16 قاراشا كۇنى كەشكى 19.00 شاماسىندا وبلىس ورتالىعى قىزىلوردا قالاسىنان 130 شاقىرىم جەردە قارماقشى اۋدانىنىڭ اقجار اۋىلى ماڭىندا «سامارا-شىمكەنت» تاسجولىندا 2 جولاۋشىلار اۆتوبۋسىنىڭ سوقتىعىسقانى تۋرالى حابار كەلىپ ءتۇستى.
جول-كولىك وقيعاسى تۋرالى حابار العاننان كەيىن اپات ورنىنا قارماقشى اۋدانىنىڭ اكىمى سۇلتان ماقاشوۆ پەن اۋدان اكىمدىگىنىڭ قىزمەتكەرلەرى, وبلىستىق دەنساۋلىق ساقتاۋ, جۇمىلدىرۋ دايىندىعى باسقارمالارى مەن جەرگىلىكتى پوليتسيا قىزمەتىنىڭ, سونداي-اق توتەنشە جاعدايلار جانە ىشكى ىستەر دەپارتامەنتىنىڭ باسشىلارى باردى.
وقيعا ورنىندا جەرگىلىكتى پوليتسيا قىزمەتىنىڭ 34 قىزمەتكەرى,13 ارنايى تەحنيكا مەن 34 توتەنشە جاعدايلار دەپارتامەنتىنىڭ مامانى, 130 مەديتسينا سالاسىنىڭ قىزمەتكەرى, ونىڭ ىشىندە 16 دارىگەر جۇمىلدىرىلدى. سونداي-اق, 12 "جەدەل جاردەم" بريگاداسى جۇمىس ىستەدى.
84 جولاۋشىعا كومەك كورسەتىلدى. سونىمەن قاتار, جالاعاش جانە جوسالى اۋداندارىندا ەكى اۋرۋحانا جانە وبلىستىق مەديتسينالىق ورتالىق زارداپ شەككەندەرگە كومەك كورسەتۋدە.
«قازالى-قىزىلوردا» مەن «قىزىلوردا-قارماقشى» باعىتىنداعى 2 اۆتوبۋستا بارلىعى 86 ادام بولعان. مەديتسينالىق كومەك 74 جولاۋشىعا كورسەتىلدى,ونىڭ 29-ى اۋرۋحانالارعا جەتكىزىلدى جانە دارىگەرلەردىڭ باقىلاۋىندا. قالعان 45 جولاۋشىعا العاشقى مەديتسينالىق كومەك كورسەتىلىپ, امبۋلاتورلىق ەم تاعايىندالدى. اپات ورنىندا 2 ادام قايتىس بولدى جانە اۋىر جاراقات سالدارىنان اۋرۋحانادا ءبىر بالا كوز جۇمدى»,-دەدى وبلىستىق دەنساۋلىق ساقتاۋ باسقارماسىنىڭ ورىنباسارى ولجاس ىسقاقوۆ وڭىرلىك كوممۋنيكاتسيالار قىزمەتىندە وتكەن ءباسپاسوز ءماسليحاتىندا.
قايتىس بولعان جانداردىڭ وتباسىلارىنا جەرگىلىكتى بيلىك تاراپىنان قاجەتتى كومەك كورسەتىلۋدە.
