تەاتردىڭ تۇتاس فويەسىنە تاقىرىپ بويىنشا تىزبەكتەلە ىلىنگەن سۋرەتتەر, ەسكيزدەر جانە ساحنالىق كوستيۋمدەردەن تۇراتىن كورمەنى كسرو حالىق ءارتيسى ءاسانالى ءاشىموۆ, قازاقستاننىڭ حالىق ءارتيسى ءسابيت ورازباەۆ, قازاقستاننىڭ ەڭبەك سىڭىرگەن قايراتكەرى, كورنەكتى تەاتر سۋرەتشىسى ەسەنگەلدى تۇياقوۆ اشىپ, مۇرات ساپاروۆتىڭ ساحنا ونەرىنە ءسىڭىرىپ كەلە جاتقان ەڭبەگىن ءار قىرىنان اتاپ ءوتتى.
سۋرەتشى مۇرات ساپاروۆ سانالى عۇمىرىن قازاق تەاتر ونەرىنە, ساحناعا دەكوراتسيا قويۋ ىسىنە ارناپ كەلەدى. ءوز ءىسىن جەتىك مەڭگەرگەن جاس مامان العاشقى ەڭبەك جولىن الماتى نەمىس تەاترىندا ستسەنوگراف بولىپ باستادى. وندا «پينگۆينى ۆ افريكە» (ەرتەگى), ۋكراينا رەجيسسەرى ولەكساندر يرۆانەتستىڭ «برەحۋن», اندرەي كريتەنكونىڭ «Norway.Today» پسيحولوگيالىق كلوۋناداسى (گەرمانيا) سەكىلدى ءار مازمۇنداعى سپەكتاكلدەرمەن ءساتتى قادام جاسادى.
ستسەنوگراف, سۋرەتشى 2002 جىلدان بەرى م.اۋەزوۆ اتىنداعى قازاق مەملەكەتتىك اكادەميالىق دراما تەاترىندا قىزمەت ەتەدى. م.ساپاروۆ بۇگىنگى كۇنى تەاتردا ءجۇرىپ جاتقان 40-قا جۋىق سپەكتاكلدىڭ ساحنالىق شەشىمىن تابۋعا رەجيسسەرلەرمەن بىرگە تەڭ كۇش سالىپ كەلەدى. الايدا كوپ جاعدايدا سۋرەتشىنىڭ ەڭبەگى نازاردان تىس قالىپ جاتادى. «كوزگە كورىنبەيتىن» جۇمىسپەن اينالىسسا دا, سپەكتاكل جەتىستىگىنىڭ كىلتى سۋرەتشىنىڭ قولىندا. سەبەبى ول بەزەندىرگەن ساحنا سپەكتاكلدىڭ «تولقۇجاتى». شىمىلدىق اشىلعاننان كەيىن كورەرمەن ەڭ الدىمەن ساحنانى – دەكوراتسيانى كورەدى. دارىندى ستسەنوگرافتىڭ قولىمەن دايىندالعان دەكوراتسيا ءتىلسىز بولعانىمەن, «سويلەپ» تۇرادى. سوندىقتان كەيىپكەردىڭ ارەكەتىنە جان بەرىپ, ساحنانى قوزعالىسقا كەلتىرەتىن سۋرەتشى – سپەكتاكلدەگى ەڭ باستى ادام. مۇرات ساپاروۆ قاراشاڭىراق تەاتردىڭ ساحناسىن 18 جىلدان بەرى ەرەكشە قولتاڭباسىمەن ارلەپ كەلەدى.
تەاتر ساحناسىندا ول «اپات», (اپوكاليپسيس اۆت. ي.ۆوۆنيانكو. رەج. ءا.راحيموۆ), «اقىن. پەرىشتە. ماحاببات» ( اۆت. ءا. تارازي, رەج. ءا. راحيموۆ), «سىعان سەرەناداسى» (اۆت. ي. ساپارباي, رەج. ە. وباەۆ, ت. ارالباي), «قارا كەمپىر»( اۆت. ءا. امزە ۇلى, رەج. ە. وباەۆ), «اكتريسا» (اۆت. د. يسابەكوۆ. رەج. ن. جۇمانيازوۆ), «كۇناھار» - «اي تۇتىلعان ءتۇن» (اۆت. م. كارىم. رەج. و.كەنەباەۆ), «كۇزگى رومانس» (اۆت. س. اسىلبەك ۇلى. رەج. ءا. راحيموۆ), «قۇدالار» (اۆت. ە.ۋاحيتوۆ. رەج. ءا. راحيموۆ), «باكەي قىز» (اۆت. ت. مامەسەيىتوۆ. رەج. ءا.راحيموۆ), «قوجاناسىر ءتىرى ەكەن» (اۆت. ت. نۇرماعامبەتوۆ, رەج. و. كەنەباەۆ), «ەڭلىك – كەبەك» (اۆت. م. اۋەزوۆ. رەج. ح. ءامىر – تەمىر), «شىراق جانعان ءتۇن» (اۆت. ن. ورازالين, رەج. ن. جاقىپباي), «قىز مۇڭى»(اۆت. ي. ساپارباي. رەج. ە. وباەۆ, ت. ارالباي), «ساعىنىش پەن ەلەس» (اۆت. س. بالعاباەۆ, رەج. ءا. راحيموۆ), «شاكارىم» (اۆتور جانە رەج. ءا. راحيموۆ), «مەن ىشپەگەن ۋ بار ما؟» (اۆت. يران عايىپ. رەج. و.كەنەباەۆ), ء«جۇز جىلدىق ماحاببات» (اۆت. د. يسابەكوۆ. رەج. ا. كاكىشەۆا), «باقىت كىلتى» (اۆت. ق. مۇرات. رەج. ە. وباەۆ), «اداسقاق» (اۆت. اسقار سۇلەيمەنوۆ, رەج. ءا.راحيموۆ), ا. بورانبايدىڭ «تتت» تەاترىندا «سيۋرپريز» (اۆت. ولەگ انتونوۆ, رەج. ەسلام نۇرتازين) سپەكتاكلدەرىندە كوركەم ىزدەنىسىمەن كورەرمەن تالعامىنان شىعىپ, حالقىنىڭ قوشەمەتىنە يە بولىپ, ۋاقىت تاراپىنان جوعارى باعاسىن الىپ وتىر. تەاتر ونەرىنە شىن جۇرەگىمەن بەرىلگەن سۋرەتشىنىڭ قويىلىمدارى فيلوسوفيالىق وي تەرەڭدىگىمەن, ۋاقىتتىڭ تالابىنا ساي كوركەمدىك-ەستەتيكالىق ىزدەنىستەرىمەن باعالى.
ايعا جۋىق جۇرەتىن كورمە سوڭى كونفەرەنتسيا جۇمىسىمەن جالعاسىن تاۋىپ, سۋرەتشى م.ساپاروۆ ستۋدەنتتەردىڭ, تەاتر كورەرمەندەرىنىڭ ستسەنوگرافيا, دەكوراتسيا, زاماناۋي بەزەندىرۋ ىسىنە بايلانىستى بىرقاتار ساۋالدارىنا جاۋاپ بەردى.
ايگۇل احانبايقىزى,
الماتى
