سونداي-اق ءوز كەزەگىندە بانك بۇگىنگە دەيىن ءوڭىر تۇرعىندارىنىڭ «نۇرلى جەر» باعدارلاماسى شەڭبەرىندە ءتيىستى باسپاناعا قول جەتكىزۋى ءۇشىن 20 ميلليارد تەڭگەدەن استام قاراجات اۋدارعان. بۇل سوما جىل اياعىنا دەيىن تاعى دا 2 ميلليارد تەڭگەگە وسەدى دەپ كۇتىلۋدە. ياعني اتالعان بانك وڭىردەگى ءوز سالىمشىلارىنا ماتەريالدىق قولداۋ كورسەتۋ مەن كومەك بەرۋ شارالارىن ودان ءارى جالعاستىرا بەرمەك. بۇل رەتتە وبلىس اكىمى بەردىبەك ساپارباەۆ پەن «قازاقستاننىڭ تۇرعىن ءۇي قۇرىلىس جيناق بانكى» اق باسقارما ءتورايىمى لياززات يبراگيموۆا ارنايى كەلىسىمگە قول قويدى. بانك باسشىسىنىڭ ايتۋىنشا, جەكە تۇرعىن ءۇيدى يەلەنۋدە اقتوبەلىكتەر ەل وڭىرلەرى اراسىندا كوش باستاپ كەلەدى. اسىرەسە ولار باستاپقى جارنا تولەۋ ىسىندە بەلسەندى. وسىنداي وڭ كورىنىس ءوز كەزەگىندە قتقجب-نىڭ وڭىردەگى سالىمشىلارى ءۇشىن كوبىرەك قاراجات اۋدارۋىنا ءارى پايىزدىق مولشەرلەمەنىڭ كەمي تۇسۋىنە سەپتىگىن تيگىزدى.
وسىلايشا اقتوبە وبلىسىندا «نۇرلى جەر» مەملەكەتتىك باعدارلاماسى اياسىندا تۇرعىن ءۇي زايمىنىڭ العاشقى جارناسى 20 پايىزدان 10 پايىزعا تومەندەتىلدى. بۇل جەڭىلدىكتى باسپانا كەزەگىندە تۇرعان قتقجب سالىمشىلارى «نۇر اقتوبە» تۇرعىن ءۇي الابىنداعى ءبىر بولمەلى پاتەرلەردى ساتىپ الۋ كەزىندە پايدالانا الادى.
جەرگىلىكتى بيلىك ولار ءۇشىن ءبىرىنشى كەزەكتە 250 ميلليون تەڭگە ءبولدى. بۇل قاراجات بانكتىڭ 500-دەن اسا سالىمشىسىنىڭ العاشقى جارناسىن تومەندەتۋگە مۇمكىندىك بەرمەك. قازىرگى كۇنى «نۇر اقتوبەدەگى» تازا ارلەۋدەگى 1 بولمەلى پاتەردىڭ ءبىر شارشى مەترىنىڭ قۇنى 100-120 مىڭ تەڭگەنى قۇرايدى. پاتەرلەردىڭ جالپى اۋدانى − 32-54 شارشى مەتر ارالىعىندا.
− سالىمشىدا باسپانا قۇنىنىڭ 10 پايىزى بولۋ كەرەك. العاشقى جارنانىڭ قالعان 10 پايىزىن اكىمدىك بيۋدجەتتەن بەرەدى. ونى قارىز الۋشى 5 جىل ىشىندە اي سايىن 8250 تەڭگەدەن قايتارادى. پاتەر قۇنىنىڭ قالعان بولىگىن «تۇرعىن ءۇي قۇرىلىس جيناق بانكى» جىلدىق مولشەرلەمەسى 5 پايىزدىق جەڭىلدەتىلگەن قارىزبەن ۇسىنادى, − دەدى ل.يبراگيموۆا.
ارينە مۇنداي جەڭىلدىك كەز كەلگەن ازاماتقا ۇسىنىلا بەرمەيدى. وعان تەك «نۇرلى جەر» باعدارلاماسى شەڭبەرىندە تۇرعىن ءۇي كەزەگىندە تۇرعان ءارى تولەم قابىلەتى راستالعان ازاماتتار عانا قاتىسا الادى. سونداي-اق ولاردىڭ جەكە مەنشىگىندە وزگە باسپاناسى بولماۋى كەرەك. تۇتاستاي العاندا جىل اياعىنا دەيىن وڭىردە 870 مىڭ شارشى مەتر تۇرعىن ءۇي پايدالانۋعا بەرىلمەك. ونى يەلەنەتىن تۇرعىنداردىڭ اراسىندا «تۇرعىن ءۇي قۇرىلىس جيناق بانكى» سالىمشىلارىنىڭ ۇلەسى جوعارى.
تەمىر قۇسايىن,
«ەگەمەن قازاقستان»
اقتوبە
