وعان ءوڭىردىڭ بيلىك, ىسكەر جانە مادەني توپتاردىڭ, كونسۋلدىق كورپۋس جانە بۇقارالىق اقپارات قۇرالدارىنىڭ وكىلدەرى قاتىستى. قازاقستان رەسپۋبليكاسىنىڭ اۋستريا رەسپۋبليكاسىنداعى ەلشىسى قايرات سارىباي ءوز سوزىندە قۇرمەتتى كونسۋلدىقتىڭ اشىلۋى ەكىجاقتى قارىم-قاتىناستاردىڭ ودان ءارى دامۋىنا سەپتىگىن تيگىزەتىنىن اتاپ ءوتتى.
قازاقستان تاراپى ەلىمىز ەكونوميكاسىنىڭ ديۆەرسيفيكاتسياسى اياسىندا تومەنگى اۋستريامەن ىقپالداستىقتى تەرەڭدەتۋگە مۇددەلىگىن تانىتا وتىرىپ, بۇل ءوڭىر ءوزىنىڭ اعاش وڭدەۋ, مۇناي-گاز, توقىما, تاماق ونەركاسىبى جانە جاڭعىرمالى ەنەرگيا كوزدەرىن قولدانۋىمەن تانىمال بولىپ وتىرعانى تۋرالى ايتىلدى. وسىعان وراي, ەلشى اۋستريالىق تاراپتى ءوزارا ىقپالداستىقتىڭ ءارتۇرلى سالالارىنداعى الەۋەتتى بارىنشا بەلسەندى دامىتۋعا شاقىردى.
سونىمەن بىرگە ق.سارىباي جاڭا قۇرمەتتى كونسۋل الەكساندر كيسسكە قازاقستاننىڭ كونسۋلدىق پاتەنتى مەن قازاقستان رەسپۋبليكاسىنىڭ تۋىن تابىس ەتە وتىرىپ, قازاقستان-اۋستريا ىنتىماقتاستىعىن كەڭەيتۋ جولىندا ساتتىلىك تىلەدى.
اۋستريانىڭ «ÖWD Wachdienst security GmbH & Co KG» كومپانياسىنىڭ ديرەكتورى الەكساندر كيسس تومەنگى اۋستريا فەدەرالدى جەرىندە قازاقستاننىڭ مۇددەسىن قورعاۋ بويىنشا جوعارى سەنىم ارتقانى ءۇشىن العىس ءبىلدىرىپ, ەكى ەل يگىلىگى ءۇشىن ءوزىنىڭ تاجىريبەسى مەن ءبىلىمىن جۇمسايتىنىن اتاپ ءوتتى.
سونىمەن قاتار قۇرمەتتى كونسۋلدىقتىڭ اشىلۋىنا وراي قازاقستاننىڭ اۋسترياداعى ەلشىلىگى تاراپىنان جۇرگىزىلىپ جاتقان «قازاق ىنجۋلەرى – ۇلى دالا cارىنى» جوباسى شەڭبەرىندە جاس مۋزىكانتتار ءاليا اقبەرگەنوۆا مەن نيكولاي ورينينسكيدىڭ قاتىسۋىمەن كونتسەرت ۇيىمداستىرىلدى.
«ەگەمەن-اقپارات»
