يۋ.ءيليننىڭ مالىمدەۋىنشە, جول-پايدالانۋ قىزمەتتەرى 1 مىڭنان استام ينجەنەرلىك جانە قار تازالاۋ تەحنيكاسىن سايلاپ قويعان. سونىمەن قاتار 120 مىڭ تەكشە مەتر كوكتايعاققا قارسى ماتەريال جانە 12 مىڭ توننادان استام تۇز ازىرلەنگەن. قازىرگى ۋاقىتتا 37 مىڭ مەتردەن استام قاردان قورعايتىن قالقانداردى ورناتۋ جۇزەگە اسىرىلۋدا. ال قىس مەزگىلىندە پايدالانىلىپ كەلگەن 950 جىلىتۋ بەكەتىنە قوسىمشا تاعى 130-ى قوسىلادى.
ءبىر وكىنىشتىسى, كۇن سۋىتقالى بەرى ماۋسىمدىق توتەنشە وقيعالار دا تىركەلە باستاپتى.
– جىلىتۋ ماۋسىمى باستالعالى, ياعني 15 قازان مەن 13 قاراشا ارالىعىندا رەسپۋبليكانىڭ تۇرعىن سەكتورىندا 720-عا جۋىق ءورت ورىن الدى, ولاردىڭ سالدارىنان 27 ادام كوز جۇمدى. ال ۋلى گازبەن ۋلانۋ سالدارىنان 10 ادام باقيلىق بولدى. تابيعي گازدان ۋلانعان 11 ادام قازا تاپتى, – دەدى يۋ. يلين.
جالپى تۇرعىن سەكتوردا ءورتتىڭ ورىن الۋىنىڭ نەگىزگى سەبەپتەرىنىڭ ءبىرى رەتىندە حالىقتىڭ تۇرمىستا ءورت قاۋىپسىزدىگى ەرەجەلەرىنىڭ قاراپايىم تالاپتارىن ساقتاماۋى اتالدى.
– بۇگىنگە دەيىن ءورت قاۋىپسىزدىگى ايلىعى ۇيىمداستىرىلىپ, ونىڭ اياسىندا تجك اۋماقتىق بولىمشەلەرىنىڭ قىزمەتكەرلەرى 180 مىڭ تۇرعىن ءۇيدى ارالاپ شىقتى. 375 مىڭنان استام ادامعا نۇسقاۋلىقتار تاراتىلدى. 25 مىڭنان استام ادامدى قامتي وتىرىپ حالىقپەن 1 500 شارا ۇيىمداستىرىلدى, – دەپ مالىمدەدى يۋ.يلين.
سونىمەن قاتار ءورت بولعان جاعدايداعى ءىس-ارەكەتتەردى پىسىقتاۋ ءۇشىن مۇعالىمدەر مەن وقۋشىلاردى وقۋ ورىندارىنىڭ عيماراتتارىنان قاۋىپسىز ەۆاكۋاتسيالاۋ بويىنشا 800-دەن استام تاجىريبەلىك جاتتىعۋلار وتكىزىلگەن.
ءباسپاسوز ءماسليحاتىندا يۋ.يلين 2017-2018 جىلعى قىستا قارلى بوران مەن شىڭىلتىر ايازدىڭ سالدارىنان رەسپۋبليكالىق اۆتوجولداردىڭ 120 رەت جابىلعاندىعىن دا اتاپ ءوتتى. سونداي-اق كۇرەجولداردىڭ بويىندا 23 مىڭ ادامعا كومەك كورسەتىلگەن.
ىشكى ىستەر ءمينيسترىنىڭ ورىنباسارى ەلىمىزدىڭ تاۋلى-جوتالى وڭىرلەرىندە 550-دەن اسا سەل وشاعىنىڭ انىقتالعاندىعىنا توقتالدى. وسىعان وراي, «قازسەلدەنقورعاۋ» مەكەمەسى كۇشەيتىلگەن دايىندىق رەجىمىنە كوشىرىلگەن. قاۋىپتىڭ الدىن الۋ ماقساتىندا سەلدەن قورعاۋ قالقاندارى ورناتىلىپ, اقپاراتتىق ساقتاندىرۋ تۇرعىداعى تاقتايشالار ىلىنگەن.
ءسوز اراسىندا يۋ.يلين قىس مەزگىلىندە تۇرعىنداردان, جولاۋشىلاردان دا ساقتىق پەن قاۋىپسىزدىكتىڭ قاراپايىم قاعيداتتارىنىڭ ساقتالۋى تالاپ ەتىلەتىندىگىن ەسكە سالدى.
سەرىك ابدىبەك,
«ەگەمەن قازاقستان»
