قازاقستاننىڭ بۇۇ جانىنداعى تۇراقتى وكىلى قايرات وماروۆ افريكانىڭ مۇيىسىندە, سونىڭ ىشىندە ەريترەيا, ەفيوپيا, دجيبۋتي جانە سومالي ەلدەرىندەگى تەڭدەسسىز وڭ وزگەرىستەردى اتاپ ءوتتى. ۇستىمىزدەگى جىلدىڭ ماۋسىم ايىندا بۇكىل الەم ەريترەيا مەن ەفيوپيا اراسىنداعى تاريحي تاتۋلىققا كۋا بولدى – ەكى ەلدىڭ باسشىلارى ساياسي ەرىك-جىگەر تانىتىپ, 80 مىڭنان استام ادامنىڭ ءومىرىن قيعان 20 جىلدىق تەكەتىرەستى توقتاتتى.
بۇل وقيعا 10 جىل ىشىندە اۋماقتىق قاقتىعىستارعا وراي بولىنگەن ەريترەيا مەن دجيبۋتي اراسىنداعى جوعارى دەڭگەيدەگى العاشقى بايلانىستارعا جول اشتى. ەكىجاقتى كەلىسىمدەرمەن قاتار ەريترەيا, ەفيوپيا جانە سومالي ساياسي, ەكونوميكالىق, الەۋمەتتىك جانە مادەني بايلانىستاردى نىعايتۋعا جانە وڭىرلىك بەيبىتشىلىكتى, قاۋىپسىزدىكتى جانە دامۋدى ىنتالاندىرۋ جونىندەگى كۇش-جىگەرلەرىن ورناتۋعا كەلىستى.
بۇۇ قاۋىپسىزدىك كەڭەسىنىڭ وتىرىسىندا سويلەگەن سوزىندە ق.وماروۆ:
«وڭىردەگى بەيبىتشىلىك وڭىرلىك كوشباسشىلاردىڭ باتىل شەشىمدەرىنىڭ ناتيجەسى بولدى. بۇل ۇزاققا سوزىلعان شيەلەنىستەردىڭ, قاقتىعىستار مەن باسەكەلەستىكتىڭ ءداۋىرىنىڭ اياقتالعانىن كورسەتەدى جانە بەيبىت, ءوزارا ءتيىمدى ىنتىماقتاستىقتىڭ جاڭا داۋىرىنە جول اشادى. ديپلوماتيا, دەلدالدىق, سەنىمدى نىعايتۋ جانە ديالوگ, دامۋداعى ينۆەستيتسيالارمەن قاتار, ەلدەر اراسىنداعى داۋلى ماسەلەلەردى شەشۋدىڭ سەنىمدى جولى. ءبىز دجيبۋتي مەن ەريترەيا اراسىنداعى ءوزارا ءىس-قيمىلدى قولدايمىز جانە ولاردى ەكىجاقتى قارىم-قاتىناستاردا قالعان ماسەلەلەردى شەشۋ ءۇشىن ودان ءارى كۇش-جىگەر جۇمساۋعا شاقىرامىز», دەدى.
قازاقستان ەريترەياعا قارسى سانكتسيالاردى الىپ تاستاۋ تۋرالى شەشىم ءۇشىن داۋىس بەرگەن كەزدە, ءوزىنىڭ افريكادا بەيبىتشىلىك پەن قاۋىپسىزدىكتى ورناتۋعا دەگەن ۇمتىلىسىن باسشىلىققا الدى. ەلىمىزدىڭ قاۋىپسىزدىك كەڭەسىندەگى جۇمىسىنىڭ وسى باعىتى پرەزيدەنت نۇرسۇلتان نازارباەۆتىڭ بۇۇ قاۋىپسىزدىك كەڭەسىنە ساياسي جولداۋىنداعى 7 باسىمدىقتىڭ ءبىرى بولدى.
بۇۇ قاۋىپسىزدىك كەڭەسىنىڭ سومالي جانە ەريترەياعا قاتىستى سانكتسيالار جونىندەگى كوميتەتىنىڭ توراعاسى رەتىندە قازاقستان ەريترەيادان سانكتسيالاردى الىپ تاستاۋ تۋرالى كەڭەس مۇشەلەرىنىڭ شەشىمىنە ەلەۋلى ۇلەس قوستى. قازاقستاننىڭ ەريترەيامەن ىنتىماقتاستىقتى نىعايتۋ جونىندەگى كۇش-جىگەرى وسى ەلگە قارسى 9 جىلدىق سانكتسيالار رەجىمى اياقتالۋىنىڭ ماڭىزدى العىشارتى بولدى.
قازاقستاندىق دەلەگاتسيانىڭ سانكتسيالىق كوميتەتتىڭ باسشىسى رەتىندە اتقارعان جۇمىسىنىڭ قورىتىندىلارى قاۋىپسىزدىك كەڭەسى مۇشەلەرى تاراپىنان جوعارى باعاعا يە بولدى. وتىرىس بارىسىندا ەريترەيا مەن دجيبۋتي دەلەگاتسيالارى قازاقستانعا وڭىردەگى تۇراقتى بەيبىتشىلىكتى ورناتۋعا تولىققاندى قولداۋ كورسەتكەنى ءۇشىن العىسىن ءبىلدىردى.
ەريترەياعا قارسى سانكتسيالار 2009 جىلى ەنگىزىلگەن بولاتىن.
بۇۇ قاۋىپسىزدىك كەڭەسى قابىلداعان قارارعا قارۋ-جاراق ەمبارگوسىن الىپ تاستاۋ, جول جۇرۋگە تىيىم سالۋدى, اكتيۆتەردى توقتاتۋدى جانە ماقساتتى سانكتسيالاردى جويۋ كىرەدى.
«ەگەمەن-اقپارات»
