«پورتالدىڭ نەگىزگى ماقساتى – قازاقستاندىق جانە شەتەلدىك كاسىپكەرلەردى وبلىستىڭ ينۆەستيتسيالىق مۇمكىندىكتەرىمەن تانىستىرۋ جانە وسى وڭىردە ءوز بيزنەسىن جۇرگىزۋىنە كومەكتەسۋ» دەيدى رەسۋرستى ۇيىمداستىرۋشىلار. پورتال وڭىردەگى ىسكەرلىك احۋال, ينۆەستيتسيالىق جوبالار, كاسىپكەرلەردى مەملەكەتتىك قولداۋ شارالارى جانە اۋدانداردىڭ ينفراقۇرىلىمدىق ەرەكشەلىكتەرى تۋرالى اقپارات بەرىپ, باسىم سەكتورلاردىڭ دامۋىنا شولۋ جاسايدى. سايتتىڭ قۇرىلتايشىسى – باتىس قازاقستان وبلىسىنىڭ كاسىپكەرلىك جانە يندۋستريالىق-يننوۆاتسيالىق دامۋ باسقارماسى.
جاڭا پورتال ءۇش تىلدە – قازاقشا, ورىسشا, جانە اعىلشىنشا قىزمەت كورسەتەدى. سايتقا كىرۋشىلەر پورتالدىڭ «ايماق تۋرالى» بولىمىنەن ءوڭىردىڭ وزىندىك ەرەكشەلىكتەرى, ينۆەستيتسيالىق الەۋەتىنەن باستاپ, وبلىس ورتالىعىندا توقتايتىن قوناقۇيلەر, تۇرمىستىق جانە دەمالىس ورىندارى تۋرالى بارلىق اقپاراتتى تابا الادى. «يندۋستريالىق ايماق» ءبولىمى وڭىردە قولعا الىنعان جانە جوسپارلانعان جوبالار تۋرالى مالىمەت بەرسە, «ينۆەستور جول سىلتەۋىشى» بولىمىندە ىقتيمال ينۆەستوردىڭ ءار قادامىنا نۇسقاۋلىقتار بەرىلگەن. وسى ارقىلى پورتالدان قازاقستاندىق جانە شەتەلدىك ينۆەستور وزىنە قاجەتتى اقپاراتتى, وبلىستىڭ الەۋمەتتىك-ەكونوميكالىق الەۋەتى, دامۋ كورسەتكىشتەرى, مەملەكەتتىك قولداۋ تەتىكتەرى, ىسكە اسىرىلىپ جاتقان يننوۆاتسيالىق جوبالار, دامۋ ينستيتۋتتارى تۋرالى مالىمەتتەردى ء«بىر تەرەزە» قاعيداتى بويىنشا وپ-وڭاي تابا الادى.
– بۇل پورتال ينۆەستورلارعا سەرۆيستىك قىزمەت كورسەتەدى. بۇرىن ينۆەستورلارعا قاجەتتى اقپارات وبلىس اكىمدىگىنىڭ, «ورال» الەۋمەتتىك كاسىپكەرلىك كورپوراتسياسىنىڭ جانە وزگە دە قۇرىلىمداردىڭ سايتتارىندا بولەك-بولەك ورنالاسقان بولسا, ەندى سونىڭ بارلىعى ءبىر جەردە توقايلاسىپ, ءوزارا كىرىككەن دەۋگە بولادى. باسقا جاقتان كەلگەن ينۆەستور وسى سايتتان وزىنە قاجەتتى ينۆەستيتسيالىق احۋال, ينفراقۇرىلىمدار, كوممەرتسيالىق بوس جەر ۋچاسكەلەرى, قۇرىلىپ جاتقان يندۋستريالىق ايماق, ەلىمىزدىڭ زاڭدىلىقتارى تۋرالى بارلىق اقپاراتتى, كاسىپورىندى قالاي قۇرىپ, قالاي تىركەۋ كەرەكتىگى تۋرالى ناقتى كەڭەستى تابا الادى. سونداي-اق ينۆەستورلار پورتالدىڭ ۆيرتۋالدى قابىلداۋ بولمەسىنە ءوز پىكىرىن جازىپ قالدىرىپ, وعان جاۋاپ الا الادى, – دەيدى وبلىستىق كاسىپكەرلىك جانە يندۋستريالىق-يننوۆاتسيالىق دامۋ باسقارماسى باسشىسىنىڭ ورىنباسارى حاسەن توياسوۆ.
پورتالدىڭ ينتەراكتيۆتى كارتاسىندا 30-دان استام ينۆەستيتسيالىق جوبا, وندىرىستىك جانە الەۋمەتتىك-ەكونوميكالىق ايماقتار تۋرالى مالىمەت بەرىلگەن. كارتادا سونداي-اق كولىك, الەۋمەتتىك, ەنەرگەتيكالىق جانە مۋنيتسيپالدى ينفراقۇرىلىم نىساندارى, جەر, مينەرالدى شوگىندىلەر, بالىقشارۋاشىلىعى سۋ قويمالارى جانە ت.ب.تۋرالى مالىمەتتەر, ونەركاسىپتىك كاسىپورىندار تۋرالى اقپارات بار. «پورتال ىسكەرلىك جانە مەملەكەتتىك قارىم-قاتىناس ءۇشىن ءتيىمدى الاڭ بولا الادى دەپ ۇمىتتەنەمىز» دەيدى رەسۋرستى ۇيىمداستىرۋشىلار.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان وبلىسى
