ش.ايمانوۆ اتىنداعى «قازاقفيلم» كينوستۋدياسى قازاقستاننىڭ رۋمىنياداعى ەلشىلىگى مەن كلۋج-ناپوكا قالاسىنىڭ قۇرمەتتى كونسۋلدىعىمەن بىرلەسىپ ۇيىمداستىرعان فەستيۆالدە سوڭعى جىلدارى ونەر كەڭىستىگىنە ايتۋلى جاڭالىعىمەن ەنگەن وتاندىق ۇزدىك تۋىندىلار كورسەتىلدى. اتاپ ايتار بولساق, ش.ايمانوۆ اتىنداعى «قازاقفيلم» كينوستۋدياسىندا جارىق كورگەن «جاۋجۇرەك مىڭ بالا», «اناعا اپارار جول», «قۇنانباي», «ورالمان» جانە «جاڭعاق تال» فيلمدەرى رۋمىن كورەرمەندەرىنىڭ كوزايىمىنا اينالدى.
فەستيۆالدىڭ اشىلۋ سالتاناتىندا قازاقستاننىڭ رۋمىنياداعى ەلشىسى داۋلەت باتىراشەۆ رۋمىن اۋديتورياسىن وتاندىق كينووندىرىس ونىمدەرىمەن تانىستىرۋ شاراسى مەملەكەتتەردىڭ مادەني-گۋمانيتارلىق ىنتىماقتاستىعىنىڭ دامۋىنا جانە ەكى ەلدىڭ رۋحاني جاقىنداسۋىنا ىقپالىن تيگىزەتىنىن ايرىقشا اتاپ وتسە, اكتەر اسىلحان تولەپوۆ كورەرمەندەرگە «جاۋجۇرەك مىڭ بالا» ءفيلمىنىڭ ءتۇسىرىلۋى تۋرالى ايتىپ بەردى.
ايتۋلى ونەر وقيعاسىنا جەرگىلىكتى تۇرعىندار مەن قوعام قايراتكەرلەرى, ۇكىمەت, ىسكەرلىك جانە اكادەميالىق ورتا وكىلدەرى, سونداي-اق كلۋج-ناپوكا قالاسىندا وقىپ جۇرگەن قازاقستاندىق ستۋدەنتتەر قاتىستى. ولار قازاق كينوفەستيۆالى قالانىڭ مادەني ومىرىندە ەرەكشە قۇبىلىس بولعانىن, بۇل شارانىڭ رۋمىنيا بىرلىگىنىڭ جۇزجىلدىق مەرەيتويى قارساڭىندا ءوتىپ جاتقانىن ايتىپ, كورسەتىلىم سوڭىندا ءوز اسەرلەرىمەن ءبولىستى.
وتاندىق فيلمدەردەن شابىت العان رۋمىن كورەرمەندەرى مەن كينو ماماندارى رەجيسسەرلەر جۇمىسىنا جوعارى باعا بەرىپ, قازاقستاندىق كينو مەكتەبىنىڭ ەرەكشەلىكتەرىنە جان-جاقتى توقتالدى.
ايگۇل احانبايقىزى,
«ەگەمەن قازاقستان»
الماتى
