بىرنەشە سەسسياعا بولىنگەن فورۋمدا 30-دان اسا تانىمال سپيكەر قور نارىعىنىڭ ينتەگراتسيالىق ۇدەرىستەرىمەن, سونىڭ ىشىندە ەاەو شەگىندە, نارىق لاندشافتىنىڭ جانە تسيفرلىق تەحنولوگيالاردى ەنگىزۋ جاعدايىندا قارجىلىق قىزمەتتەردىڭ وزگەرۋىنە قاتىستى ساراپتامالىق پىكىرلەرىن ورتاعا سالدى. فورۋمعا قاتىسۋشىلار قور نارىعى ارقىلى ەكونوميكانى قارجىلاندىرۋ, بيرجالىق ينفراقۇرىلىمدى دامىتۋ جانە بيرجالىق قۇرالداردى جىلجىتۋ تاقىرىپتارىن تالقىلادى.
ماڭىزدى شاراعا دۇنيەجۇزىلىك بيرجالار فەدەراتسياسىنىڭ پرەزيدەنتى (WFE) نانديني سۋكۋمار, ماسكات قور بيرجاسىنىڭ (Muscat Securities Markets) باس ديرەكتورى احمەد بين سالەح ال مارحۋن, ەۋرازيالىق بيرجالار فەدەراتسياسىنىڭ باس حاتشىسى كونستانتين سارويان, (FEAS), "موسكوۆسكايا بيرجا" كاق (MOEX) باسقارماسىنىڭ توراعاسى الەكساندر افاناسەۆ, LC2 Markets EBRD (ۋكراينا) ديرەكتورى اندرە كۋسۆەك, Clearstream ۆيتسە-پرەزيدەنتى يان ۆيللەمس, گرۋزيا قور بيرجاسىنىڭ پرەزيدەنتى گەورگي پارەسيشۆيلي, ەۋرازيالىق ەكونوميكالىق كوميسسياسىنىڭ قارجىلىق ساياسات دەپارتامەنتىنىڭ ديرەكتورى ارمان حاچاتريان سىندى شەتەلدىك ساراپشىلار قاتىستى.
فورۋم اياسىندا قازاقستان قور بيرجاسى باكۋ قور بيرجاسىمەن ءوزارا ىنتىماقتاستىق تۋرالى مەموراندۋمعا قول قويدى. مامىلەگە سايكەس بقب مەن KASE جۇمىس تيىمدىلىگى مەن باسەكەگە قابىلەتتىلىكتى ارتتىرۋ ماقساتىندا بىرلەسىپ جۇمىس جاسايدى.
فورۋم قازاقستان قور بيرجاسىنىڭ 25 جىلدىق قىزمەتىمەن قورىتىندىلانىپ, قازاقستاندىق قور بيرجاسىنىڭ ەڭ ۇزدىك وكىلدەرىن, بيرجا مۇشەلەرىن, ليستينگىلىك كومپانيالاردى جانە باق وكىلدەرىن سالتاناتتى تۇردە ماراپاتتاۋ راسىمىمەن اياقتالدى.
ايناش ەسالي,
«ەگەمەن قازاقستان»
الماتى
