ق.توقاەۆ ن.شيمومۋرانى بۇۇ-نىڭ قازاقستانداعى قىزمەتىنىڭ 25 جىلدىعىمەن قۇتتىقتادى. سەنات توراعاسى بۇۇ-نىڭ جۇمىسىنا قاتىسۋ قازاقستاندىق ديپلوماتيانىڭ باسىم باعىتى ەكەنىن, ويتكەنى ول قازاقستاندا امبەباپ ءارى بالاماسىز الەمدىك ۇيىم رەتىندە قاراستىرىلاتىنىن ايتتى. الەۋمەتتىك-ەكونوميكالىق دامۋعا زور ۇلەسى مەن رەفورمالاردى قولداعانى ءۇشىن ءبىزدىڭ ەلىمىزدە بۇۇ-نى قۇرمەت تۇتادى.
بۇۇ رەفورمالارىنىڭ ماڭىزى تۋرالى ايتا كەلىپ, ق.توقاەۆ قازاقستان باس حاتشى ا.گۋتەرريشتىڭ ءتيىستى باستامالارى مەن شەشىمدەرىن قولدايتىنىن, ول بۇۇ باس اسسامبلەياسىنىڭ «بۇۇ جۇيەسى اياسىندا دامۋ ماقساتىندا جەدەل قىزمەت سالاسىنداعى ساياساتتى جان-جاقتى ءتورت جىلدىق شولۋ تۇرعىسىندا بۇۇ دامۋ جۇيەسىن قايتا باعدارلاۋ» قارارىنا داۋىس بەرۋ كەزىندە كورىنىس تاپقانىن اتاپ ءوتتى.
جۇزدەسۋشىلەر بۇۇ-نىڭ قازاقستانداعى ورنىقتى دامۋ ماقساتتارىن ىسكە اسىرۋ تاقىرىبىن دا قوزعادى. سەنات توراعاسى ءبىزدىڭ ەلىمىزدەگى بارلىق قۇجاتتار ورنىقتى دامۋ ماقساتتارىنا سايكەس كەلەتىنىن, اتاپ ايتقاندا پرەزيدەنت ن.نازارباەۆتىڭ باستاماسىمەن ازىرلەنگەن «قازاقستان-2050» ستراتەگياسى ورنىقتى دامۋ ماقساتتارىن تولىقتىراتىنىن ەسكە سالدى.
قىتايدىڭ قازاقستانداعى ەلشىسى چجان سياونى ونىڭ ءوتىنىشى بويىنشا قابىلداي وتىرىپ, سەنات باسشىسى ونىڭ قازاقستانداعى ميسسياسىنىڭ ناتيجەلى ءارى تابىستى باستالۋىمەن قۇتتىقتادى.
ق.توقاەۆ بۇگىندە ستراتەگيالىق ارىپتەستىك سيپاتىنا كوتەرىلگەن قازاقستان مەن قىتاي قاتىناستارىنىڭ قارقىندى دامۋىنا ريزاشىلىق ءبىلدىردى, ول ەكى ەلدىڭ مەملەكەت باسشىلارىنىڭ ەڭبەگى ەكەنى اتالىپ ءوتىلدى. ونىڭ پىكىرىنشە, «ەكى كورشى مەملەكەتتىڭ كوپتاراپتى ىنتىماقتاستىعى مەن ءوزارا تابىستى ءىس-قيمىلىن دامىتۋدا ولاردىڭ سەنىمدى ۇنقاتىسۋلارى باستى ءرول اتقارادى».
جوعارعى پالاتانىڭ باسشىسى قازاقستانداعى رەفورمالاردى, ءبىزدىڭ حالىقارالىق ارەناداعى, ونىڭ ىشىندە بۇۇ قاۋىپسىزدىك كەڭەسىندەگى باستامالاردى قولداعانى ءۇشىن قىتايعا العىس ايتتى, سونداي-اق اوسشك جانە شىۇ اياسىنداعى ناتيجەلى ىنتىماقتاستىقتى ريزاشىلىقپەن اتاپ ءوتتى.
ق.توقاەۆ قىتايلىق ء«بىر بەلدەۋ, ءبىر جول» مەگاجوباسى اياسىنداعى ءوزارا ءىس-قيمىلدىڭ ەرەكشە ماڭىزىنا توقتالدى. سەنات توراعاسى ونى ىسكە اسىرۋعا 60-قا جۋىق ەلدەر قوسىلىپ وتىرعانىن, بۇل الەمدىك ساۋدا مەن جالپى ەكونوميكادا جاڭا ءوسۋ نۇكتەلەرىنىڭ قالىپتاسۋىنا مۇمكىندىك بەرەتىنىن ايتتى. ونىڭ پىكىرىنشە, ۇلى جىبەك جولى ستراتەگياسىن ىسكە اسىرۋدا قازاقستان شەشۋشى ءرول اتقاراتىن بولادى, بۇل ءوزارا ءتيىمدى بايلانىستاردى نىعايتۋعا قوسىمشا مۇمكىندىكتەر بەرەدى.
سەنات توراعاسى ءحوبج تۇراقتى كوميتەتىنىڭ توراعاسى لي چجانشۋدىڭ قازاقستانعا رەسمي ساپارمەن كەلۋى كۇتىلىپ وتىرعانىن ايتتى.
قىتاي ديپلوماتى ءحوبج-نىڭ قازاقستان پارلامەنتىمەن ىنتىماقتاستىقتى نىعايتۋعا ءازىر ەكەنىن جەتكىزدى. چجان سياو سونداي-اق قازاقستان پرەزيدەنتىنىڭ تاياۋداعى جولداۋىن ەرەكشە ماڭىزدى قۇجات رەتىندە باعالادى. ەلشىنىڭ ايتۋىنشا, قىتايدا قازاقستانعا جانە ونىڭ حالقىنا زور ىقىلاس بىلدىرەدى, پرەزيدەنت نۇرسۇلتان نازارباەۆتى شىنايى قۇرمەت تۇتادى جانە سوندىقتان قازاقستاندىق رەفورمالاردى جان-جاقتى قولداۋ ساياساتى, ەكونوميكالىق جانە مادەني بايلانىستاردى ورىستەتۋ جالعاسىن تابۋدا. ەلباسىنىڭ الداعى جىلدى قازاقستانداعى جاستار جىلى دەپ جاريالاۋىنا بايلانىستى ءوزارا تابىستى ءىس-قيمىلدىڭ قوسىمشا مۇمكىندىكتەرى پايدا بولۋى ىقتيمال.
ەلشى 2019 جىلى گۋمانيتارلىق سالاداعى, اتاپ ايتقاندا جاستار بايلانىستارى اياسىنداعى ىنتىماقتاستىقتى كۇشەيتۋگە بولار ەدى, دەپ سانايدى. ق.توقاەۆ بۇل ۇسىنىستى وڭ باعالادى.
