- اتىراۋ وبلىسى قارقىندى دامىپ كەلەدى. سوڭعى جىلدارى ەكونوميكانى ديۆەرسيفيكاتسيالاۋ بويىنشا جۇمىستار ءجۇرىپ جاتىر. ءداستۇرلى مۇناي سالاسىمەن قاتار اۋىل شارۋاشىلىعىن, ءتۋريزمدى دامىتۋعا كوڭىل بولىنۋدە. جاڭا مەكەمەلەر اشىلىپ جاتىر, - دەدى نۇرلان نوعاەۆ. - بالىق سالاسىن دامىتۋ دا اركەز نازاردا. سوندىقتان بالىق شارۋاشىلىعى باسقارماسىن قۇرۋ تۋرالى شەشىم قابىلداندى.
وبلىس اكىمىنىڭ شەشىمىمەن قۇرىلىم باسشىسى لاۋازىمىنا ارتۋر سادىبەك ۇلى تاعايىندالدى.
ارتۋر سادىبەك ۇلى ەڭبەك جولىن 2002 جىلى قۇرمانعازى اۋدانى بايدا سەلولىق وكرۋگىنىڭ باس مامانى قىزمەتىنەن باستاعان. سەلولىق وكرۋگ اكىمى, قۇرمانعازى اۋداندىق اكىمدىگى ىشكى ساياسات ءبولىمىنىڭ باسشىسى قىزمەتتەرىن اتقارعان. 2013 جىلى اتىراۋ وبلىسى اكىمى اپپاراتى ۇيىمداستىرۋ-تەكسەرۋ جانە اقپاراتتىق ساراپتاما ءبولىمىنىڭ باس مامانى بولىپ تاعايىندالدى. 2016 جىلى اتىراۋ وبلىسى اكىمى اپپاراتى مەملەكەتتىك قۇپيالاردى قورعاۋ ءبولىمى باسشىسى لاۋازىمىن اتقاردى.
ايماق باسشىسى وبلىس اكتيۆىنە جاڭا باسقارما باسشىسىن تانىستىرىپ, مەملەكەتتىك قىزمەت قۇرىلىمىنداعى جۇمىس تاجىريبەسى مەن بىلىكتىلىگىن اتاپ ءوتتى.
– ءسىزدىڭ تاجىريبەڭىز بەن ءبىلىمىڭىز وزىڭىزگە دە, ۇجىمىڭىزعا دا الدارىڭىزعا قويىلعان مىندەتتەردى اتقارۋعا سەپتىگىن تيگىزەرىنە سەنەمىز. بۇل باعىتتا كوپ جۇمىس ىستەۋ كەرەك. ايماقتىڭ بالىق سالاسىنداعى بۇرىنعى داڭقىن قالپىنا كەلتىرۋ كەرەك. بۇگىندە بالىق اۋلاۋمەن جانە وڭدەۋمەن اينالىساتىن 17 تابيعات پايدالانۋشى, 2 بەكىرە زاۋىتى بار. مىندەت – بالىق ونىمدەرىن شىعارۋ كولەمىن كوبەيتۋ. بالىق شارۋاشىلىعىن دامىتۋ جاڭا باسقارما جۇمىسىنىڭ باسىم باعىتى بولۋى ءتيىس, - دەدى نۇرلان نوعاەۆ.
ارتۋر سادىبەك ۇلى ءوز كەزەگىندە وبلىس اكىمى مەن جيىنعا قاتىسۋشىلارعا العا قويىلعان مىندەتتەردى ساپالى جۇزەگە اسىرۋ ءۇشىن بارلىق تاجىريبەسى مەن قابىلەتىن كورسەتەتىنىن ايتتى.
