كەڭەسكە قاتىسقان وبلىس اكىمى ە.قوشانوۆ, ينۆەستيتسيالار جانە دامۋ ءمينيسترى ج.قاسىمبەك, ەڭبەك جانە حالىقتى الەۋمەتتىك قورعاۋ ءمينيسترى م.ابىلقاسىموۆا ءسوز سويلەدى. سونداي-اق سەمينار-كەڭەسكە استانا قالاسى اكىمىنىڭ, سولتۇستىك قازاقستان, اقمولا, قوستاناي, پاۆلودار, شىعىس قازاقستان وبلىستارى اكىمدەرىنىڭ الەۋمەتتىك ارىپتەستىككە جاۋاپتى ورىنباسارلارى, «اتامەكەن» ۇكپ, كاسىپوداقتار فەدەراتسياسىنىڭ, 100-گە تارتا ءىرى وتاندىق كاسىپورىنداردىڭ باسشىلارى دا كەلدى.
كەڭەستە وندىرىستىك كەشەندە جۇمىس ىستەپ جاتقان قازاقستاندىق كومپانيالاردىڭ الەۋمەتتىك-ەڭبەك ساياساتىنا جاڭا قادامدار ازىرلەۋدىڭ ماڭىزى اتالدى. «وندىرىستىك سەكتورداعى ەڭبەك ونىمدىلىگىنىڭ ءوسىمى جۇمىس كۇشىنىڭ بىلىكتىلىگى مەن جاعدايىنىڭ جاقسارۋىمەن انىقتالاتىن فاكتورلارعا بايلانىستى», دەي كەلىپ, ا.مامين وسى ورايدا «بۇل ەڭ الدىمەن مەملەكەت باسشىسى جولداۋدا اتاپ كەتكەن نەگىزگى ەلەمەنت – ادامي كاپيتالدىڭ جيىنتىعى, جۇمىسشىلاردىڭ الەۋمەتتىك جاعدايىنىڭ جاقسارۋى» دەگەندى ەرەكشە ايتتى.
مەملەكەت باسشىسىنىڭ جولداۋى شەڭبەرىندە 2019 جىلدىڭ قاڭتارىنان ەڭ تومەنگى ايلىق جالاقى 1,5 ەسەگە وسەدى. ERG, «قازمىرىش» جشس, «كازمينەرالز», «ارسەلور ميتتال تەمىرتاۋ» سياقتى كومپانيالار جانە وزگەلەرى دە ءوز جۇمىسشىلارىنىڭ جالاقىسىن كوتەرۋ نيەتىندە.
ءبىرىنشى ۆيتسە-پرەمەر اتاپ كەتكەندەي, ۇكىمەت تاراپىنان ەڭبەك داۋلارىنىڭ الدىن الۋ ساپاسىن ارتتىرۋ جونىندەگى شارالار قابىلدانۋدا. جۇمىسشىلار, جۇمىس بەرۋشىلەر جانە مەملەكەت اراسىنداعى ۇنقاتىسۋدىڭ قولجەتىمدىلىگى مەن ساپاسىن تۇبەگەيلى ارتتىرۋ جونىندەگى شارالار قاراستىرىلىپ جاتىر. «جۇمىسشىلاردىڭ ەڭبەگىن دەر كەزىندە تولەۋ مەن قۇقىنىڭ ساقتالۋى كۇشەيتىلەتىن بولادى», دەدى ا.مامين وسى ورايدا.
تمك ءىرى كومپانيا جەتەكشىلەرى كەڭەس بارىسىندا «الەۋمەتتىك جاۋاپكەرشىلىكتى بيزنەستە ناتيجەگە جەتۋدىڭ ەڭ باستى ءتاسىلى, بارلىق باسىمدىقتاردىڭ يادروسى دەپ سانايدى» دەگەندى باسا ايتىپ ءوتتى. ء«بىزدىڭ كاسىپورىنداردىڭ الەۋمەتتىك باعىتى سان قىرلى جانە ادامداردىڭ ءومىر ساپاسىن جاقسارتۋعا باعىتتالعان», دەدى «قازمىرىش» جشس تۇراقتى دامۋ جونىندەگى باسقارۋشى ديرەكتورى اندرەي لازارەۆ.
