ءبىز مۇگەدەكتەرمەن كەزدەسكەندە دە, ولاردىڭ بىزگە جازعان حاتتارىندا دا كورسەتىلەتىن قىزمەتتەردىڭ ساپاسى ناشار ەكەندىگى ايتىلادى. ماسەلەن, ءبىرىنشى توپتاعى كوزى كورمەيتىن مۇگەدەكتەرگە باعاسى 800 مىڭ تەڭگەگە جۋىق باعدارلامالى نوۋتبۋكتەر اپەرىلەدى ەكەن, بىراق ولاردىڭ ساپاسى ناشار, جۇمىس ىستەۋ مۇمكىندىگى وتە تومەن. ال سول سوماعا Apple كومپانياسىنىڭ نەمەسە وسىدان ەكى ەسە تومەن باعاعا باسقا دا ءبىر ساپالى فيرمانىڭ كومپيۋتەرلەرىن الۋعا بولادى. بىراق وسى ماسەلە قولعا الىنباي وتىر. وسىنداي ولقىلىقتى ىڭعايسىز مەحانيكالىق مۇگەدەكتەر اربالارىنا دا قاتىستى ايتۋعا بولادى.
ءبىر جەردەن كوتەرمە ساۋدا ارقىلى ارزان باعاعا الىنعان وسىنداي زاتتاردى جەتكىزۋشىلەردىڭ مەملەكەتكە قىمبات باعاعا ساتىپ وتىرعانى كورىنىپ تۇر. سىبايلاس جەمقورلىقتىڭ بەلگىلەرى بايقالاتىن وسىنداي ىستەرمەن ارناۋلى ورگاندار اينالىسۋى كەرەك-اق.
مۇگەدەكتەرگە قاتىستى مۇنداي مىسالدار وتە كوپ. كوپ جىلدان بەرى ايتىلىپ كەلە جاتقان ساپالى پروتەز تۋرالى اڭگىمەلەر ءالى كۇنگە سول قالپىندا قالىپ وتىر. ونىڭ ورنىنا بالەن جىلعى اعاش پروتەزدەر مەن سارتىلداعان بالداقتار قولدانىلىپ جۇرگەنىن كورگەندە قاراۋعا ۇيالاسىڭ.
ءبىز پرەمەر-ءمينيستردىڭ ورىنباسارى ەربولات دوساەۆقا دەپۋتاتتىق ساۋال جولداپ, پرەزيدەنتتىڭ جولداۋىنداعى تالاپتارعا سايكەس قاراجاتتى ادامنىڭ تۇرمىس ساپاسىن ارتتىرۋعا جۇمساۋعا شاقىردىق. سونىڭ ىشىندە مۇگەدەكتەرگە قاجەتتى قۇرالداردى, اتاپ ايتقاندا كوزى كورمەيتىندەر ءۇشىن ارناۋلى قوندىرعى ورناتىلعان كومپيۋتەرلەردى, مۇگەدەكتەردىڭ ەلەكترلى اربالارىن, وسى زامانعى پروتەزدەر ساتىپ الۋدى بارىنشا اشىق, مولدىرلىكپەن جۇرگىزۋدى تالاپ ەتتىك. سوندا الدەكىمدەر مەملەكەت قاراجاتتارىن ءتۇرلى قيتۇرقىلىقتارمەن قالتالارىنا باسپاس ەدى.
يرينا سميرنوۆا,
ءماجىلىس دەپۋتاتى
