەمىنىڭ وسىناۋ ايرىقشا ءتۇرىن جەر شارىنىڭ تۇكپىر-تۇكپىرىنە كەزدەستىرۋگە بولادى. الايدا ولار ءار ەلدە وزىندىك ەرەكشەلىككە يە. باي تاريحى سوناۋ ەجەلگى گرەكيا مەن يتاليا جەرىنەن باستاۋ الىپ, كەيىن ايگىلى «دەل ارتە» كومەديالىق تەاترىنىڭ قالىپتاسۋىنا نەگىز بولىپ, اتاعى كۇللى الەمگە جايىلعان ونەر تۋىندىسىنىڭ ءار حالىقتىڭ مادەنيەتى مەن ءومىر ءسۇرۋ قالىبىنان, ءداستۇر مەن دىلىنەن الار ورنى ايرىقشا. سونىڭ ىشىندە, اسىرەسە كورەيلەر ومىرىندەگى ءمانى مەن ماڭىزى زور. كەلبەتى ۇرەي تۋدىراتىن قۇدايلار مەن جانۋارلار بەينەلەنگەن وزگە ەلدەردىڭ ماسكالارىمەن سالىستىرعاندا, كورەي ماسكالارى ادام كەلبەتى مەن مىنەز-قۇلقىن, كوڭىل كۇي سەزىمدەرىن شىنايى بەينەلەيدى.
«كورمەدە سىزدەر كورەي حالقىنىڭ ءداستۇرلى ماسكا مادەنيەتى جانە ونى دايىنداۋ ادىستەرىمەن تانىسا الاسىزدار. بۇل ماسكالار ادامدار اراسىنداعى ءوزارا جىلى قارىم-قاتىناس, نيەتتەستىكتى نىعايتىپ, ءبىر-ءبىرىن كۇلدىرىپ, قۋانتۋ ءۇشىن جاسالادى. ماسكالاردا جانۋارلار, وزگە دە تىرشىلىك يەلەرى ەمەس, تەك قانا ادام بەينەسىندەگى كۇلكىلى بەينەلەر سۋرەتتەلگەن», دەپ قازاقستانداعى كورەيا رەسپۋبليكاسىنىڭ توتەنشە جانە وكىلەتتى ەلشىسى كيم دە سيك كورمەنىڭ وزىندىك ەرەكشەلىگىنە توقتالىپ, كورەي حالقىنىڭ مادەنيەتىمەن تانىستىرىپ ءوتتى.
ايتۋلى كورمەگە كورەي ءداستۇرلى ماسكالارىنىڭ 61 ءتۇرى ۇسىنىلىپ وتىر. وسى ارقىلى چوسون ديناستياسى كەزەڭىندەگى كورەيا حالقىنىڭ ءومىر ءسۇرۋ داعدىسى مەن مادەنيەتىنە تەرەڭنەن بويلاپ, جان-جاقتى ماعلۇمات الۋعا بولادى. كورمە 2018 جىلدىڭ 23 جەلتوقسانىنا دەيىن جالعاسادى.
نازەركە جۇماباي,
«ەگەمەن قازاقستان»