وڭىرلەردە كوشەلى كاسىپورىندار بالالار باقشالارىن, مەديتسينالىق مەكەمەلەردى كۇردەلى جوندەۋدەن وتكىزۋ, سپورت نىساندارىن سالۋ, ولاردى زاماناۋي دا دالدىگى جوعارى قۇرال-جابدىقتارمەن قامتۋ سياقتى الەۋمەتتىك جوبالاردى بەلسەندى جۇزەگە اسىرۋدا. بالالار ۇيىنە, كوپبالالى وتباسىلارعا, قارتتار مەن مۇمكىندىگى شەكتەۋلى ادامدارعا قولداۋ كورسەتىلىپ كەلەدى.
سونىمەن قاتار ءومىردىڭ بارلىق سالاسىنداعى تسيفرلاندىرۋ مەن جاڭا تەحنولوگيالاردىڭ قارقىندى دامۋى ەڭبەك نارىعى مەن جۇمىسپەن قامتۋعا تىكەلەي ىقپال ەتۋدە. وسىعان بايلانىستى ەكونوميكانىڭ جاڭا قاجەتتىلىكتەرىنە ەڭبەك رەسۋرستارىنىڭ بەيىمدەلۋ مەحانيزمدەرى ەنگىزىلەدى. ەڭبەك رەسۋرستارى اعىنىن باسقارۋ جونىندەگى شارالار ازىرلەنۋدە.
ا.مامين «بۇل ماقساتتارعا جەتۋ ءۇشىن ۇكىمەت رەسپۋبليكالىق كاسىپوداقتار بىرلەستىگىمەن, كاسىپكەرلەردىڭ ۇلتتىق پالاتاسىمەن بىرلەسە 2018-2020 جىلدارعا ارنالعان الەۋمەتتىك ارىپتەستىك جونىندەگى باستى كەلىسىم ازىرلەدى», دەدى. قازىرگى تاڭدا جەرگىلىكتى اتقارۋشى ورگانداردىڭ كاسىپورىندارمەن شامامەن 700-گە تارتا كومپانيا جۇمىسشىلارىن قامتيتىن جول كارتاسى جاسالدى. قىسقارتۋعا تۇسكەن جۇمىسشىلاردى قايتا دايارلاۋعا جانە ولاردىڭ ءارى قاراي جۇمىسقا تۇرىپ كەتۋىنە بىرلەسە ينۆەستيتسيا سالۋ قاراستىرىلىپ وتىر.
جيىن بارىسىندا قاتىسۋشىلار جۇمىسشىلارمەن ۇجىمدىق-كەلىسىمدىك قاتىناسقا كاسىپوداقتاردىڭ قاتىسۋى, كورپوراتيۆتى الەۋمەتتىك جاۋاپكەرشىلىكتى دامىتۋ ماسەلەلەرىنە, ەڭبەك قاتىناستارىن رەتتەۋ جونىندەگى شارالارعا نازار اۋداردى. سونداي-اق كەن-مەتاللۋرگيا سالاسىندا سالالىق كوميسسيالار جۇمىسى, ERG, «قازاقمىس» جشس, «قتج» ۇك» اق, «قازمىرىش» جشس الەۋمەتتىك جاۋاپكەرشىلىگى تاجىريبەسى, «ارسەلور ميتتال تەمىرتاۋ» اق الەۋمەتتىك تۇراقتىلىقتى قامتاماسىز ەتۋ جونىندەگى قابىلداپ جاتقان شارالارى قارالدى.
قايرات ءابىلدا,
«ەگەمەن قازاقستان»
قاراعاندى
